តើសមាជិកក្រុមស្ម័គ្រប្រយុទ្ធ ដើម្បីព្រះជាម្ចាស់ ឬជីហាដ (djihad) អាចចាប់ស្ត្រីរំលោភ យ៉ាងដូចម្ដេច និង​នៅពេលណា? ដើម្បីរកចម្លើយនេះឃើញ គេត្រូវចូលទៅអានអត្ថបទ នៅក្នុងឯកសារដ៏ពិសេស របស់​ក្រុម​រដ្ឋអ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​ហៅ EI ពាក្យកាត់​អង់គ្លេស​​ហៅ ISIS) ដែល​ត្រូវ​បាន​រឹប​អូស​បាន ដោយកងកម្លាំងអាមេរិក នៅក្នុងប្រតិបត្តិការវាយសន្ធាប់មួយ ទៅលើមូលដ្ឋានរបស់ក្រុមនេះ ស្ថិត​ក្នុង​ប្រទេស​ស៊ីរី។

ឯកសារពិសេស ដែលត្រូវបានទីភ្នាក់ងារសារព័ត៌មាន រ៉យទ័រ (Reuters) យកមកធ្វើសេចក្ដី​រាយការណ៍​លំអិត​នោះ រៀបរៀងឡើងដោយ គណៈកម្មការស្រាវជ្រាវ និងអំពីក្បួន ហ្វាវ៉ា (Fatwa = ក្បួនច្បាប់​ដ៏​កម្រ​មួយ របស់​សាសនា​អ៊ីស្លាម) របស់ក្រុមភេរវជន។ ហើយដោយឈរលើមូលដ្ឋាន នៃក្បួន ហ្វាវ៉ា នេះហើយ ទើប​ក្រុម​រដ្ឋ​អ៊ីស្លាម ដាក់ចេញនូវរបៀបរបប ប្រមាណជា១៥បែប ដើម្បីចាប់ស្ត្រីដែលជាទាសី មក​ធ្វើការ​រំលោភ។

របៀបរបបនេះ មានសរសេរដូចយ៉ាង៖ «បើម្ចាស់ទាសី របស់ស្ត្រីចំណាប់ខ្មាំងម្នាក់ បានរួមភេទជាមួយ​កូន​ស្រី​គ្រប់​ការ របស់ស្ត្រីម្នាក់នោះ ម្ចាស់ទាសីនោះ នឹងលែងមានសិទ្ធប៉ះពាល់ ឬរំលោភលើខ្លួនប្រាណស្ត្រី ជា​ម្ដាយ​នោះ​ទៀតហើយ» ដែលបានសេចក្ដីថា ម្ចាស់ទាសីមិនអាចធ្វើការរួមរ័ក្ស ជាមួយម្ដាយផង និងជា​មួយ​កូនស្រី​ផង​បាន​ឡើយ។

ឯកសារបានបញ្ជាក់បន្ថែម ពីការហាមឃាត់មួយចំនួន ដូចជាបម្រាម មិនឲ្យធ្វើការរំលោភ លើបងប្អូន​ទាសី​ស្រី ក្នុងពេលតែមួយ និងបម្រាមមិនឲ្យ​បញ្ជូន​ខ្លួនទាសី ទៅឲ្យសាច់ញាតិផ្សេងទៀត​ជាដើម។

ចាប់រំលោភតាមរន្ធគូទ មិនបរិសុទ្ធ...

របៀបរបបក្បួនខ្នាត បានធ្វើការហាមឃាត់ ជាកំហិតនូវការរួមរ័ក្សតាមរន្ធគូទ ដែលត្រូវបានវាយតម្លៃថា «មិន​បរិសុទ្ធ»។ រីឯកូនដែលកើតចេញ ដោយការរំលោភ ត្រូវតែរក្សាទុក និងត្រូវដោះលែង នៅពេល​ម្ចាស់​ទាសី​ស្លាប់។ ម្ចាស់ទាសី ដែលជាសមាជិករបស់ក្រុមរដ្ឋអ៊ីស្លាម មិនអាចលក់ទាសីរបស់ខ្លួន ទៅឲ្យ​នរណា​ផ្សេង ដែល​អាច​នឹង​ធ្វើ​ទុក្ខ​បុក​ម្នេញ លើពួកនាងបានឡើយ។ ​ឯកសារបានសរសេរថា៖ «ម្ចាស់ទាសី ត្រូវ​មាន​ចិត្ត​ករុណា​ធម៌ ចំពោះ​ភរិយា​ទាសី​របស់​ខ្លួន ដោយមិនត្រូវជេរផ្ដាសារ ឬបង្ខំឲ្យធ្វើការអ្វីមួយ ដែល​នាង​គ្មាន​សមត្ថភាព នឹង​​ធ្វើ​​នោះ​ឡើយ»។

ឯកសារជាច្រើនផ្សេងទៀត ដែលត្រូវបានរឹបអូសបាន នាពេលកន្លងមក ក៏បានអះអាងដែរថា ក្រុម​រដ្ឋ​អ៊ីស្លាម​បាន​ចាប់ស្ត្រីជាច្រើនរយពាន់នាក់ ជាចំណាប់ខ្មាំង ដើម្បីទុកធ្វើជាទាសី និងរំលោភ។ ស្ត្រី​មួយ​ចំនួន ដែល​បាន​រត់​គេច​ខ្លួន​ផុត ពីក្រញ៉ាំរបស់សមាជិក នៃក្រុមភេរវជនទាំងនេះ បានរៀបរាប់សឹងតែ​ប្រហាក់​ប្រហែល​គ្នា ពី​បែបផែន​ជា​ប្រព័ន្ធ ឬពីស្ថាននរកអវិចិ ដែលពួកខ្លួន មានទាំងម្ដាយ ទាំងកូនស្រី ត្រូវបានក្រុម​នេះ​ចាប់​យក​ទៅ​ឃុំទុក ដើម្បី​បម្រើ​កាមគុណ។ ពួកនាងមួយចំនួនទៀត ត្រូវបានក្រុមរដ្ឋអ៊ីស្លាម លក់ដូរ​បន្ត​ពី​មួយ​ទៅ​មួយ ដោយ​មាន​តម្លៃ​ខ្លួន ត្រឹមតែបារីមួយកញ្ចប់ប៉ុណ្ណោះ។

សូមជម្រា​បជូនដែរថា ​ឯកសារខាងលើនេះ ត្រូវបានរឹបអូសយក កាលពីក្នុងការវាយប្រហារ របស់​កងទ័ព​អាមេរិក នា​ខែឧសភាកន្លងទៅ។ នៅក្នុងការវាយប្រហារនោះ អ្នកទទួលខុសត្រូវ ផ្នែកហិរញ្ញវត្ថុមួយរូប របស់​ក្រុម​រដ្ឋ​អ៊ីស្លាម និងរបស់ក្រុម អាប៊ូសាយ៉ាហ្វ (Abu Sayyaf = ក្រុមអ៊ីស្លាមនិយមជ្រុលមួយ នៅភាគ​ខាង​ត្បូង​ប្រទេស​ហ្វីលីពីន) ត្រូវបានសម្លាប់ ហើយស្ត្រីជាទាសីម្នាក់ ត្រូវបានដោះលែង៕