ហេតុការណ៍ចាប់រំលោភ ដ៏ឃោឃៅបានកើតជាថ្មីទៀត នៅក្នុងប្រទេសឥណ្ឌា។ យុវតីជំទង់មួយរូប ដែល​រង​នូវការចាប់ពង្រត់ ពីសំណាក់ជនឃោឃៅមួយក្រុម អស់រយៈពេល២សប្ដាហ៍នោះ បានរៀបរាប់ ពីសភាព​រង​គ្រោះ​របស់នាង នៅតាមកញ្ចក់ទូរទស្សន៍ អះអាងថារូបនាង ត្រូវបានចាប់រំលោភ ជាច្រើនដង និងរងនូវការ​បាញ់​ឲ្យរបួស មុននឹងត្រូវបានបោះចូល ទៅក្នុងអណ្ដូងទឹកមួយ នៅក្នុងតំបន់ជាយក្រុង នៃរដ្ឋធានី ញ៉ូដេល្លី (New Delhi)។

យុវតីរងគ្រោះ ដែលមានអាយុទើបតែ១៤ឆ្នាំ បានផ្ដល់កិច្ចសម្ភាស ទៅឲ្យទូរទស្សន៍ «NDTV» ដោយមិន​បញ្ចេញ​អត្តសញ្ញាណ ថានាងតូចត្រូវបានចាប់ពង្រត់ នៅថ្ងៃទី២២ ខែវិច្ឆិកាកន្លងទៅ នៅខណៈនាងដើរ​ទៅ​ផ្សារ ភាគខាងលិចនៃរដ្ឋធានី។ នាងត្រូវបានក្រុមជនទាំនោះ យកទៅដាក់ឃុំ នៅក្នុងបន្ទប់ងងឹតមួយ អស់​រយៈពេល២សប្ដាហ៍ ដើម្បីទុកធ្វើជា«ចំណីតណ្ហា» ជាច្រើនដងរបស់ពួកគេ ដែលមានសមាជិក៣នាក់។

នាងបានថ្លែងឡើងថា៖ «បន្ទាប់ពីពួកគេបានរំលោភខ្ញុំ ជាច្រើនដងក្នុងរយៈពេល១៥ថ្ងៃហើយនោះ ពួកគេ​បាន​និយាយប្រាប់ខ្ញុំ នៅយប់មួយថា ពួកគេយល់ព្រមដោះលែងខ្ញុំ។ ពួកគេបានរុញខ្ញុំ ចូលក្នុងរថយន្ដ ហើយ​បានបើកចេញទៅ រហូតដល់មុខហាងមួយ ដែលមានលក់ស្រា ទើបពួកគេ បានចូលទៅចតរថយន្ដ នៅក្បែរ​នោះ ដែលមានអណ្ដូងមួយ។»

«ពួកគេនិយាយថា ពួកគេនឹងឲ្យខ្ញុំរួចខ្លួន។ តែនៅពេលខ្ញុំដើរចេញទៅ ពួកគេបានបាញ់ខ្ញុំពីរដង។ ម្ដងដំបូង​បានចំឆ្អឹង តែខ្ញុំអត់ដឹងថាគេបាញ់ទេ ព្រោះមានអារម្មណ៍ដូចត្រូវគេសណ្ដុំ។ ទាល់តែគ្រាប់លើកទីពីរ ទើប​ខ្ញុំ​មានអារម្មណ៍ងងឹតមុខ។»

យុវ​តីជំទង់បាននិយាយទៀតថា នាងបានភ្ញាក់ដឹងខ្លួនឡើង នៅក្នុងអណ្ដូងទឹក ទីកន្លែងដែលនាង ត្រូវបាន​ច្រានទម្លាក់ ដើម្បីទុកឲ្យស្លាប់នៅក្នុងនោះ។ ដោយមានអមនឹងរូបភាព ពីរបួសរបស់នាងនៅពេលនោះផង ស្ត្រីរងគ្រោះអាយុ១៤ឆ្នាំ បានរៀបរាប់បន្តថា៖ «នៅពេលដែលខ្ញុំដឹងខ្លួន (...) ខ្ញុំបានស្ទាបដើមទ្រូង ដឹងថា​មាន​គ្រាប់កាំភ្លើងនៅជាប់នៅទីនោះ ហើយខ្ញុំបានយកដៃ ខ្វេះវាចេញមក»។

នាងត្រូវបានបណ្ដាជន ជួយស្រង់ពីក្នុងអណ្ដូង ហើយបញ្ជូនទៅកាន់មន្ទីរពេទ្យ នៅថ្ងៃទី៦ ខែធ្នូកន្លងទៅ។ សារព័ត៌មាន​ក្នុងស្រុក បានអះអាងថា ជនសង្ស័យជាច្រើន ត្រូវបានឃាត់ខ្លួន នៅក្នុងសំនុំរឿងនេះ។ យុវតី​បានថ្លែងទាមទារថា៖ «ខ្ញុំចង់ឲ្យមានការព្យួរក ដល់ជនដែលចាប់រំលោភខ្ញុំ។ មិនគួរមាននរណាម្នាក់ផ្សេង ត្រូវរងគ្រោះ ដូចអ្វីដែលខ្ញុំបានឆ្លងកាត់នោះទេ។»

នេះជាសំនុំរឿងមួយបន្ថែមទៀត នៅក្នុងបញ្ជីដ៏វែងអន្លាយ នៃសំនុំរឿងចាប់រំលោភ សេពសន្ធវៈ នៅក្នុង​ប្រទេស​ឥណ្ឌា។ សំនុំរឿងដ៏ធំមួយ ដែលបានអង្រួនពិភពលោកទាំងមូល ក្នុងពេលកន្លងមក បានកើត​ឡើង​នៅយប់មួយ ក្នុងឆ្នាំ២០១២ ទៅលើនិស្សិតស្រីមួយរូប ដែលត្រូវបានមនុស្សច្រើននាក់ចាប់រំលោភ (រំលោភ​បូក - EDTN) នៅក្នុងរថយន្ដក្រុង ចំពោះបុរសជាសង្សារបស់នាង មុននឹងរូបនាង និងសង្សា ត្រូវ​បាន​ក្រុម​ជន​ល្មើស​បោះចោល ទៅលើផ្លូវថ្នល់។

សំនុំរឿងចាប់រំលោភជាច្រើននោះ បានជំរុញឲ្យប្រទេសនេះ ធ្វើការរឹតបន្តឹង នៅក្នុងប្រព័ន្ធច្បាប់របស់ខ្លួន ដោយ​ធ្វើការដាក់ទោសទណ្ឌ ឲ្យខ្លាំងក្លាជាមុន ទៅលើជនល្មើស។ ប៉ុន្តែទោះជាវិធានការជាច្រើន ត្រូវបាន​យកមកអនុវត្តក៏ដោយ ក៏ចំនួននៃការចាប់រំលោភ ផ្នែកផ្លូវភេទ នៅក្នុងប្រទេស នៅតែមានចំនួនច្រើន​នៅ​ឡើយ៕

---------------

» វីដេអូពីបទយកការណ៍ ទាក់ទងនឹងសំនុំរឿងខាងលើ របស់ទូរទស្សន៍ «NDTV»៖