វគ្គទី៧ដែលមានចំណងជើង «The Force Awakens (កម្លាំងងើបឡើង)» នៃខ្សែភាពយន្ដ «Star Wars» រក​បានចំណូល២៨៦,៨លានដុល្លា នៅក្នុងចុងសប្ដាហ៍ចុងក្រោយ (ជាចុងសប្ដាហ៍ទីពីរ បើរាប់​ពីថ្ងៃ​ដែល​ភាពយន្ដ ត្រូវបានចេញបញ្ចាំង) ដែលធ្វើឲ្យចំណូលសរុប បានកើនឡើងដល់ទៅជាង ១កោដដុល្លារ សម្រាប់​​រយៈពេលតែ១២ថ្ងៃដំបូងប៉ុណ្ណោះ។ ជាចំណូលដ៏អស្ចារ្យ ដែលបានបំបែកឯកត្តកម្ម នៃចំណូល​ផ្នែក​​ភាពយន្ដ របស់ផលិតកម្មនានានៅហូលីវូដ។ នេះបើតាមសេចក្ដីប្រកាសព័ត៌មាន របស់ផលិតកម្មឌីស្នេ ចេញ​ផ្សាយ​នៅ​យប់​ថ្ងៃអាទិត្យ។

សេចក្ដីប្រកាសព័ត៌មាន បានលំអិតពីចំណូលនោះ ថាមានចំនួន៥៤៥លានដុល្លា ទទួលបានពីទ្វីប​អាមេរិក​ខាងជើង និងចំនួន៥៤៦លានដុល្លារ ពីជុំវិញពិភពលោក (លើកលែងប្រទេសមួយចំនួន ដែលនៅមិន​ទាន់​ចេញបញ្ចាំង)។ នៅក្នុងប្រទេសក្រិច និងឥណ្ឌា ភាពយន្ដនេះទើបនឹងចេញបញ្ចាំង នៅចុងសប្ដាហ៍កន្លង​មក​ប៉ុណ្ណោះ ខណៈក្នុងប្រទេសចិន ទស្សនិកជនត្រូវរងចាំការចេញបញ្ចាំង របស់ភាពយន្ដនេះ រហូតដល់​ថ្ងៃទី៩ ខែ​មករា ឆ្នាំ២០១៦។

ប្រសិនជាចំណូល នៅតែបន្តចូលយ៉ាងខ្លាំង ប្រៀបបាននឹងទឹកបាក់ទំនប់បែបនេះ ភាពយន្ដ «Star Wars» វគ្គទី៧នេះ នឹងអាចឈានទៅបំបាក់ខ្ទង់ចំណូល ដ៏មហាសាល នៃភាពយន្ដដ៏ល្បីទាំងពីរ របស់កំពូល​សមិទ្ធិករ ជេម កាមេរូន (James Cameron) គឺរឿង «Avatar» ដែលរកបានចំណូល ២,៧៩កោដដុល្លារ និង​រឿង «Titanic» ដែលរក​ចំណូល​បាន ២,១៩កោដដុល្លារ។

ផលិតកម្មឌីស្នេ ដែលបានទិញផលិតកម្ម «Lucasfilm» ពីផលិតករលោក ជ័ក លូកាស (George Lucas) ក្នុងតម្លៃ៤កោដដុល្លារ នៅឆ្នាំ២០១២នោះ ត្រូវបានគេមើលឃើញថា កំពុងទទួលបានផ្លៃផ្កា យ៉ាងត្រចះ​ត្រចង់ ពីការវិនិយោគទុននេះ។ ហើយភាពជោគជ័យនេះ នៅមានបន្តទៀត ព្រោះផលិតកម្មឌីស្នេ កំពុង​មាន​គម្រោង​ផលិតភាពយន្ដចំនួន៣ទៀត ដែលសុទ្ធតែដកស្រង់ ពីគំនិតដើមរបស់ផលិតកម្ម «Lucasfilm»។

សូមបញ្ជាក់ដែរថា ចំណូលខាងលើ គ្រាន់តែជាការលក់សំបុត្រ ចូលទស្សនាភាពយន្ដប៉ុណ្ណោះ ប៉ុន្តែ​គេនៅ​មិនទាន់បានរាប់បញ្ចូល នូវការលក់ជាសម្ភារៈ ខោអាវ ល្បែងលេង... ដែលដកស្រង់ពីភាពយន្ដនេះ​ផង​ទេ៕