តាមការគ្រោងទុក ផែនទីទាំង១៨ ផ្ទាំង មកពីអង្គការសហប្រជាជាតិ នឹងប្រគល់ដល់ភាកីកម្ពុជា នាព្រឹកថ្ងៃ​ទី២០ ខែសីហានេះ វេលាម៉ោង៩ និង៣០នាទី។ ការចូលរួមទទួល និងពិនិត្យលើផែនទី ដែលបានមកពី​អង្គការ​សហ​ប្រជាជាតិនេះ រួមមាន៨ភាគីដែលនឹងត្រូវមានវត្តមាន។

សមាសភាពទាំងនោះ រួមមានគណៈកម្មការចំពោះកិច្ច សម្រាប់សម្របសម្រួលការងារទទួល ប្រគល់ និង​ផ្ទៀងផ្ទាត់ផែនទីចំនួន៧រូប តំណាងគណបក្សប្រជាជនកម្ពុជា ចំនួនមាន៥រូប តំណាងគណបក្សសង្គ្រោះ​ជាតិ ចំនួន៥រូប តំណាងគណបក្សហ្វ៊ុនស៊ិនប៉ិច៥រូប តំណាងសមាជិកព្រឹទ្ធសភា គណបក្សប្រជាជនចំនួន៣រូប តំណាងសមាជិកព្រឹទ្ធសភាគណបក្ស សម រង្ស៊ី ចំនួន៣រូប តំណាងសមាជិករដ្ឋសភា គណបក្ស​ប្រជាជន​កម្ពុជា​ចំនួន៣រូប និងតំណាងសមាជិករដ្ឋសភាគណបក្សសង្រ្គោះជាតិ ចំនួន៣រូប។

សូមរំលឹកថា កាលពីថ្ងៃទី១៨ ខែសីហា វេលាម៉ោង១០ យប់ ផែនទីទាំង១៨ ផ្ទាំង ដែលរដ្ឋាភិបាលកម្ពុជា ស្នើ​សុំ​ខ្ចីពីអង្គការសហប្រជាជាតិនោះ បានមកដល់កម្ពុជាហើយ។ វត្តមាននៃមន្រ្តីកម្ពុជា ដែលបានទៅទទទួល​តំណាង អង្គការសហប្រជាជាតិ ដល់ព្រលានយន្តហោះអន្តរជាតិភ្នំពេញនោះ រួមមានរដ្ឋលេខាធិការ ក្រសួង​ការបរទេស លោក ឡុង វីសាលោ, រដ្ឋលេខាធិការ នៃទីស្តីការគណរដ្ឋមន្ត្រី លោក ស្វាយ ស៊ីថា និង​អនុប្រធាន​គណៈកម្មាធិការ ទទួលបន្ទុកកិច្ចការព្រំដែន របស់រដ្ឋាភិបាលកម្ពុជា អ្នកស្រី កុយ ពិសី។

តំណាងអង្គការសហប្រជាជាតិ ដែលនាំផែនទីទាំង១៨ ផ្ទាំងនោះ មកប្រគល់ដល់រដ្ឋាភិបាលកម្ពុជា មានចំនួន​ពីររូប គឺប្រធានស្តីទី នៃបណ្ណាល័យអង្គការសហប្រជាជាតិ អ្នកស្រី មិរៀរនី កឺឡឺទី វ៉ាការស៊ីស៊ីកាកាឡា (Mereani Keleti Vakasisikakala និងមន្រ្តីផ្នែកច្បាប់ នៃអង្គការសហប្រជាជាតិ លោក កឺអ៊ិឈិរ៉ូ អូគីមូតុ (Keiichiro Okimoto)។ ផែនទីទាំង១៨ ផ្ទាំង នោះត្រូវបានរក្សាទុក នៅជាប់នឹងតំណាងអង្គការសហប្រជាជាតិ ទាំងពីររូបខាងលើ មុននឹងធ្វើការប្រគល់ជូន ភាគីកម្ពុជា ជាផ្លូវការនាព្រឹកថ្ងៃទី២០ ខែសីហានេះ៕