តុលាការឲ្យនាំខ្លួនឧកញ៉ា សុខ ប៊ុន រឿងវាយតប់កញ្ញា សាសា
- ដោយ: ដារី អត្ថបទ ៖ ដាវី ([email protected]) - ភ្នំពេញ ថ្ងៃទី ០៨ កក្កដា ២០១៥
- កែប្រែចុងក្រោយ: July 08, 2015
- ប្រធានបទ: យុត្តិធម៌
- អត្ថបទ: មានបញ្ហា?
- មតិ-យោបល់
-
សំនុំរឿងកក្រើកមេឃ របស់បុរសម្នាក់ ដែលគិតថាខ្លួនមានអំណាច និងដែលត្រូវបាន កាម៉េរ៉ាសុវត្ថិភាពមួយ ចាប់រូបភាព ពីការប្រើទង្វើហិង្សា លើអតីតពិធីការិនីទូរទស្សន៍ ស៊ីធីអិន កញ្ញា សាសា នោះ កំពុងត្រូវបានតុលាការចាត់វិធានការហើយ។ ប្រតិកម្មរបស់សាលាដំបូង មិនបាននៅដង្អក់ពេលយូរឡើយ ដោយនៅល្ងាចថ្ងៃទី០៨ ខែកក្កដា ឆ្នាំ២០១៥នេះ ព្រះរាជអាជ្ញារង លោក ហ៊ឹង ប៊ុនថន បានចេញដីកាបញ្ជាទៅសមត្ថកិច្ច នាយកដ្ឋាននគរបាលព្រហ្មទណ្ឌ នៃក្រសួងមហាផ្ទៃ ឲ្យនាំខ្លួនលោកឧកញ៉ា សុខ ប៊ុន ដើម្បីចូលឆ្លើយបំភ្លឺ ទាក់ទងករណីប្រើអំពើហិង្សា លើអតីតតារាទូរទស្សន៍។
ពាក្យបណ្ដឹងមួយ បានដាក់ទៅតុលាការ សាលាដំបូងរាជធានី ប្ដឹងចោទលោកឧកញ៉ា សុខ ប៊ុន ប្រធានក្រុមហ៊ុន តេហូ ឌឺវើឡូពើមិន (TEHO Development) និងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និងអង្គរក្សរបស់លោកផង ថាបានព្រួតគ្នា ប្រើអំពើហិង្សាយ៉ាងសាហាវព្រៃផ្សៃ ទៅលើអតីតពិធីការិនីទូរទស្សន៍ ស៊ីធីអិន កាលពីយប់រំលងអាធ្រាត ឈានចូលថ្ងៃទី០២ ខែកក្កដា ឆ្នាំ២០១៥ នៅក្នុងក្លឹបឡាហ្គេនបា ស្ថិតនៅសង្កាត់ទន្លេសាបាក់ ខណ្ឌចំការមន។
វីដេអូមានរយៈពេលជាង១នាទី ចាប់រូបដោយកាម៉េរ៉ាសុវត្ថិភាព ចំនួនពីរ ដែលត្រូវបានបង្ហោះ តាមបណ្ដាញសង្គម បង្ហាញឲ្យឃើញ ពីសកម្មភាពរបស់បុរសម្នាក់ ដោយមានជំនួយ ពីមនុស្សប្រុសម្នាក់ទៀត (ទំនងជាជំនិត ឬអង្គរក្ស) បានស្ទុះទៅចាប់បោចទាញសក់ កញ្ញា សាសា អូសចេញពីលើសាឡុង និងបានប្រើហិង្សា វាយតប់ទាត់ធាក់យ៉ាងចាស់ដៃ មកលើរូបនាងយ៉ាងអមនុស្សធម៌។ ក្នុងវីដេអូដដែល គេឃើញមនុស្សប្រុស ដែលទំនងជាជំនិត ឬអង្គរក្សនោះ មានកាន់កាំភ្លើងជាប់នឹងដៃ គម្រាមទៅលើ អតីតពិធីការិនីទូរទស្សន៍ នោះទៀតផង។
ស្រង់សម្ដីដោយសារព័ត៌មានក្នុងស្រុក កញ្ញា សាសា បានថ្លែងឲ្យដឹងថា ដំបូងឡើយ កញ្ញាមិនបានស្គាល់បុរស ដែលបានប្រើអំពើហិង្សា មកលើខ្លួននោះទេ។ ហើយនៅមុនពេលកើតហេតុ កញ្ញាបាននៅអង្គុយកំដរ មិត្តភ័ក្តិរបស់កញ្ញាម្នាក់ ជាថៅកែហាងជាតិជប៉ុន ដែលស្រវឹង។ បន្ទាប់ពីគ្រប់ភ្ញៀវ បានចេញពីក្នុងហាងអស់ ស្រាប់តែភ្ញៀវបុរសពីរនាក់ បានត្រឡប់មកក្នុងហាងវិញ ហើយបានចាប់អូសមិត្តភ័ក្តិ របស់កញ្ញាទាំងបង្ខំ ដើម្បីយកចេញទៅក្រៅ។ ប៉ុន្តែមិត្តភ័ក្តិរូបនោះ បានយំ និងបានស្រែកឲ្យកញ្ញាជួយ។ គឺពេលនោះហើយ ដែលហេតុការណ៍ នៃការប្រើប្រាស់អំណាច របស់មនុស្ស ដែលគិតថាខ្លួនមានអំណាច បានកើតឡើងយ៉ាងរន្ធត់ ទៅលើស្ត្រីភេទទន់ខ្សោយម្នាក់។
«កុំចេះ! ចង់ងាប់ហេះ?»
