រដ្ឋសភាពកម្ពុជា នៅតែរងការចោទប្រកាន់ ថាជារដ្ឋសភាដែមានភាពលំអៀង ទៅរកក្រុមបក្សពួកតែម្ខាង។ បើសូម្បីអ្នកតំណាងរាស្ត្រ ក៏មានការបែកចែកសិទ្ធិ នៃការនិយាយស្ដីរនោះ តែសម្រាប់សិក្ខាសាលាថ្នាក់ជាតិ ដើម្បីជជែកពិភាក្សាពីច្បាប់ ស្ដីពីសមាគម និងអង្គការក្រៅរដ្ឋាភិបាល រៀបចំដោយរដ្ឋសភាវិញ ក៏ស្ថាប័ន​ជាតិ​មួយនេះ បានរងនូវការរិះគន់ដូចគ្នាដែរថា បានរើសអើងយកតែ ក្រុមអង្គការសមាគម ដែលមាន​និន្នាការ​លំអៀង ទៅបក្សកាន់អំណាច ឬជាអង្គការសមាគម ដែលបង្កើតឡើង ដោយរដ្ឋាភិបាលតែប៉ុណ្ណោះ។

លោក ណៃ វ៉ង់ដា អនុប្រធានផ្នែកសិទ្ធិមនុស្ស និងមេធាវីតំបន់ របស់សមាគមការពារសិទ្ធិមនុស្សអាដហុក បានថ្លែងត្អូញត្អែរ ពីការរឹតត្បិតរបស់រដ្ឋសភា ដែលជាស្ថាប័នរបស់ជាតិ ប្រាប់ទស្សនាវដ្តីមនោរម្យ.អាំងហ្វូ ថា​អង្គការសង្គមស៊ីវិល ដែលបានចូលរួមក្នុងសិក្ខាសាលា រៀបចំឡើងដោយរដ្ឋសភា កាលពិថ្ងៃទី៨ ខែកក្កដា ឆ្នាំ២០១៥ ម្សិលម៉ិញនេះ ភាគច្រើនជាអង្គការសង្គមស៊ីវិល មកពីគណបក្សប្រជាជនកម្ពុជា។

មន្រ្តីសិទ្ធិមនុស្សរូបនេះបានបន្តថា សិក្ខាសាលា ដើម្បីកិច្ចពិភាក្សា និងទទួលអនុសាសន៍របស់សង្គមស៊ីវិល ស្តីពីច្បាប់សមាគម និងអង្គការសង្គមស៊ីវិល ដែលកំណត់ចំនួនអ្នកចូលរួមនោះ មានអង្គការសង្គមស៊ីវិល​ពិត​ប្រាដក ឬអង្គការសង្គមស៊ីវិលដែលឯករាជ្យ ចូលរួមត្រឹមតែ៣០នាក់ប៉ុណ្ណោះ ពីក្នុងចំណោមអ្នកចូលរូម រាប់​រយនាក់នោះ។

លោកដាក់ការសន្និដ្ឋានថា សិក្ខាសាលានោះ ទំនងជាត្រូវបានរៀបចំ ឲ្យមានអ្នកចូលរួមរួចជាស្រេច ពីក្រុម​ដែលមាននិន្នាការ«គាំទ្រ» ឲ្យមានច្បាប់នេះ។ លោក ណៃ វង់ដា បានថ្លែងឲ្យដឹងថា៖ «អង្គការសង្គមស៊ីវិល ដែលជាអ្នកមិនគាំទ្រនោះ មានចំនួនប្រមាណជាង៣០នាក់។ ក្រៅពីនោះ (...) សុទ្ធតែជាក្រុមយុវជន ពីខាង​គណបក្សកាន់អំណាច អង្គការសង្គមស៊ីវិល ខាងគណបក្សកាន់អំណាច ខាងរដ្ឋាភិបាល។ ពួកគាត់គាំទ្រ​មិន​ងាយរ៉េ។»

ការចូលរួមមួយ ដើម្បីគ្រាន់តែចូលរួម... ឬសិក្ខាសាលាបង្គ្រប់កិច្ច

លោក បានបន្តថ្លែងទៀតថា សម្រាប់សមាគមរបស់លោក មិនមានការអអញ្ជើញណាមួយ ពីរដ្ឋសភាឲ្យ​ចូលរួម​ឡើយ។ តែបើទោះជាមាន ក៏សមាគមលោកសម្រេចចិត្ត មិនចូលរួមដែរ។ លោកបានបញ្ជាក់ថា ស្ថាប័ន​របស់លោក មិនចង់បានការចូលរួមមួយ ដើម្បីគ្រាន់តែចូលរួមនោះឡើយ គីត្រូវការនូវភាពជោគជ័យ ឬលទ្ធផលមួយ ដែលអាចទទួលយកបាន។ មិនចង់ចូលរួម ព្រោះមិនចង់ចូលដៃចូលជើង ក្នុងការប្រឹក្សា​យោបល់ តាមបែបបង្គ្រប់កិច្ច  ដែលរៀបំឡើងដោយរដ្ឋសភានោះឡើយ។

