«យើងពិតជាបានស្ដាប់ឮ នូវការចង់បានរបស់លោកអ្នក» នេះជាចម្លើយខ្លី តែមានន័យវែង របស់អគ្គនាយក​ស្ថាបនិក របស់ក្រុមហ៊ុន ហ្វេសប៊ុក លោក ម៉ាក ហ្សូគ័រប៊ែរ (Mark Zuckerberg) នៅក្នុង​វេទិកាសំណួរ​និង​ចម្លើយ រៀបចំធ្វើជាសាធារណៈ ពីឧទ្យាន«Menlo Park» នៃសង្កាត់«Silicon Valley» ក្នុង​រដ្ឋ​កាលីហ្វ័រនី សហរដ្ឋ​អាមេរិក។

អ្នកប្រើប្រាស់បណ្ដាញសង្គមមួយរូប បានសួរទៅកាន់លោកនាយកវ័យក្មេង របស់ហ្វេសប៊ុក ថាហេតុអ្វី​បាន​ជាគ្មានប៊ូតុង «ខ្ញុំសោកស្ដាយ» «គួរឲ្យចាប់អារម្មណ៍» ឬ«មិនចូលចិត្ត» បន្ថែមពីលើប៊ូតុង «ចូលចិត្ត» ដែល​ជាផ្នែកមួយ នៃអត្តសញ្ញាណរបស់ហ្វេសប៊ុក ដើម្បីអាចឲ្យគេបញ្ចេញយោបល់ យ៉ាងឆាប់បំផុត ទៅលើ​ការ​ចុះផ្សាយអ្វីមួយ នៅលើបណ្ដាញសង្គម?

តបនឹងសំនួរនេះ លោក ម៉ាក ហ្សូគ័រប៊ែរ បានថ្លែងឡើងថា៖ «មនុស្សជាច្រើន បានស្នើសុំបង្កើតប៊ូុង "មិន​ចូលចិត្ត" តាំងពីច្រើនឆ្នាំមកហើយ។ ប៉ុន្តែថ្ងៃនេះ ជាថ្ងៃដ៏ពិសេស ព្រោះជាថ្ងៃដែលខ្ញុំអាចនិយាយថា យើង​កំពុងធ្វើការនេះ ហើយនឹងឈានទៅដាក់ ឲ្យចាប់ផ្ដើមសាកល្បង។»

មេហ្វេសប៊ុកវ័យក្មេង បាននិយាយបន្តថា៖ «យើងគ្រាន់តែមិនចង់ បង្កើតប៊ូតុង"មិនចូលចិត្ត"នេះ ចេញ​មក​ភ្លាមៗ ព្រោះយើងមិនចង់ឲ្យហ្វេសប៊ុក ក្លាយជាវេទិកាមួយ ដែលមនុស្សម្នា អាចបោះឆ្នោត ស្របឬប្រឆាំង ទាក់ទងនឹងការចុះផ្សាយណាមួយ នោះឡើយ»។

លោក ម៉ាក បានថ្លែងឲ្យតម្លៃទៀតថា អ្នកប្រើប្រាស់ជាច្រើន ចង់បកស្រាយ ពីអារម្មណ៍«មិនស្រួល»​របស់​ពួកគេ នៅពេលដែលពួកគេចុច «ចូលចិត្ត» ទៅលើហេតុភេទអ្វីមួយ ដែលមានលក្ខណៈរន្ធត់ ខ្លោចផ្សារ។ល។ ដូចជាបុណ្យសព ឬដំណឹងស្ដីពីគ្រោះវិបត្តិ នៃជនភៀសខ្លួនជាដើម។ តែនាយកបណ្ដាញសង្គម បាន​បង្ហាញនូវពន្លឺថ្មីមួយថា៖ «តែយើងបានរកឃើញ យោបល់ថ្មីមួយ ដែលនឹងដាក់ឲ្យសាកល្បង ក្នុងពេល​ដ៏ខ្លីខាងមុខនេះ ហើយនៅពេល​ដែលយើងទទួលបាន ថាមានដំណើរការ​យ៉ាងដូចម្ដេចរួច យើងនឹងដាក់វា ឲ្យដើរជាផ្លូវការ ឲ្យបានទូលំទូលាយ»៕