នៅពេលដែលមតិមួយចំនួន និយាយថា ការចូលសារភាពរបស់លោក ឈូក បណ្ឌិត ដើម្បីអនុវត្តទោស​ក្នុង​ពន្ធនាគារ ទៅលើបទចោលបាញ់បោះ យ៉ាងអាណាធិបតេយ្យ ទៅលើកម្មករ ថាជាការបិទបញ្ចប់ នូការរិះគន់ និង​នីទណ្ឌភាពនៅកម្ពុជានោះ សម្រាប់មតិមួយចំនួន បានគិតថា ការចូលខ្លួន របស់អតីតអភិបាលក្រុងបាវិត ជាការបើកផ្លូវឲ្យរដ្ឋាភិបាលលោក ហ៊ុន សែន ឈាន ទៅចាប់ខ្លួនសកម្មជនគណបក្សប្រឆាំងផ្សេងទៀត។

លោក អំ សំអាត ប្រធានផ្នែកបច្ចេកទេសស៊ើបអង្កេត របស់អង្គការការពារសិទ្ធិមនុស្ស លីកាដូ បានសម្ដែង​ទស្សនៈ​របស់លោក ប្រាប់ទស្សនាវដ្ដីមនោរម្យ.អាំងហ្វូ ថាការចូលខ្លួនសារភាព របស់លោក ឈូក បណ្ឌិត នា​ពេលនេះថាអាចជានុយ សម្រាប់បំពាក់ ដើម្បីស្ទូចយកសកម្មជននានា របស់គណបក្សសង្គ្រោះជាតិ ពាក់ព័ន្ធ​នឹងអំពើហិង្សានៅស្ពាននាគ។ លោក បានពន្យល់ឡើងថា៖ «យើងមើលឃើញថា នៅពេលដែលសម្តេច​នាយក​រដ្ឋមន្រ្តី ប្រកាសឲ្យចាប់ខ្លួនបន្ថែមទៀតទៅលើសកម្មជនគណបក្សសង្គ្រោះជាតិ ដែលពាក់ព័ន្ធនឹងរឿងហិង្សា នៅថ្ងៃទី១៥ ខែកក្កដា (ឆ្នាំ២០១៥) ក្រោយមកតុលាការ ក៏បានចេញដីកាឲ្យសមត្ថកិច្ចចាប់ខ្លួន ជាបន្តបន្ទាប់។ ស្របពេលនេះ លោកនាយករដ្ឋមន្រ្តី ក៏ប្រកាសឲ្យចាប់ខ្លួន លោក ឈូក បណ្ឌិតដែរ។»

មន្រ្តីសិទ្ធិមនុស្សរូបនេះ បាននិយាយថា ការប្រកាសរបស់លោកហុនសែន ដែលបានដាក់ចេញទៅហើយនោះ បើមានប្រសិទ្ធិភាព តែទៅលើសកម្មជនគណបក្សប្រឆាំង ហើយមិនអាចចាប់ខ្លួន លោក ឈូក បណ្ឌិត បាន​នោះ វានឹងធ្វើឲ្យលោកនាយករដ្ឋមន្រ្តី បាក់មុខមាត់។ ឯយន្តការ នៃការដាក់ទោស លើសកម្មជនគណបក្ស​សង្គ្រោះ​ជាតិ ក៏នឹងមិនអាចអនុវត្ត មានប្រសិទ្ធិភាពដែរ។ លោកបានបន្ថែមឲ្យដឹងទៀថា៖ «បើលោក ឈូក បណ្ឌិត មិនបង្ហាញខ្លួន សមត្ថកិច្ចត្រូវតែចាប់ខ្លួន បើមិនដូច្នោះទេ បញ្ហាដែលលោក ឈូក បណ្ឌិត មិនត្រូវ​បាន​ចាប់ខ្លួន នឹងធ្វើឲ្យប៉ះពាល់ ដល់មុខមាត់លោកនាយករដ្ឋមន្រ្តី។ (...) ហេតុនេះ លោក ឈូក បណ្ឌិត បើទោះជា​មិន​ចេញ មកបង្ហាញខ្លួន ក៏ប្រហែលជាត្រូវសមត្ថកិច្ចតាមចាប់។ ការចេញបង្ហាញខ្លួននេះ មិនសូវខ្មាសគេ (ឈូក បណ្ឌិត) នៅពេលដែលសមត្ថកិច្ចចុះចាប់ខ្លួន។»

