អ្នកសម្របសម្រួល ក្នុងវេទិកាយុវជន កាលពីថ្ងៃទី០៨ ខែសីហា យុវជន ហេង គឹមហុង ដែលជានិស្សិតផ្នែក​ច្បាប់ នៅសាកលវិទ្យាល័យជាតិគ្រប់គ្រង បានលើកឡើងថា «គ្រឿងស្រវឹង ជាទឺកបំពុលមនុស្ស»។

ការលើកឡើងនេះ បានធ្វើឡើង នៅក្នុងវេទិកាយុវជន ដែលបានបើកធ្វើកាលពីថ្ងៃទី ៨ ខែសីហា ឆ្នាំ២០១៥ ទាក់ទងនឹងប្រធានបទ ការប្រើប្រាស់គ្រឿងស្រវឹង ដែលមានគោលបំណង ឲ្យយុវជនទាំងអ្នកប្រើប្រាស់ គ្រឿង​ស្រវឹង និងមិនប្រើប្រាស់ជួបគ្នា ដើម្បីជជែកពិភាក្សា និងរកដំណោះស្រាយដែល អាចបកាត់បន្ថយ​ហានីភ័យ​មួយចំនួន បង្កពីគ្រឿងស្រវឹង ដូចជាករណីគ្រោះថ្នាក់ចររាចរណ៍ បញ្ហាអសន្តិសុខសង្គម និងអំពើហិង្សា​ក្នុង​គ្រួសារ​ជាដើម សុទ្ធតែមានភាគរយខ្ពស់ បណ្តាលមកពីការប្រើប្រាស់គ្រឿងស្រវឹង។

លោក គឹមហុង បានពន្យល់ថា នៅពេលមនុស្សមានស្មារតីធម្មតា អាចបញ្ជា និងគ្រប់គ្រងខ្លូនឯងបានយ៉ាងល្អ ប៉ុន្តែនៅពេលមានជាតិស្រវឹង ចូលក្នុងខ្លួន មនុស្សស្ទើរ៩០ភាគរយ មិនអាចរក្សា និងគ្រប់គ្រងស្មារតី ដូចមុន​ទៀត​បានទេ។ ដូចច្នេះបញ្ហាដែលកើតមាន ក្នុងអំឡុងពេលប្រើប្រាស់គ្រឿងស្រវឹង អាចជាបញ្ហាធំ ដល់ខ្លូនឯង និងសង្គម។

និស្សិតផ្នែកច្បាប់រូបនេះ បានលើកយកការសិក្សាស្រាវជា្រវ របស់មូលនិធិអាស៊ី មកបញ្ជាក់ទៀតថា ចំនួន​សិស្ស​និស្សិត ដែលប្រើប្រាស់គ្រឿងស្រវឹង នៅកម្ពុជា មានរហូតដល់ទៅ៧៨ភាគរយ បើធៀប​ទៅនឹង​យុវជន​សរុប។ ក្នុងនោះ តួលេខយុវជនដែលប្រើប្រាស់ នៅរាជធានីភ្នំពេញ និងនៅតាមបណ្តាខេត្ត មានលក្ខណៈ​ខុស​គ្នា។ ភ្នំពេញជាប់ចំណាត់ថ្នាក់ទី៣ ចំណែកតួលេខ ដែលប្រើប្រាស់ច្រើន គឺនៅខេត្ត ស្វាយរៀង និងខេត្ត​មណ្ឌលគីរី រតនៈគីរី។

និស្សិតស្ត្រី ផ្នែកទស្សនៈវិជ្ជាម្នាក់ មកពីសាកលវិទ្យាល័យភូមិន្ទភ្នំពេញ កញ្ញា យឿន ផល្លា បានប្រាប់​ទស្សនាវដ្តី​មនោរម្យ.អាំងហ្វូថា យុវជនដែលប្រើប្រាស់គ្រឿងស្រវឹង បណ្តាលមកពីកត្តាពីរយ៉ាង ទីមួយគឺខ្លូនឯង ទីពីរ គឺ​បរិយាកាស​សង្គមខាងក្រៅអូសទាញ។ កញ្ញាពន្យល់ថា បរិយាកាសសង្គមខាងក្រៅ នៅក្នុងទីក្រុងភ្នំពេញ មាន​ភាព​ងាយស្រួលណាស់ ក្នុងការទិញ ឬប្រើប្រាស់គ្រឿងស្រវឹង គ្មានការហាមឃាត់ណាមួយឡើយ។ ម្យ៉ាងវិញ​ទៀត កត្តាខ្លួនឯង ដែលឃើញអ្នក​នៅជុំវិញខ្លួន​ប្រើគ្រឿងស្រវឹង គឺខ្លួន​ឯងមិនអាចគ្រប់គ្រងបាន ហើយឈាន​ដល់ការប្រើប្រាស់ដែរ យូរទៅ ក្លាយជាទម្លាប់ពេលជួបគ្នា គឺត្រូវតែមានគ្រឿងស្រវឹង។

ដូចគ្នានេះដែរ យុវជន ជួង សុជា បានបញ្ជាក់ប្រាប់ថា យុវជននៅក្នុងប្រទេស គឺជាទំពាំងស្នងឬស្សី បើទំពាំង​នាំគ្នាប្រើប្រាស់គ្រឿងស្រវឹង នោះឬស្សី នឹងគ្មានការលូតលាស់ល្អនោះទេ។ យុវជនរូបនេះ បានបញ្ជាក់ចុង​ក្រោយ​ថា សូមសំណូមពរឲ្យក្រសួងព័ត៌មាន មេត្តាកាត់បន្ថយ ការផ្សព្វផ្សាយពាណិជ្ជកម្ម គ្រឿងស្រវឹង នៅ​ក្នុង​ប្រទេស។ មួយវិញទៀត សូមឲ្យក្រសួងដែលជាប់ពាក់ព័ន្ធ មេត្តារឹតបណ្តឹងពន្ធ នាំគ្រឿងស្រវឹងចូល ដើម្បីឲ្យ​ការលក់គ្រឿងស្រវឹង មានតម្លៃថ្លៃ ដែលអ្នកគ្មាលទ្ធភាព មិនអាចប្រើប្រាស់បាន៕