ការប្រកួតផ្ដាច់ព្រ័ត្រ នៃការប្រកួតបាល់ទាត់ ដណ្ដើមពានរង្វាន់ពិភពលោក ផ្នែកនារីឆ្នាំ២០១៥ កាលពីថ្ងៃ​អាទិត្យ គឺជាការសងសឹកមួយ ដែលក្រុមកីឡាការិនីអាមេរិក បានយកជ័យជំនះ ទៅលើក្រុមបាល់ទាត់ មកពី​ប្រទេសជប៉ុន​ ក្នុងពិន្ទុ៥ ទល់នឹង ២។ ក្នុងរយៈពេលដែល១៦នាទីដំបូង នៃការប្រកួតប៉ុណ្ណោះ ក្រុម​អាមេរិក​បានសម្លាប់ក្រុមជប៉ុន មិនឲ្យងើបមុខរួច ជាមួយនឹងគ្រាប់បាល់ ដល់ទៅ៤គ្រាប់ ក្នុងនោះ៣គ្រាប់ ជារបស់​កីឡាការិនី ខ្សែរបម្រើ នាង ការលី ឡយ។

គ្រាប់បាល់របស់នាង ការលី សុទ្ធតែជាគ្រាប់បាល់ល្អៗ មានកម្លាំង និងប្រកបដោយទេពកោសល្យ ដែល​កីឡាករជាបុរស ល្បីៗក្នុងលោកត្រូវតែសុំខ្មាស។ ជាពិសេស គ្រាប់បាល់ទីបួន របស់ក្រុម​អាមេរិក​ត្រូវបាន​នាងទាត់បញ្ចូល ទីរបស់ក្រុមជប៉ុន តាំងពីពាក់កណ្ដាលទីលាន ពោលគឺមានចំងាយប្រមាណជា ៥០ម៉ែត្រ។ ប៉ុន្តែមិនខុសទេ ព្រោះកីឡាការិនីរូបនេះ ត្រូវបានជ្រើសរើស ឲ្យក្លាយជាកីឡាការិនីបាល់ទាត់ ដ៏ល្អជាងគេ នៅ​ក្នុងការជួបប្រកួត កម្រិតពិភពលោក នាឆ្នាំនេះ។

ក្រុមជប៉ុនបានខិតខំ ងើបត្រឡប់មកវិញដែរ ដោយរកបានពិន្ទុ ២គ្រាប់ (នាទី២៧ និងនាទី ៥២ - នាទី៥២ រក​បានដោយក្រុមអាមេរិក យកក្បាលបុកបាល់ ចូលទីខ្លួនឯង) ប៉ុន្តែមិនគ្រប់គ្រាន់ទេ ព្រោះនៅ២នាទី ក្រោយ​មក ក្រុមអាមេរិកបានរកបានមួយគ្រាប់ទៀត ដែលធ្វើឲ្យក្រុមនេះ មានពិន្ទុនាំមុខ ៥ទល់នឹង២។

ជ័យជំនះរបស់ក្រុមបាលទាត់អាមេរិក ផ្នែកនារីលើកនេះ ជាជ័យជំនះលើកទី៣ហើយ នៅក្នុងប្រវត្តិសាស្ត្រ​របស់ប្រទេសមហាអំណាច ហើយក៏ជាជាការប្រកួត នៅវគ្គផ្ដាច់ព្រ័ត្រមួយ ដែលមានលក្ខណៈស្រួចស្រាវ បង្កការហ៊ោកញ្ច្រៀវ យ៉ាងអឺងកង ពីសំណាក់ទស្សនិកជន ប្រមាណជា ៥៣ ០០០នាក់ នៃកីឡាដ្ឋាន «BC Place Stadium» របស់ក្រុង «Vancouver» ប្រទេសកាណាដា៕