ការដង្ហោយរបស់មិត្តភ័ក្ដិ បានតម្រូវឲ្យកញ្ញា សាសា ចាំបាច់ត្រូវចូលទៅជួយ និងប្រាប់ទៅភ្ញៀវ ជាបុរសនោះ កុំឲ្យចាប់បង្ខំមិត្តភ័ក្តិកញ្ញាដូច្នេះ។ រំពេចនោះ អង្គរក្សរបស់ជននោះ បានស្រែកជេរម្រាយកញ្ញា និងបញ្ជាមកកញ្ញា ដោយមានកាំភ្លើងកាន់នៅដៃថា៖ «កុំចេះ! ចង់ងាប់ហេះ?»។ កញ្ញាបានបញ្ជាក់ទៀតថា នៅពេលដែលកញ្ញាគ្រាន់តែប្រាប់ កុំឲ្យជេរម្តាយរបស់កញ្ញានោះ ស្រាប់តែជនដែលគិតថា ខ្លួនមានអំណាចនោះ បានស្ទុះមកវ៉ៃកញ្ញា យ៉ាងកម្រោល ដូចឃើញនៅក្នុងវីដេអូ។
នៅក្នុងវីដេអូមួយទៀត ដែលត្រូវបានយកមកបង្ហោះ នៅលើបណ្ដាញសង្គមដែរ បានបង្ហាញថា មុននឹងការវាយតប់ បានកើតឡើង គេឃើញកញ្ញា សាសា ហាក់ដូចជាបានចោលវត្ថុអ្វីមួយ ទៅលើជននោះ។ ហើយទំនងជាកាយវិការនេះ ហើយ ដែលធ្វើឲ្យហេតុការណ៍វាយតប់ បានផ្ទុះឡើង។ ប៉ុន្តែយ៉ាងណា ក៏វាមិនស័ក្ដិសម នឹងការវាយតប់ ទាត់ធាក់ បោចសក់ ប្រកបដោយភាពតក់ស្លុត យ៉ាងដូច្នេះឡើយ។
កញ្ញា សាសា បានថ្លែងប្រាប់សារព័ត៌មាននោះ ទៀតថា៖ «វ៉ៃខ្ញុំអូសរហូតដល់ ៥ ទៅ ៦ម៉ែត្រ។ វ៉ៃខ្ញុំមិនតិចជាង ៥នាទីទេ។ គាត់ទុកខ្ញុំ ដូចសត្វធាតុ។ នេះបើអត់មានអ្នករត់តុជួយ ខ្ញុំប្រហែលជាអាចស្លាប់បាត់ហើយ។»
នៅភ្លាមៗនេះ ទស្សនាវដ្ដីមនោរម្យ.អាំងហ្វូ មិនអាចស្វែងរកការទាក់ទង ឲ្យបកស្រាយជុំវិញករណីខាងលើ ពីភាគីលោកឧកញ៉ា សុខ ប៊ុន បាននៅឡើយ។ ប៉ុន្តែសម្រាប់សមត្ថកិច្ចនាយកដ្ឋាននគរបាលព្រហ្មទណ្ឌវិញ កំពុងចាត់វិធានការ ដើម្បីស្វែងរកលោកឧកញ៉ា សុខ ប៊ុន មកប្រគល់ជូនតុលាការ ដូចមានចែងនៅក្នុងដីកា ឲ្យស្វែងរកចាប់ខ្លួន របស់ព្រះរាជអាជ្ញារងស្រាប់៕
» សូមទស្សនាវីដេអូ ដែលចាប់រូបដោយកាម៉េរ៉ាសុវត្ថិភាព ដូចតទៅ៖