ក្នុងដំណើរការពិនិត្យ និងផ្ទៀងផ្ទាត់ផែនទី នាព្រឹកថ្ងៃទី២០ ខែសីហា ឆ្នាំ២០១៥ នៅទីស្តីការគណរដ្ឋមន្រ្តី លោក ហោ ណាំហុង បានបង្ហាញនូវកំហុសឆ្គងមួយ របស់រាជរដ្ឋាភិបាល ឆ្នាំ១៩៦៤ ដែលជារាជរដ្ឋាភិបាល របស់​ព្រះករុណាព្រះបរមរតនកោដ្ឋ៖ ដីខ្មែរជិត៥០គីឡូម៉ែត្រការ៉េ ត្រូវបានចូលទៅក្នុងទឹកដី នៃប្រទេស​វៀតណាម។

លោក ហោ ណាំហុង បានពន្យល់ថា រដ្ឋាភិបាលរបស់សម្ដេច នរោត្ដម សីហនុ ឆ្នាំ១៩៦៤ បានទទួល​ស្គាល់​​ខ្សែ​ព្រំដែន តាមបន្ទាត់«ដាក់ដាំ» ដែលជាបន្ទាត់ខាងលើ ខណៈរដ្ឋាភិបាលសព្វថ្ងៃ ទទួលស្គាល់ខ្សែ​បន្ទាត់​«ដាក់ហ៊ូត​(?)» ដែលជាបន្ទាត់ខាងក្រោម។ លោកថ្លែងឡើងថា៖ «ម៉ាចន្លោះធំនេះ ជិត៥០គីឡូម៉ែត្រ​ការ៉េ»។

រដ្ឋមន្រ្តីការបរទេសកម្ពុជា បានថ្លែងឡើងថា ទោះយ៉ាងនេះក៏ដោយ រដ្ឋាភិបាលកម្ពុជាបច្ចុប្បន្ន មិន​ព្រម​​អនុវត្ត​តាមផែនទី បោះក្នុងឆ្នាំ១៩៦៤ របស់ព្រះបរមរតនកោដ្ឋនោះទេ ហើយធ្វើការបន្តទាមទារ ហូតមក​ដល់​ពេល​នេះ ដោយយោងផ្អែកលើការសម្រេចរបស់អគ្គទេសាភិបាលបាំង នៅក្រុងហាណូយ ក្នុងឆ្នាំ១៩១៤។

ប្រមុខការទូតកម្ពុជា បានបង្ហាញ នូវការសង្ឃឹមយ៉ាងមុតមាំ ចំពោះលទ្ធផល នៃការផ្ទៀងផ្ទាត់ផែនទី​កម្ពុជា ជា​មួយផែនទីរបស់ UN នេះថា នឹងធ្វើអោយមនុស្សទូទៅ មានការជ្រះស្រឡះចិត្ត។ លោក ហោ ណាំហុង បាន​ថ្លែងឡើងទៀតថា៖ «ការកំណត់ព្រំដែន យើងមិនមែនត្រឹមតែ យកតាមផែនទីមួយមុខទេ យើង​យក​ច្បាប់​អន្តរជាតិ​មកនិយាយទៀត ទោះបីបារាំងបានកំណត់ រួចទៅហើយនោះ។ តែយើងនៅតែប្រើ ច្បាប់​អន្តរជាតិ​ទៀត។»

លោករដ្ឋមន្ត្រីការបរទេស បានថ្លែងទៀតថា៖ «ឃើញ​ថា​អត់​ខុស​គ្នា​សោះ អត់ខុសគ្នាសោះ។ ចង់​ឲ្យ​ជ្រះ​​ស្រឡះ​អ្នកខ្លះ មានការសង្ស័យ និង​ធ្វើ​សកម្មភាព​នានា។ ឲ្យ​ច្បាស់​ ឲ្យ​ភ្លឺ ឲ្យ​ច្បាស់​កន្លែង​ហ្នឹង។»

ឯអ្នកនាំពាក្យគណបក្សប្រជាជនកម្ពុជា លោក សុខ ឥសាន្ត បានបង្ហាញនូវទស្សនថា៖ «ការផ្ទៀតផ្ទាត់​ផែនទី ជាមួយអង្គការសហប្រជាជាតិ គឺដូចគ្នាទាំងស្រុង ជាការត្រឹមត្រូវ។ បញ្ហានេះធ្វើឲ្យប្រជាពលរដ្ឋ​កម្ពុជា កាន់​តែ​យល់ច្បាស់ អំពីការពិតជាក់ស្ដែង។»

សម្រាប់លោក អ៊ូ ច័ន្ទរិទ្ធិ តំណាងគណបក្សសង្គ្រោះជាតិវិញ បានបង្ហាញនូវការទទួលស្វាគមន៍ អង្គការសហ​ប្រជាជាតិ ដែលបានផ្ដល់ផែនទី ដល់រដ្ឋាភិបាលកម្ពុជា។ តែលោកបានសម្ដែង នូវភាពប្រយ័ត្នប្រយ៉ែង ដោយ​មិន​បាន​បង្ហាញពីជំហរថា តើផែនទីនោះយ៉ាងណាទេ។ លោកបញ្ជាក់ថា៖ «ថ្នាក់ដឹកនាំគណបក្សសង្គ្រោះ​ជាតិ នឹង​ធ្វើការ​ពិភាក្សាគ្នា ដើម្បីប្រកាសជំហររបស់ខ្លួន នៅពេលក្រោយ។»៕