ត្រីបាឡែនមួយមានបណ្ដោយប្រវែង១៨ម៉ែត្រ ត្រូវបានគេរកឃើញ«ស្លាប់» នៅថ្ងៃសុក្រទី២៥នេះ នៅលើឆ្នេរសមុទ្រ​នៃអូឡូន (Sables-d'Olonne តំបន់វ៉ង់ដេ Vendée) ក្នុងប្រទេសបារាំង។

ត្រីបាឡែន ដែលមានទំហំបណ្ដោយប្រមាណជា១៨ម៉ែត្រ។

ត្រីបាឡែននេះ ដែលក្រុមអ្នកជួយសង្គ្រោះថាជាប្រភេទត្រីរ៉ូក្វល់ (rorqual) នោះ បានមកជាប់គាំងខ្លួន នៅលើឆ្នេរខ្សាច់​មួយដែលមានឈ្មោះថា «ដេ ប្រេស៊ីដង់ (des Présidents)» ស្ថិតនៅផ្នែកចុងម្ខាង នៃភូមិដ៏តូចមួយ ដែលនឹងត្រូវទទួល​អ្នកប្រកួតផ្ដាច់ព្រ័ត នៃកីឡាទូកក្ដោងតាមសមុទ្រប្រចាំឆ្នាំ២០១២ (Vendée Globe 2012) ក្នុងប៉ុន្មានថ្ងៃខាងមុខ។

តាំងពីព្រឹកព្រហាមមកម្លេះ ក្រុមអ្នកជួយសង្គ្រោះ ភ្នាក់ងារនគរបាល និងតំណាងពីខាងសាលាឃុំ បានមកដល់ទីកន្លែង​កើតហេតុ ដើម្បីពិនិត្យមើលត្រី ដ៏ធំសម្បើមនេះ។ អាជ្ញាធរប្រចាំតំបន់នោះ បានពន្យល់ថា គេបានហ៊ំព័ទ្ធដើម្បីជា​សុវត្ថិភាព និងការពារកុំអោយមនុស្សនៅតាមផ្លូវ ឬអ្នកចង់ដឹងចង់ឃើញផ្សេងទៀត មកប៉ះពាល់និងចម្លងមេរោគ អោយដល់សត្វត្រីកំសត់នេះ។

មជ្ឈមណ្ឌលស្រាវជ្រាវ សត្វសមុទ្រនៅទីក្រុងឡា រ៉ូឆែល (La Rochelle) ត្រូវបានគេហៅអោយមកធ្វើការសិក្សាវិភាគ ទៅលើត្រីបាឡែន ដើម្បីយល់ពីមូលហេតុដែលឈានទៅដល់ ការជាប់គាំងខ្លួនបែបនេះ។ ការសន្និដ្ឋានជាជំហានដំបូង បានអោយដឹងថា ត្រីបាឡែន ទំនងជាបានស្លាប់ មុននឹងមកជាប់គាំងនៅលើគោក៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី២៦ ខែមករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