ជាហេតុការណ៍ដ៏រន្ធត់មួយ ដែលបានកើតឡើង តាំងពីខែវិច្ឆិកា ឆ្នាំ២០១៤ កន្លងទៅ និងដែលបានធ្វើឲ្យរញ្ជួល នៅទូទាំងប្រទេសអូទ្រីស។ ប៉ុន្តែទើបតែមកដល់ថ្ងៃសុក្រ កាលពីសប្ដាហ៍មុន ប៉ុណ្ណោះ ដែលតុលាការ​បាន​ចេញ​សាលក្រមសម្រេច កាត់ទោសជនជាប់ចោទ អាយុ២៨ឆ្នាំម្នាក់ ឲ្យជាប់ពន្ធនាគារចំនួន ៤ឆ្នាំកន្លះ ពីបទ​ធ្វើ​ទារុណកម្ម និង​ភាព​ខ្ជីខ្ជា ក្នុងការចិញ្ចឹមកូន។

ក្រោយមូលហេតុថា បុរសជនជាប់ចោទ ចង់ធ្វើការ«ពិន័យ» និងប្រៀនប្រដៅ​កូនស្រីខ្លួនឯងនោះ កុមារី ឡេអូនី (Léonie ) ដែលមានអាយុទើបតែបាន ២ឆ្នាំ ត្រូវបានបុរសជាឪពុកចិត្តអាក្រក់ យកចូលទៅក្នុង​បន្ទប់​ទឹក ហើយ​ស្រោច​​ទឹក​ក្ដៅ ដែលមានកំដៅជាង៦០អង្សាសេ ដាក់ពីលើ។

បុរសបានទុកកូន ឲ្យរងភាពខ្លោចផ្សារ ក្រហក់ក្រហាយ រហូតលុះត្រាស្អែកឡើង (រយៈពេល២៨ម៉ោងក្រោយ) ទើបសម្រេចចិត្តនាំកូន ទៅកាន់មន្ទីរពេទ្យ។ តែការខ្វាយខ្វល់ ពីកូនស្រីដ៏តូចរបស់ខ្លួននេះ វាបានកើតឡើង​​ហួស​ពេលទៅហើយ ព្រោះនាងតូចបានស្លាប់ បន្ទាប់ពីទៅដល់មន្ទីរពេទ្យ បានបន្តិច។

តែងតែដាក់​ពិន័យកូនតូចរបស់ខ្លួនដូច្នេះ....

នៅក្នុងសវនាការ ជនជាប់ចោទ បានពន្យល់ថា ខ្លួនតែងបានធ្វើការ«ពិន័យ»កូនខ្លួនឯង ដោយយក​នាង​ទៅ​ងូត​ទឹក ដោយបាញ់ទឹកត្រជាក់ដាក់ (Editor's Note៖ ជាទូទៅ នៅក្នុងជីវភាពប្រចាំថ្ងៃ សម្រាប់ប្រទេសនានា ក្នុង​ទ្វីប​អ៊ឺរ៉ុប គេប្រើទឹកមានកម្ដៅអ៊ុនៗ ដើម្បីយកមកងូតទឹក។ នៅក្នុងលំនៅដ្ឋាននីមួយៗ ចាំបាច់ត្រូវមានទឹកក្ដៅ ដោយ​ម៉ាស៊ីនកម្ដៅ ឬដាំទឹកងូត។ ការងូតទឹកត្រជាក់ អាចនឹងធ្វើឲ្យឈឺ។)។ ជនជាប់ចោទដដែល បាននិយាយ​ទៀត​ថា តែនៅថ្ងៃកើតហេតុ ខ្លួនបានធ្វេសប្រហែស ដោយបើកទឹកក្ដៅជាជំនួសវិញ។

ចំណែកឯស្ត្រីជាភរិយា ដែលជាម្ដាយរបស់នាងតូចរងគ្រោះ ក៏ត្រូវបានតុលាការផ្ដន្ទាទោស ឲ្យជាប់ពន្ធនាគារ ចំនួន១ឆ្នាំដែរ (ព្យួរទោស៨ខែ) ពីបទឃុបឃិត និងមិនយកអាសារ ជនរងគ្រោះ នៅក្នុងខណៈមានអាសន្ន (Editor's Note៖ នៅប្រទេសជាច្រើន ក្នុងទ្វីបអ៊ឺរ៉ុប ការមើលឃើញ ឬដឹងថាមានជនរងគ្រោះ កំពុងត្រូវ​ការ​ជំនួយ ហើយ​បែរ​ជា​ធ្វើ​មិនដឹង និងមិនយកអាសារនោះ នឹងត្រូវមានទោស)៕