គ្រាន់តែផ្លុំខ្យល់ ចូលទៅក្នុងម៉ាស៊ីនមួយ ដែលដាក់តាមដងផ្លូវ ក្នុងពេលឥឡូវនេះ គេអាចហៅរថយន្ដតាក់ស៊ី ឲ្យ​មក​ទទួល យកទៅផ្ទះបាន នៅក្រុង តូរ៉ុងតូ ប្រទេសកាណាដា។ សេវាកម្មនេះ ទើបនឹងដាក់ឲ្យដំណើរការ នៅក្នុងរយៈពេល​ចុងក្រោយនេះ ដើម្បីធានាដល់សុវត្ថិភាព ចរាចរណ៍ជើងគោង និងដើម្បីឲ្យក្រុមអ្នកស្រវឹង ឈប់កាន់ចង្កូតរថយន្ដ ដោយ​ខ្លួន​ឯង ត្រឡប់ទៅផ្ទះវិញ។

ប្រអប់សម្រាប់ធ្វើការត្រួតពិនិត្យដោយស្វ័យប្រវត្តិនោះ មានឈ្មោះថា Uber safe ហើយត្រូវបានយកមកដាក់ នៅក្បែរ​នឹង​រង្គសាល ឬកន្លែងកំសាន្ដសំខាន់ៗ សម្រាប់ឲ្យមនុស្ស ដែលចេញពីទីនោះ ធ្វើការផ្លុំសាកល្បង ពីជាតិអាល់កុល នៅ​ក្នុង​ខ្លួន។ ដើម្បីដឹងពីលទ្ធផល គេត្រូវផ្លុំឲ្យបានយូរ ក្នុងរយៈពេល៦នាទី ហើយបើលទ្ធផលចេញមក បង្ហាញថា កម្រិត​ជាតិ​សុរា នៅក្នុងខ្លួន មានហួសកំណត់នោះ រថយន្ដតាក់ស៊ីមួយ នឹងត្រូវបានហៅ ដោយស្វ័យប្រវត្តិ ដើម្បីមកដឹក​អ្នក​ស្រវឹង​នោះ ទៅផ្ទះ។

ប្រសើរណាស់មែនទេ?

ពិតហើយ! ជាសារដ៏សំខាន់មួយ សម្រាប់សុវត្ថិភាពចរាចរណ៍ផ្លូវគោក។ តែមិនអាចមាន រយៈពេលយូរបានទេ ព្រោះ​បើ​មានបែបនេះ មនុស្សនឹងនាំគ្នា សេពសុរាឲ្យកាន់តែស្រវឹងឡើង ដោយអាងថា បើស្រវឹងខ្លាំង នឹងមានរថយន្ដតាក់ស៊ី មិន​បង់​ប្រាក់ មកជូនខ្លួន ឲ្យត្រឡប់ទៅផ្ទះវិញ។ តែបើនិយាយឲ្យស៊ីជម្រៅ វាជាផ្នែកមួយ នៃការផ្សាយពាណិជ្ជកម្ម ឲ្យ​ក្រុមហ៊ុន Uber ដែលត្រៀមនឹងបញ្ចេញ សេវាកម្មមួយទៀត ក្នុងពេលខាងមុខ នេះប៉ុណ្ណោះ៕