តារា«ហ្វេសប៊ុក»ពីររូបនេះ កំពុងបញ្ចេញ មកប្រើអស់នូវយុទ្ធិសិល្ប៍ «បាញ់គ្នាដោយសំដី» ដូចអ្វីដែលពួកគេ បានប្រឹងប្រែងរៀនសូត្រ មកពីបក្សអ៊ូតាំង និងសៅសីញយ៉ាងដូច្នោះ។ តើមានរឿងហេតុអ្វី បានជាធ្វើឲ្យ​មហាបុរសដ៏ល្បីល្បាញ ក្នុងពិភពគុនទាំងពីរនេះ បានបាញ់គ្នាទៅមកនោះ? ចម្លើយ៖ មកពីកញ្ញា សាសា និង​លោកឧកញ៉ា សុខ ប៊ុក ដែលត្រូវបានគេឃើញ នៅក្នុងវីដេអូសុវត្ថិភាព កាលពីពេលថ្មីៗ ថាបុរសអ្នកមាន​ប្រាក់ បានវាយតប់ ចាប់បោចសក់ ទៅលើអតីតពិធីការិនីទូរទស្សន៍។

មហាបុរស ក្នុងពិភពហ្វេសប៊ុក ទាំងពីរនាក់នេះ ម្នាក់ឈ្មោះ ផែង វណ្ណៈ និងម្នាក់ទៀតឈ្មោះ ឆាំ ឆានី។ រឿង​ហេតុដំបូង ដែលបង្កឲ្យលោក ផែង វណ្ណៈ ឆេះឆួលក្ដៅក្រហាយ ទប់ការតាំងសិល្ប៍រាប់ពាន់ឆ្នាំ នៅមិនសុខ រហូត​ណាត់គ្នា ចេញមក«ប្រយុទ្ធគ្នាស្លាប់រស់»នោះ ព្រោះលោក ឆាំ ឆានី បានផ្សាយព័ត៌មានមួយ ក្នុង​គណនេយ្យ​ហ្វេសប៊ុក របស់ខ្លួនថា លោកឧកញ៉ា សុខ ប៊ុន ជាកូនប្រសារ របស់អតីតអភិបាលរាជធានី​ភ្នំពេញ លោក កែប ជុតិមា។ ហើយបន្ទាប់ រឿងបានផ្ទុះឡើង កាន់តែខ្លាំង ដោយសារអ្នកទាំងពី បានភ្ជាប់ខ្លួន​ម្ខាង​ម្នាក់ ទៅរក​គណបក្ស​នយោបាយ ដែលអ្នកទាំងពីរគាំទ្រ តែរៀងៗខ្លួន។

លោក ឆាំ ឆានី បានសរសេរថា៖ «បែកធ្លាយ សុខ ប៊ុន នាយកក្រុមហ៊ុន សុខ ប៊ុន គ្រុប (SBG) ក្រុមហ៊ុន TEHO Development និងក្រុមហ៊ុនវាយតម្លៃ អចលនវត្ថុនៅកម្ពុជា ជាកូនប្រសារ កែប ជុតិម៉ា។ (…) នេះគឺ​ជាសារ​របស់​មិត្តអ្នកអានម្នាក់ ដែលបានផ្ញើមកខ្ញុំ ដោយសុំមិនបញ្ចេញឈ្មោះ: "បងដឹងទេថា អាឧកញ៉ាដែល​វាយ​នាង សាសា នោះ វាជាកូនប្រសារ កែប តិជុម៉ា ចឹងហើយបានជាវាមានលុយ មានអំណាច បំផ្លាញ​ជាតិ បំផ្លាញ​អ្នក​ដទៃនោះ ស្រុកខ្មែរគ្មានច្បាប់សំរាប់អ្នកមាន នឹងអ្នកធំទេបង"។»

មិនសង្ងំយូរ មហាបុរស ផែង វណ្ណៈ បានតបវិញភ្លាមថា៖ «ជូនអាត្រូវគ្រាប់ Chham Chhany ជ្រាប! ការផ្សព្វ​ផ្សាយ​ព័ត៌មានភូតកុហក បំផ្លើសបំភ្លៃការពិតជាចរិក របស់អ្នកគាំទ្រគណបក្សសង្រ្គោះជាតិ ។ ពួកគេមាន​ជំនាញ ពូកែខាងបំភ្លៃការពិត ជាពិសេស អាត្រូវគ្រាប់ Chham Chhany នេះតែម្ដង។ សូម្បីរូបដំរីជាន់ខ្លា នៅ​ខេត្ត​កំពង់ធំ ក៏អាត្រូវគ្រាប់ Chham Chhany នេះវាផ្សាយថា គេគាស់យកទៅបាត់ដែរ តែធាតុពិតរូបសំណាក ដំរី​ជាន់​ខ្លា​នៅ​ខេត្តកំពង់ធំ នៅកន្លែងដដែល គ្មានការរុះរើទៅណាទេ។ ចំណែករូបខ្ញុំ ក៏វាផ្សាយ​ចោទថា ជា​កូន​​យួន​​ដែរ។ ឥលូវនេះ អាត្រូវគ្រាប់ Chham Chhany បាន​ផ្សាយព័ត៌មានបំភ្លៃទៀត ដោយវាបានផ្សាយថា ឧកញ៉ា សុខ ប៊ុន ដែលប្រើហឹង្សាលើកញ្ញា សាសា ថាជាកូនប្រសារ ឯកឧត្តម កែប ជុតិម៉ា អ្នក​តំណាង​រាស្ត្រ គណបក្ស​ប្រជាជន​កម្ពុជា ទៅវិញ។»

