ជាហេតុការណ៍មួយ ដែលធ្វើឲ្យញាប់ញ័រ ដូចនៅក្នុង ភាពយន្ដភ័យខ្លាចមួយដូច្នេះ។ កាលពីថ្ងៃសៅរ៍​ម្សិល​ម៉ិញនេះ មនុស្សជាង២០០នាក់ បានរងរបួស ពីក្នុងការផ្ទុះមួយ ដែលបានកើតឡើង ក្នុងមណ្ឌល​កំសាន្ដ​មួយ​កន្លែង នៃក្រុងតៃប៉ិថ្មី កោះតៃវ៉ាន។ ជនរងគ្រោះ ចំនួនជិតពាក់កណ្ដាល បានរងរបួស ដោយការរលាក។ ហេតុការណ៍នេះ ត្រូវបានថតជាប់ នៅក្នុងវីដេអូជាច្រើន ហើយបានត្រូវ​ទូរទស្សន៍ក្នុងស្រុក យកមកចាក់ផ្សាយ ដោយ​បង្ហាញពីរូបភាព មានភ្លើងឆេះ ខណៈការរត់គេចចេញ របស់ហ្វូងមនុស្ស បានធ្វើឡើង យ៉ាងជ្រួល​ច្របល់។ មនុស្សមួយចំនួន បានរត់ភៀសខ្លួន ទាំងខ្លួនមានត្រឹម តែខោអាវខ្លីប៉ុណ្ណោះ។

បើតាមរបាយការណ៍របស់អាជ្ញាធរ បានឲ្យដឹងថា ជនរងគ្រោះទាំងអស់ ដែលមានចំនួន២២៩នាក់ ត្រូវបាន​បញ្ជូនទៅសម្រាកព្យាបាល នៅមន្ទីរពេទ្យចំនួនបី នៅក្នុងក្រុង និងនៅតំបន់ជុំវិញ។ មនុស្សចំនួន៩៧នាក់ បាន​រងការរលាក។ ខាងអ្នកជួយសង្គ្រោះវិញ បានអះអាងភ្លាមៗ បន្ទាប់ពីកើតហេតុថា មានអ្នករបួសធ្ងន់ ចំនួន​៨១នាក់។

មូលហេតុនៃការផ្ទុះ...

អ្នកនាំពាក្យ នៃក្រុមជួយសង្គ្រោះ បានឲ្យដឹងថា ការផ្ទុះទំនងជាកើតឡើង ពីការ«បាចម្សៅ»។ ការឆេះជា​អណ្ដាត​ភ្លើង រហូតមានការផ្ទុះនេះ អាចពន្យល់បាន ដោយសារកំដៅខ្លាំង ដែលចេញមក ពីស្ពតបាញ់ភ្លើង នៅ​លើ​ឆាក។ ឆាកសម្ដែងនោះ ជាផ្នែកទស្សនីយភាពមួយ នៃមណ្ឌលកំសាន្ដលេងទឹក ដែលមានឈ្មោះ «Formosa Fun Coast»។

ប៉ុន្តែអណ្ដាតភ្លើង ដែលបានឆាបឆេះ ត្រូវបានពន្លត់ទៅវិញ ក្នុងពេលដ៏ខ្លី។ បើតាមសាក្សីមួយរូប ដែលបាន​រៀបរាប់ប្រាប់ទូរទស្សន៍ក្នុងស្រុក បានថ្លែងឡើងថា៖ «វាបានចាប់ផ្ដើមឡើង ពីផ្នែកខាងឆ្វេង នៃឆាក។ ដំបូង​ឡើយ ខ្ញុំស្មានតែរឿងនេះ វាបានកើតឡើង ជាមួយនឹងឈុតឆាកធម្មតា។ បន្ទាប់មក ខ្ញុំបានដឹងថា ដូចជាមាន​រឿងមិនស្រួល ហើយមនុស្សចាប់ផ្ដើមស្រែក និងខ្លះទៀតរត់គេចចេញពីទីនោះ។»

អភិបាលក្រុង តៃប៉ិថ្មី (New Taipei) លោក អេរិក ជូ (Eric Chu) បានសម្ដែងការសោកស្ដាយរបស់លោក ហើយទាមទារឲ្យមានការស៊ើបអង្កេត ដ៏ច្បាស់លាស់មួយ ពីហេតុការណ៍នេះ។ លោកបានថ្លែង ទៅកាន់​អ្នកសារព័ត៌មានថា៖ «យើងមានទុក្ខកង្វល់ណាស់ និងសោកស្ដាយ ពីគ្រោះថ្នាក់នេះ»៕

» វីដេអូផ្សេងទៀត ពីព្រឹត្តិការណ៍នេះ៖