ជិះម៉ូតូ នៅតាមផ្លូវស្របគ្នា តែបានជួបគ្រោះថ្នាក់ រហូតមានមនុស្សសន្លប់។ នោះ គឺការបើកបរបំពាន របស់​ភាគី​បង្ក ដែលបានធ្វើឲ្យ បុរសវ័យកណ្តាលម្នាក់ រងរបួសធ្ងន់ធ្ងរ រហូតសន្លប់ ដោយមានម៉ូតូមួយគ្រឿង បាន​មក​បុក​គាត់ ពីក្រោយពេញទំហឹង។

សាក្សីម្នាក់ អ្នកស្រី ខៀវ យឿន អាយុ ៥៦ឆ្នាំ បានរៀបរាប់ពីករណីគ្រោះថ្នាក់នេះ ពីដើមដំបូងថា គាត់បាន​ឃើញ​បុរសរងគ្រោះ ធ្វើដំណើរពីជើងទៅត្បូង ស្រាប់តែមកដល់កន្លែងកើតហេតុ មានម៉ូតូមួយគ្រឿង បើកពី​ក្រោយ ម៉ាកឌ្រីម ពណ៍ខ្មៅ ស្លាកលេខភ្នំពេញ ១CX-១៨០៩ បុកបុរសរងគ្រោះពេញទំហឹង បណ្តាលឲ្យ​បុរស​វ័យកណ្តាលរូបនេះ រងរបួសធ្ងន់ រហូតសន្លប់បាត់ស្មារតី។

យុវតីវ័យ១៧ឆ្នាំម្នាក់ ឈ្មោះ សេង វណ្ណា ដែលត្រូវជាកូន របស់ជនរងគ្រោះ បានរៀបរាប់ ទាំងយំបង្ហូរទឹកភ្នែក ប្រាប់អ្នកសារព័ត៌មានថា ឪពុករបស់ខ្លូន សព្វថ្ងៃរស់នៅ ក្នុងមជ្ឈមណ្ឌលមួយ ឈ្មោះថា «អង្គការដើម្បី​ភាព​ញញឹម»។  នាងបាននិយាយទៀតថា ឪពុករបស់នាងឈ្មោះ កែក សុភារិទ្ធ អាយុ៥០ឆ្នាំ គាត់កំពុងធ្វើដំណើរ ទៅរកនាង នៅក្នុងរោចក្រមួយ តាមបណ្តោយផ្លូវ ម៉ៃដា ផ្លូវ២០០៤។

ស្ត្រីម្នាក់ទៀត ដែលជាប្អូនស្រីបង្កើត ជនរងគ្រោះ ឈ្មោះ យាយច្រិប បានប្រាប់ថា រាល់ថ្ងៃ ជនរងគ្រោះបាន​ហូបស្រាខ្លះៗ តែថ្ងៃនេះមិនបានហូបទេ។ អ្នកស្រីថា ម៉ូតូដែលបុកជនរងគ្រោះ បានចេញទៅតាមផ្លូវ ជាប់នឹង​ផ្លូវ២០០៤នេះ ហើយមានឡានបុរសម្នាក់ បើកតាមពីក្រោយ ព្រោះគេចាំស្លាក លេខម៉ូតូ ដើម្បីឃាត់​ជនបង្ក​ឲ្យបាន។ បច្ចុប្បន្ន ជនរងគ្រោះ ត្រូវបានក្រុមគ្រួសារ បញ្ជូនទៅកាន់មន្ទីពេទ្យរុស្ស៊ី ដើម្បីសង្គ្រោះបន្ទាន់៕