ចំពោះទស្សនៈខាងលើ មិនត្រូវបាន លោក ផៃ ស៊ី ផាន អ្នកនាំពាក្យ ទីស្តីការគណរដ្ឋមន្រ្តី យល់ស្របនោះទេ។ លោក ស៊ីផាន បានអះអាងក្នុងបណ្តាញសង្គមថា៖ «ការនាំ និងឃាត់ខ្លួន ដែលជាដែនសមត្ថកិច្ច របស់តុលាការ​នា​ពេលនេះ ជាចំណាត់ការ ទៅលើបុគ្គលល្មើសច្បាប់តែប៉ុណ្ណោះ ដោយមិនស្ថិតនៅ ក្នុងទិដ្ឋភាពនយោបាយ​នោះ​ឡើយ»។

មិនអាចសំការបញ្ជាក់បន្ថែម ពីអ្នកនាំពាក្យគណបក្សសង្គ្រោះជាតិ នាពេលនេះបានទេ ពាក់ព័ន្ធនឹងការចូលខ្លួន មកសារភាពរបស់លោក ឈូក បណ្ឌិត និងដំណឹងដែលបានធ្វើឲ្យលេចឭ ពីការចាប់ខ្លួន របស់សកម្មជន របស់​គណបក្សប្រឆាំង នាពេលថ្មីៗនេះ។

យ៉ាងណាក៏ដោយ លោក អំ សំអាត បានរិះគន់ទៅលើ ភាពអសកម្មនៃក្រុមសមត្ថកិច្ច ឬតុលាការមួយចំនួន ដែល​កន្លងមក មិនអាចចាប់លោក ឈូក បណ្ឌិត បាន ក្រោមហេតុផលឬលេសថា លោក ឈូក បណ្ឌិត បាន​ចេញទៅក្រៅប្រទេស (បរទេស) បាត់ហើយ។

ប្រធានផ្នែកបច្ចេកទេសស៊ើបអង្កេត របស់អង្គការលីកាដូដដែល បានធ្វើការរំលឹកថា ករណីបទល្មើស ដែល​ប្រព្រឹត្តិ​ឡើង ដោយលោក ឈូក បណ្ឌិត នេះ ហាក់ដូចជាមានការការពារ ពីបុគ្គលមានអំណាចដែល​នៅពី​ក្រោយ។ លោកថា កម្មការិនីបីនាក់ នៅកន្លែងផ្សេងគ្នា តែត្រូវគ្រាប់កាំភ្លើងរបស់លោក ឈូក បណ្ឌិត ដូចគ្នា ក្នុងម៉ោងខុសគ្នា។ តែផ្ទុយទៅវិញ លោក ឈូក បណ្ឌិត មិនត្រូវបានចាប់ខ្លួនភ្លាមៗទេ ហើយត្រូវសាលា​ដំបូង​ខេត្តស្វាយរៀង លើកលែងការចោទប្រកាន់នោះទៀត។ មិនត្រឹមតែប៉ុណ្ណឹង នៅពេលរឿងនេះ ឡើងរហូតដល់​សាលាឧទ្ធណ៍ ស្ថាប័នយុត្តិធម៌មួយនេះ បានធ្វើការចោទប្រកាន់ តែបានបន្ថយទោស មកយ៉ាងស្រាលបំផុត ត្រឹម«បង្ករបួសស្នាម ដោយអចេតនា» ដែលស្ទើរស្មើនឹង «បទលហុ» តែប៉ុណ្ណោះ៕