រូបភាពទាំងនោះ បានបង្ហាញជាដំបូងឡើយ ឃើញជនសង្ស័យ ដែលមានឈ្មោះ សេហ្វៀឌីន រ៉េជហ្គី (Seifeddine Rezgui) បានដើរយ៉ាងស្ងៀមស្ងាត់ នៅតាមបណ្ដោយឆ្នេរ នៃក្រុង សូស្សេ (Sousse) ជាប់​នឹង​សណ្ឋាគាររងគ្រោះ។ ជនសង្ស័យធ្វើខ្លួន ដូចជាទើបនឹងងើប ចេញពីងូតទឹក។ ហើយនៅពីក្រោយ មាន​មនុស្ស​ជាង១០នាក់ ដូចជាកំពុងលើកដៃប្រាប់ទៅអ្នកផ្សេង ឲ្យឆាប់ងើបគេចចេញ។

សាក្សីជាច្រើននាក់ ដែលត្រូវបានទូរទស្សន៍«Sky News» យកមកស្រង់សម្ដីនោះ បានឲ្យដឹងថា ជនសង្ស័យ​បានលាក់អាវុធរបស់ខ្លួន នៅក្នុងឆ័ត្រការពារកម្ដៅថ្ងៃ ហើយបានចូលទៅក្នុងទឹក មុននឹងងើបចេញមកវិញ ដោយបានដកកាំភ្លើងបាញ់តម្រង់ ទៅអ្នកទេសចរណ៍។ អ្នកសារព័ត៌មានរបស់របស់ស្ថានីយ៍ទូរទស្សន៍ បាន​រៀបរាប់ថា៖ «ជនសង្ស័យ មាន"ឈាមត្រជាក់" មិនគួរឲ្យជឿបានទេ។ ជននេះបានរករឿងស្ត្រីម្នាក់ មុននឹង​បាញ់​សម្លាប់នាង តែក្នុងពេលមួយពព្រិចភ្នែកប៉ុណ្ណោះ។»

ជាការរំលឹកឡើងវិញ នៃតុល្យភាពបណ្ដោះអាសន្ន បានបង្ហាញថា នៅថ្ងៃសុក្រទី២៦ ខែមិថុនាសប្ដាហ៍​កន្លង​មកនេះ មនុស្ស៣៨នាក់ ត្រូវបានសម្លាប់ ក្នុងនោះ១៥នាក់ ជាជនជាតិអង់គ្លេស និង៣៩នាក់ផ្សេង​ទៀតរង​របួស។ ជនសង្ស័យ ត្រូវបានបាញ់សម្លាប់ ដោយគ្រាប់កាំភ្លើងបាញ់ពីចំងាយ របស់នគរបាល នៃប្រទេស​តួនេស៊ី។ ការវាយប្រហារភេវរកម្មលើកនេះ ត្រូវបានប្រកាសទទួលស្គាល់ ដោយអង្គការរដ្ឋអ៊ីស្លាម នៅមួយថ្ងៃ​ក្រោយមក ហើយបានក្លាយជាការវាយប្រហារ ដែលមានមនុស្សស្លាប់ដ៏រង្គាល បួនខែក្រោយការវាយប្រហារ​លើកមុន ទៅលើសារមន្ទីរបារដូ កណ្ដាលរដ្ឋធានីតួនីស (នៃប្រទេសតួនេស៊ី) ដែលបានធ្វើឲ្យ ទេសចរណ៍​បរទេស ២១នាក់ស្លាប់៕

» វីដេអូផ្សេងទៀត ដែលបង្ហាញពីសកម្មរបស់ជនសង្ស័យ នៅក្នុងការវាយប្រហារ កាលពីថ្ងៃសុក្រ៖