លោក ឈឿន ខេងយូ ជាម្ចាស់ផ្ទះ លេខ២៥ តាមបណ្តោយផ្លូវមុន្នីរ៉េត ក្នុងភូមិទី១ សង្កាត់ស្ទឹងមានជ័យ ខណ្ឌ​មានជ័យ រាជធានីភ្នំពេញ បានឲ្យដឹងថា គ្រួសាររបស់លោក កំពុងតែធ្វើគម្របលូ មានបញ្ហានេះ នៅមិនទាន់​រួច​រាល់​ទេ ស្រាប់តែភាគីគ្រួសារម្ខាងទៀត មករករឿង មាត់ធំមាត់តូច ដាក់គ្រួសារលោក ឈានដល់ប្រើ​អំពើ​ហិង្សា ដាក់កូនស្រីលោកទៀតផង។ កញ្ញា ឈឿន សៀកលីន ជាកូនស្រី បានប្រាប់ទស្សនាវដ្ដី​មនោរម្យ.​អាំងហ្វូ​ថា មិនមែនទើបតែលើកនេះទេ ជម្លោះធ្លាប់មានពីមុន ម្តងរួចមកហើយ។

កញ្ញាបន្ថែមទៀតថា ភាគីខាងលោក ទូច ឡេង (អ្នកនៅជាប់ផ្ទះគ្នា) ធ្លាប់ចោទប្រកាន់ ក្រុមគ្រួសារកញ្ញា​ម្តង​រួចមកហើយ។ កាលណោះ ថែមទាំងបាននាំអ្នកកាសែត (មិនចាំថា អ្នកកាសែតខាងណាទេ) មកគម្រាម​ទៀត​ផង។ កញ្ញាបន្តថា៖ «លើកនេះ បានទាំងប្រើសម្តី និងកាយវិការខ្លាំងៗ ដាក់ប៉ា និងកញ្ញាទៀត ទោះជា​ដឹង​ថា ព្រំដីកន្លែងលូនេះ មិនទាន់ធ្វើរួចរាល់ក៏ដោយ»។

ការឈ្លោះទាស់ទែងគ្នា ព្រោះរឿងលូមុខផ្ទះ ដែលមានសភាព មិនស្មើគ្នា មិនដល់មួយចំអាមនេះ មិនបាន​ធ្វើ​ឲ្យ ភាគីទាំងសងខាង ស្ងប់ស្ងៀម ឬឈានទៅដល់ ការសម្របសម្រួលគ្នា ភ្លាមៗនោះឡើយ។

ភាគីលោក ទូច ឡេង ម្ចាស់ឱសថស្ថាន «ទូច ឡេង» នៅជាប់ផ្ទះភាគីខាងលើ បានប្រាប់ទស្សនាវដ្តី​មនោរម្យ​.អាំងហ្វូខ្លាំងៗថា គាត់មិនសុខចិត្តទេ ព្រោះខាងក្រុមគ្រួសារ ធ្វើគម្របលូ បំពានទៅខាងព្រំដីរបស់គាត់។ ម្យ៉ាង​វិញទៀត ទោះដឹងថា ភាគីផ្ទះលោក មិនសុខចិត្តក៏ដោយ ក៏នៅតែធ្វើទៀត។ លោក ឈឿន ខេងយូ ដែលនៅ​ក្បែរ​នោះ បានឆ្លើយតបភ្លាមៗថា លោកធ្វើ គឺព្រោះចង់ឱ្យមានអនាម័យល្អ មិនមានក្លិនប៉ះពាល់ ដល់ការលក់​ដូរ​ទាំងសងខាង។

ដោយឡែក នៅពេលកំពុងមានទំនាស់ គេឃើញមានមន្រ្តីប៉ុស្តិ៍ស្ទឹងមានជ័យ ចុះទៅដល់ទីតាំងជម្លោះដែរ តែ​មិនមានធ្វើអន្តរាគមន៍អ្វីនោះទេ។ អ្នកសារព័ត៌មាន បានសុំសេចក្តីបំភ្លឺ ពីការដោះស្រាយ របស់ភាគីទាំងសង​ខាង ពីសំណាក់អាជ្ញាធរ ប៉ុន្តែលោក ម៉ៅ សាវឿន មេប៉ុស្តិ៍ស្ទឹងមានជ័យ បានឲ្យដឹងថា កម្លាំងរបស់លោក បាន​ចុះ​ជួយធ្វើការដោះស្រាយ រួចរាល់ហើយ។ តែផ្ទុយទៅវិញ កញ្ញា ឈឿន សៀកលីន បានបញ្ជាក់ថា គ្មានមន្ត្រី​ប៉ុស្តិ៍ ចូលទៅជួយដោះស្រាយនោះទេ គ្រាន់តែដើរអេបខាងៗ ហើយត្រឡប់ទៅវិញ ចំណែកភាគីម្ខាងទៀត បាន​រុញច្រានកញ្ញា នៅលើព្រំដីទំនាស់ទាំងកម្រោល៕