បើសិនជាគេធ្លាប់ឃើញកុមារកម្ពុជា នៅតំបន់ដាច់ស្រយ៉ាលមួយចំនួន បានអង្គុយរៀននៅក្រោមដើមឈើ ឬ​នៅក្រោមដំបូលតង់ រហែកធ្លុះធ្លាយនោះ ប៉ុន្តែករណីលើកនេះ មានលក្ខណៈខុសស្រឡៈតែម្ដង។ ករណីដ៏​ចម្លែក​បានកើតឡើង នៅក្នុងវិទ្យាល័យ ហ៊ុនសែនត្បូងឃ្មុំ កាលពីព្រឹកថ្ងៃអាទិត្យ ទី៩ ខែសីហានេះ។

មិនមែនសាលាមិនមានអាគារ សម្រាប់ឲ្យសិស្សានុសិស្សទាំងនេះជ្រករៀនទេ តែសាស្ត្រាចារ្យនៃ​វិទ្យាល័យ​មួយនេះ បានបានរៀបចំការប្រលង​ គណិតវិទ្យាសាកល្បងមួយ ដើម្បីបង្ហាញពីតម្លាភាព ដូចជាហាម​ការ​លួចម្លង និងងាយស្រួល ក្នុងការត្រួតពិនិត្យ បេក្ខជននីមួយៗនោះជាដើម។ ​តុ​កៅអី របស់បេក្ខជននីមួយៗ ត្រូវបានយកចេញពីថ្នាក់ មកដាក់នៅក្រោម​ដើមឈើ និងក្រោមមេឃ ដែលមានចំងាយឆ្ងាយៗ​ពីគ្នា ដើម្បី​ឲ្យ​សិស្ស​ប្រលង​សាកល្បង។

រូបភាពទាំងនេះ ត្រូវបានក្រុមអ្នកប្រើប្រាស់​បណ្ដាញសង្គម យកមកចែករំលែក​បន្តបន្ទាប់គ្នា យ៉ាងទ្រហឹង​អ៊ឺង​អាប់។ អ្នកខ្លះបានបញ្ចេញយោបល់ថា គួរតែក្រសួងអប់រំ ត្រូវសង់ជាមជ្ឈមណ្ឌលប្រលងមួយ ឲ្យធំសម្រាប់​ពួកគាត់ហើយ ឬយ៉ាងហោចណាស់ ក៏ត្រូវមានសាលដ៏ធំមួយ ប្រចាំសាលានីមួយៗ ដើម្បីអនុញ្ញាតឲ្យសិស្ស អាចចូលទៅអង្គុយប្រលង នៅក្នុងទំរង់បែបនេះ៕

» សូមទស្សនារូបភាពមួយចំនួន ដូចខាងក្រោម៖