ទីបំផុតទៅ លោកនាយករដ្ឋមន្រី ហ៊ុន សែន បានសរសេរសំបុត្រ ស្នើទៅអគ្គលេខាធិការ អង្គការសហ​ប្រជា​ជាតិ លោក បាន គីមូន ដើម្បីសុំខ្ចីផែរនទីខ្នាត ១/១០០ ០០០ ដែលបានបោះពុម្ព ដោយក្រុមភូមិសាស្ត្រ​ឥណ្ឌូចិន និងកំពុងតម្កល់ទុក នៅអង្គការសហប្រជាជាតិ។

ក្នុងលិខិតចុះថ្ងៃទី៦ ខែកក្កដា ឆ្នាំ២០១៥ លោក ហ៊ុន សែន បានសរសេរបញ្ជាក់ថា ការខ្ចីផែនទីនេះ ក្នុង​គោល​បំណង យកមកផ្ទៀងផ្ទាត់ បញ្ជាក់ពីភាពត្រឹមត្រូវ ពិតប្រាកដជាមួយនឹងផែនទី ដែលរាជរដ្ឋាភិបាលកម្ពុជា បាន​នឹងកំពុងប្រើប្រាស់ ដើម្បីកំណត់ព្រំដែនគោក ព្រំដែនទឹក រវាងកម្ពុជា និងប្រទេសជិតខាង និងដើម្បីបង្ហាញ ពីបុព្វហេតុសន្តិភាព និងស្ថិរភាពក្នុងតំបន់។

លោកនាយករដ្ឋមន្រ្តីកម្ពុជា បានលើកយកមាត្រា២ ក្នុងរដ្ឋធម្មនុញ្ញ ដែលជាច្បាប់កំពូលរបស់កម្ពុជា មក​បញ្ជាក់​ថា៖ «បូរណភាពទឹកដី របស់ព្រះរាជជាណាចក្រកម្ពុជា មិនអាចរំលោភបានដាច់ខាត ក្នុងព្រំដែន​របស់​ខ្លួន ដែល​មាន​កំណត់ ក្នុងផែនទីខ្នាត ១/១០០ ០០០ ធ្វើនៅចន្លោះឆ្នាំ១៩៣៣-១៩៥៣ ហើយដែលត្រូវបាន​ទទួល​ស្គាល់ ជាអន្តរជាតិ នៅចន្លោះឆ្នាំ១៩៦៣ ដល់ឆ្នាំ១៩៦៩»។

ជាមួយគ្នានេះដែរ លោកនាយករដ្ឋមន្រ្តីបានធ្វើការរំលឹកថា អតីតព្រះប្រមុខរដ្ឋ នៃព្រះរាជជាណាចក្រកម្ពជា ព្រះបរមរតនកោដ្ឋ (ព្រះបាទ នរោត្តម ស៊ីហនុ) បានយកផែនទីបោះពុម្ភ ដោយក្រុម ភូមិសាស្រ្តឥណ្ឌូចិន ខ្នាត​១/១០០ ០០០នេះ ទៅតម្កល់ទុកនៅ អង្គការសហប្រជាជាតិ ដោយបានអំពាវនាវ ឲ្យមានការធានារ៉ាប់រង ពី​សំណាក់មហាអំណាចនានា ក្នុងការគោរពបូរណភាពទឹកដីកម្ពុជា តាមផ្លូវច្បាប់អន្តរជាតិ និងឲ្យទទួលស្គាល់ ព្រមទាំងគោរពឯករាជ្យ អព្យាក្រឹត្យភាព បូរណភាពទឹកដីកម្ពុជា ក្នុងរង្វង់ខ្សែព្រំដែនបច្ចុប្បន្ននាពេលនោះ ដោយ​បានប្រកាសដាច់ខាតថា ខ្សែព្រំដែននេះ មិនអាចសើរើ និងកែប្រែបានឡើយ។

លោកសម រង្ស៊ី ប្រធានគណបក្សសង្គ្រោះជាតិ ដែលជាគណបក្សប្រឆាំង ធ្លាប់បានលើកឡើងថា លោកនឹង​ទាមទារ ឲ្យរដ្ឋាភិបាលកម្ពុជាបញ្ជាក់ថា ផែនទីដែលខ្លួន បាននឹងកំពុងអនុវត្តន៍ ជាមួយបណ្តាប្រទេស​ជិតខាង​នោះ ជាផែនទីផ្លូវការ ដែលបានតំកល់ទុក នៅអង្គការសហប្រជាជាតិ ខណៈលោក វ៉ា គឹមហុង ក្នុង​សន្និសីទ​សារព័ត៌មានថ្មីៗនេះ បានទទួលស្គាល់ថា ផែនទីដែលកម្ពុជាកំពុងតែអនុវត្ត ជាផែនទីបោះដោយ ប្រទេស​វៀតណាម។

» សូមអានអត្ថន័យទាំងស្រុង នៃលិខិត របស់លោកនាយករដ្ឋមន្រ្តីកម្ពុជា ដូចខាងក្រោម៖