បើផឹក ត្រូវផឹកឲ្យគេសែង ផឹកដើរខ្លួនឯង ផឹកធ្វើអី! តែនេះមិនមែននរណាផ្សេង មកសែងទេ ព្រោះជាកង​កម្លាំង​នគរបាល មកនាំខ្លួនចេញពីយន្ដហោះ។ ក្រុមហ៊ុនអាកាសចរណ៍ «JetBlue» បានអះអាង នៅក្នុងសេចក្ដី​ប្រកាស​ព័ត៌មានមួយថា៖ «អាជ្ញាធរក្នុងស្រុក បានចូលទៅក្នុងយន្ដហោះ ដែលភ្ជាប់ជើងហោះហើរលេខ ៤៥ មក​ពីក្រុង "Anchorage" ក្នុងរដ្ឋអាឡាស្កា ហើយបានមកចុះចត នៅក្នុងព័រឡេន (Portland) នាព្រឹកនេះ បន្ទាប់​ពីមានហេតុការណ៍មួយ បង្កឡើងដោយអ្នកដំណើរស្រវឹងម្នាក់»។

អ្នកដំណើរស្រវឹងធ្លាក់ភ្នែកនោះនោះ ជាយុវជនម្នាក់អាយុ២៦ឆ្នាំ ហើយត្រូវបានអាជ្ញាធរ ក្រុង ព័រឡេន ចាប់​ឃុំ​ខ្លួនជាច្រើនម៉ោង មុននឹងដោះលែងមកវិញ។ ប៉ុន្តែយុវជននេះ បានទទួលដីកាកោះហៅមួយ ជាស្រេច​ហើយ ពីសំណាក់តុលាការ ទាក់ទងនឹងទង្វើរបស់ខ្លួន នៅលើយន្ដហោះ។

ក្រុមបុគ្គលិកបម្រើការនិងអ្នកដំណើរ លើយន្ដហោះបាននិយាយថា យុវជននេះ បានដេកលក់រហូត នៅអំឡុង​ពេលហោះហើរ។ ប៉ុន្តែនៅមុនការចុះចតបន្តិច យុវជនបានភ្ញាក់ឡើង រួចងើបឈរ ធ្វើការបន្ធូរ«ឥរិយាបថ» របស់ខ្លួន ទៅលើមនុស្សនៅជុំវិញ។

របាយការណ៍របស់នគរបាល បានរៀបរាប់ឲ្យដឹងដែរថា៖ «នៅប្រមាណជា ៣០នាទីមុនការចុះចត របស់​យន្ដហោះ យុវជនបានងើបឡើង ហើយចាប់ផ្ដើមបាញ់នោម នៅចន្លោះកៅអីអង្គុយខាងមុខខ្លួន ទៅលើ​អ្នក​ដំណើរផ្សេងទៀត»។ របាយការណ៍បានសរសេរទៀតថា៖ «នៅពេលមួយនោះ យុវជនបានទប់ខ្លួនមិនបាន ក៏ដួលទៅក្រោយ ដោយបាញ់រះទឹកនោមខ្លួន ដាក់អ្នកដំណើរ ដែលនៅអង្គុយនៅជិតខ្លួន អ្នកដំណើរផ្សេង​ទៀត និងបុគ្គលិកបម្រើការ ដែលចូលមកអន្តរាគមន៍»៕