ការិយាល័យទទួលបន្ទុក ចុះបញ្ជីជាអន្តរជាតិ ពីការវាយប្រហារពីសំណាក់ត្រីឆ្លាម (International Shark Attack File - ហៅកាត់ ISAF) បានធ្វើការសិក្សា ទៅលើការវាយប្រហារនានា បង្កឡើងដោយត្រីឆ្លាម ក្នុង​ពិភពលោក នាអំឡុងឆ្នាំ២០១៥កន្លងមកនេះ។ ការវាយប្រហារ ត្រូវបានចុះបញ្ជីយ៉ាងហោច ៩៨ដង ដែល​ច្រើន​ជាង​ការ​វាយ​ប្រហារ ក្នុងឆ្នាំ២០១៤ ដល់ទៅ២៦ដង។ នៅក្នុងចំណោម ការវាយប្រហារ ទាំង៩៨ករណីនោះ មាន៖

- ៤៩% ជាការវាយប្រហារ ទៅលើអ្នកជ្រមុជទឹក
- មានមនុស្ស ៥៨ នាក់បានរងរបួស និងម្នាក់ស្លាប់ នៅសហរដ្ឋអាមេរិក។ ការវាយប្រហារចំនួន ១៨ដង បាន​កើតឡើង នៅប្រទេសអូស្ត្រាលី និង ៨ដង នៅប្រទេសអាហ្វ្រិកខាងត្បូង។ បើនិយាយសរុបទាំងអស់ មាន​មនុស្ស​៦នាក់ បានស្លាប់ ក្រោមការវាយប្រហារ របស់ត្រីឆ្លាម។

បើតាមរបាយការណ៍ របស់ទូរទស្សន៍អាមេរិក «CNN» បានឲ្យដឹងថា តួលេខខាងលើនេះ បានធ្វើឲ្យគេជឿ ថា​ត្រី​ឆ្លាមកាន់តែមានសាហាវខ្លាំងឡើង ហើយបានប្រាប់ឲ្យមនុស្ស ត្រូវតែប្រុងប្រយ័ត្នកាន់តែខ្លាំងឡើង។  បើ​ប្រៀប​ធៀប​ទៅនឹងតួលេខ តាំងពីរាប់សិបឆ្នាំមកនោះ ធ្វើឲ្យគេដឹងដែរថា តួលេខគ្រោះថ្នាក់ នាឆ្នាំ២០១៥នេះ បាន​កើន​ឡើង បណ្ដាលមកពីចំនួនអ្នកមុជទឹកសមុទ្រ នៅតាមស្ថានីយលំហែកាយ មានចំនួនកាន់តែច្រើន។

ការវាយប្រហារមានចំនួន កាន់តែច្រើនឡើង បើធៀបទៅនឹងឆ្នាំ២០១៤ ត្រូវបានពន្យល់បន្ថែមថា បណ្ដាល​មក​ពីការឡើងកម្ដៅ នៅក្នុងអាកាសធាតុ។ គួររបញ្ជាក់ថា ត្រីឆ្លាមបានធ្វើបម្លាស់ទី ជាច្រើនដង នៅក្នុងមួយឆ្នាំៗ ជា​ពិសេស​ចូល​ចិត្ត ទៅរកតំបន់ណា ដែលមានទឹកក្ដៅ។

វិធានការមួយចំនួន នៅពេលជួបគ្រោះ...

ដោយសារ ការកើនឡើង នៃចំនួនប្រជាជន​ក្នុងពិភពលោក និងកម្មវិធីជាច្រើន ដែលចង់ឲ្យមាន ការ​ការពារ​ត្រី​ឆ្លាម​នោះ ចំនួននៃការវាយប្រហារ របស់សត្វត្រីដ៏សាហាវនេះ នឹងត្រូវកើនឡើងទៀត នៅក្នុងឆ្នាំ​ខាង​មុខ​នេះ។

ហើយដើម្បីបញ្ជៀស នូវគ្រោះថ្នាក់ជាមួយត្រីឆ្លាម គេគប្បីគោរពតាមបម្រាមមួយចំនួន ដូចជា កុំហែលទឹក នៅ​ពេល​ព្រឹកព្រហាម ឬនៅពេលព្រះអាទិត្យលិច - កុំហែលទឹក នៅក្នុងតំបន់ ដែលសម្បូរដោយអ្នកនេសាទត្រី និង​សម្បូរដោយសត្វស្លាបសមុទ្រ មករកចំណីរបស់ពួកវា - នៅពេលមុជទឹក គប្បីដោះគ្រឿងអលង្កា ដ៏ភ្លឺ​រលោង​ចែង​ចាំង​ចេញ។ នៅពេលជួបគ្រោះ ដោយការវាយប្រហារ របស់ត្រីឆ្លាម ចូរព្យាយាមវាយច្រមុះរបស់វា (បើអាច ចូរប្រើ​វត្ថុរឹងវាយ) ឲ្យខ្លាំង - ប្រើដៃចាប់បោចស្រកី ឬរុកភ្នែករបស់វា៕