សូមស្តាប់កិច្ចសម្ភាសទាំងស្រុងដូចខាងក្រោម៖

ទស្សនាវដ្តីមនោរម្យ.អាំងហ្វូមិនអាចសុំការបញ្ជាក់ ពីអ្នកនាំពាក្យរដ្ឋសភា លោក ឈាង វុន ចំពោះការចោទ​ប្រកាន់ខាងលើនេះ បានឡើយនាថ្ងៃនេះ ដោយមិនអាចភ្ជាប់ទំនាក់ទំនងបាន។

បើតាមការអះអាងរបស់អ្នកស្រី ចក់ សុភាព នាយិការមជ្ឈមណ្ឌលសិទ្ធិមនុស្សកម្ពុជា សង្គមស៊ីវិល ដែល​ចូលរួមក្នុងសិក្ខាសាលា របស់រដ្ឋសភានោះ មិនដែលមានមុខក្នុងការតវ៉ា ប្រឆាំងនឹងការអនុម័តច្បាប់នោះទេ ប៉ុន្តែពួកគេមានឱកាស ក្នុងការលើកជាសំនួរនោះ ដោយភាគច្រើនពីក្នុងនោះ បានបង្ហាញជំហរ ក្នុងការ​គាំទ្រ​ឲ្យមានច្បាប់នេះ។ ការថ្លែងរបស់អ្នកស្រី បានធ្វើឡើងក្នុងសិក្ខាសាលាមួយ កាលពីថ្ងៃទី៨ ខែកក្កដា ឆ្នាំ២០១៥ ដដែល បន្ទាប់ពីសិក្ខាសាលារបស់រដ្ឋសភា ត្រូវបានបញ្ចប់។

បង្កើតច្បាប់ ព្រោះ... បាត់កៅអី

រីឯប្រធានផ្នែកបច្ចេកទេសស៊ើបអង្កេត របស់អង្គការការពារសិទ្ធិមនុស្ស លីកាដូ លោក អំ សំអាត វិញ ក៏បាន​លើកឡើង ប្រហែលគ្នានេះដែរ។ តែយ៉ាងណា លោកបានសរុបជារួមវិញថា អង្គការសង្គមស៊ីវិល​ឯករាជ្យ​ពិត​ប្រាកដ (មិនស្ថិតក្រោមគណបក្សនយោបាយណាមួយ) នៅតែបដិសេធ មិនចង់បានច្បាប់មួយនេះដដែល។ លោកបានថ្លែងថា គោលបំណង ដែលរដ្ឋាភិបាលជម្រុញដាច់ខាត ត្រូវតែបង្កើតឲ្យមានច្បាប់នេះ ជា​ចាំបាច់​នោះ ព្រោះតែសម្លេងឆ្នោត និងអំណាចរបស់គណបក្សកាន់អំណាចថយចុះ ក្នុងអំឡុងឆ្នាំ២០១៣ បន្ទាប់​ពី​ចរន្ត​សហគម ឬអង្គការមូលដ្ឋាន សង្គមស៊ិវិលមួយចំនួន ដែលចម្រុញឲ្យបរិបទនយោបាយនៅកម្ពុជា ឆ្ពោះទៅ​រក​តាម​បែបលិទ្ធិប្រជាធិបតេយ្យ។

លោក អំ សំអាត បានថ្លែងឡើងថា៖ «ឆ្នាំ២០១៣ ការបោះឆ្នោតមានអ្វីកើតឡើង? ធ្វើឲ្យអំណាច និងសម្លេង​ឆ្នោតរបស់គណបក្សកាន់អំណាច វាថយចុះ។ នេះហើយ ជាហេតុដែលគណបក្សកាន់អំណាច និង​រដ្ឋាភិបាល ជម្រុញធ្វើយ៉ាងណា ត្រូវតែមានច្បាប់ដើម្បីគ្រប់គ្រងសមាគម និងអង្គការក្រៅរដ្ឋាភិបាល។»

សូមស្តាប់កិច្ចសម្ភាសទាំងស្រុងដូចខាងក្រោម៖

គេសង្កេតឃើញថា សន្និសីទថ្នាក់ជាតិ ដែលរៀបចំឡើងដោយរដ្ឋសភា កាលពីថ្ងៃទី៨ ខែកក្កដានេះ មិនថា​ឡើយ ត្រឹមអង្គការសង្គមស៊ិវិលទេ សូម្បីតែអ្នកសារព័ត៌មានជាច្រើន ក៏មិនត្រូវបានអនុញាត ឲ្យចូល​យក​ព័ត៌មាន​ដែរ ក្រោមហេតុផលតែមួយគត់ ព្រោះគ្មាន«កាតពិសេស»។ សូមអានអត្ថបទនេះឡើងវិញ ដោយ​ចុចនៅលើទីនេះ៕