តារាពិភពហ្វេសប៊ុក ផែង វណ្ណៈ បានពន្យល់បន្តថា៖ «ការពិត ឯកឧត្តម កែប ជុតិម៉ា មានកូនប្រសារប្រុស តែ​ម្នាក់គត់ បំរើការងារនៅក្រសួងការបរទេស មិនមែនឈ្មោះ សុខ ប៊ុន ទេ។ តើហេតុអ្វី បានអាត្រូវគ្រាប់ Chham Chhany វាចូលចិត្តផ្សាយព័ត៌មានភូតកុហក?» បន្ទាប់មកមហាបុរសរូបនេះ បានសរសេរប្រកាស ស្វែង​រក​អ្នក​ស្គាល់ «អាត្រូវគ្រាប់ Chham Chhany ច្បាស់ សូមផ្ដល់ព័ត៌មានមកខ្ញុំបាទ តាមរយៈលេខទូរស័ព្ទ (...) ខ្ញុំនឹង​ជូន​សាគុណ» ។»

រីឯមហាបុរស ឆាំ ឆានី វិញបានតបវិញថា៖ «ឆាំ ឆានី សូមប្រាប់ទៅ ផែង វណ្ណះ វិញថា ហ៊ុន សែន ធ្លាប់ឲ្យ​តម្លៃ​ខ្លួន ឆាំ ឆានី ម្តងហើយ។ បើ ផែង វណ្ណះ ចង់ចាយលុយដើម្បីរក ឆាំ ឆានី សូមទៅសួរ ហ៊ុន សែន ទៅថា ហ៊ុន សែន ធ្លាប់ឲ្យតម្លៃខ្លួន ឆាំ ឆានី ប៉ុន្មាន?»

វរៈជនកំពូលក្បាច់គុនទាំងពីរ នៅតែថ្លែងសារទៅវិញទៅមក ដាក់គ្នាជាបន្តបន្ទាប់ រហូតឈានដល់ចំណុច​មួយ គឺការបកអាក្រាត នូវប្រវត្តិរៀងៗខ្លួន។ លោក ឆាំ ឆានី បានថ្លែងក្នុងបណ្តាញសង្គមខ្លួនថា លោក ផែង វណ្ណៈ ការពិតមានឪពុក ជាជនជាតិវៀតណាម ហើយមកអូតថាខ្លួនជាខ្មែរ និងមានការងារជាមន្រ្តីខ្មែរទៀត។ ឯលោក ផែង វណ្ណៈក៏បានប្រដូចមុខលោក ឆាំ ឆានី ថាជាចៅរបស់ហូរជីម៉ិញ ដែលមកបង្កប់ខ្លួន ដើម្បីបង្កឲ្យខ្មែរ​ឈ្លោះ​គ្នាដែរ។

នេះជាសំណេររបស់លោក ឆាំ ឆានី៖ «នេះជារូបភាព ម៉ែ ឪ ផែង វណ្ណះ ដែលអ្នកស្គាល់អះអាងថា ជាយួន​សុទ្ធ​សាធ។ នេះជាសារ ពីអ្នកដែលស្គាល់គ្រួសារ ផែង វណ្ណះ "ផែង វណ្ណះ កូនយួនសុទ្ធ ជាក្មួយប៊ិត គឹមហុង អតីត​ស្នងការរងក្រុងភ្នំពេញ ទទួលបន្ទុក ពត័មានទូទៅ(ចារកិច្ច)។ ផែង វណ្ណះ មានឈ្មោះមួយទៀត សម សារិ ធ្លាប់​ធ្វើងចាងហ្វាងកាសែត សេរីភាពខ្មែរ។ អគុណ ឆានី លាក់ប្រភពអោយបងផង"។»

ខណៈលោក ផែង វណ្ណៈ បានសរសេរតបវិញថា៖ «បែកធ្លាយអា Chham Chhany ជាចៅហូជីម៉ិញ វាមក​បន្លំ​ខ្លួន​ជាខ្មែរ ដើម្បីបំបែកបំបាក់ជាតិខ្មែរ តាមរយៈការសរសេរព័ត៌មាន បំពុលសង្គម តាមបណ្ដាញ Facebook។ អា​ចៅ​ហូជីម៉ិញរូបនេះ វាមិនដែលផ្សាយព័ត៌មានពិតទេ វាចូលចិត្តផ្សាយព័ត៌មាន ភូតកុហកប្រជាពលរដ្ឋខ្មែរ។»៕