នាព្រឹកថ្ងៃទី២៥ ខែមិថុនានេះ នៅចំណុចព្រំប្រទល់ខណ្ឌដូនពេញ និងខណ្ឌចំការមក មុខមជ្ឈមណ្ឌលភ្នំពេញ ក្រុមយុវជនចលនា មាតាធម្មជាតិចំនួនបីនាក់ មានឈ្មោះ លោក សន ចាន់តារា, លោក ឌឹម គុណឌី, លោក មាស ហេង រួមនិងមន្រ្តីសមាគមអាដហុកម្នាក់ទៀត ឈ្មោះ ឌិត សុធី ត្រូវបានចាប់ និងបញ្ជូនខ្លួន ទៅកាន់​សាលា​ខណ្ឌចំការមន។

ក្រុមសន្តិសុខ ប្រមាណជិត១០០នាក់ មកពីខណ្ឌចំនួនពីរខាងលើ ដឹកនាំដោយអភិបាលរងខណ្ឌចំការមន លោក ជរ គឹមស៊រ បានពង្រាយ និងបញ្ជាទៅកម្លាំងសន្តិសុខទាំងនោះ ឲ្យចូលទៅបំបែក ការជួបជុំ​របស់​ក្រុម​យុវជន នៅចំណុចមុខមជ្ឈមណ្ឌលពាណិជ្ជកម្មកូរ៉េ  ដែញក្រុមយុវជនទាំងនោះ បានជួបជុំគ្នា រហូតមកដល់មុខ​មជ្ឈមណ្ឌលភ្នំពេញ ។

នៅចំបោះការជួបជុំគ្នានេះ អភិបាលរងខណ្ឌចំការមន ចេញបញ្ជាជាថ្មី ដោយគម្រាមថា បើសិនជាក្រុមយុវជន​ទាំងនោះ មិនចេញទេ នឹងធ្វើការចាប់ខ្លួន។ ប៉ុន្តែលោកអភិបាលរង មិនទាំងទម្លាក់សំដីចប់ផង ក្រុមសន្តិសុខ ដែលជាកូនចៅរបស់លោកអភិបាលរងនោះ បានចូលទៅចាប់ខ្លួនក្រុមយុវជន និងមន្រ្តីសិទ្ធិមនុស្ស​អាដហុក​ទាំង​នោះ​ភ្លាមៗ។

មិនត្រឹមតែអ្នកតវ៉ាទេ តែលោកអភិបាលរង ក៏បានបញ្ជារទៀតដែរថា គ្រប់អ្នកសារព័ត៌មានទាំងអស់ ដែលចូល​មកថតរូប និងសកម្មភាពទាំងនេះ ដោយមិនមានប័ណ្ឌ អ្នកសារព័ត៌មាននោះ នឹងរងការចាប់ខ្លួនដូចគ្នា។ យ៉ាង​ណាក៏ដោយ មិនមានអ្នកសារព័ត៌មានណាម្នាក់ ត្រូវបានចាប់ខ្លួនទេ ដោយសារអ្នកសារព័ត៌មានមួយចំនួន បាន​រួញ​ខ្លួននៅចំពោះការព្រមាន និងខ្លះទៀត ដែលគ្មានកាត បានដកខ្លួនថយទៅវិញ។

នាព្រឹកថ្ងៃទី២៥ ខែមិថុនាដដែលនេះ នៅមុខវិមានរដ្ឋសភាជាតិ ក៏មានកម្លាំងសមត្ថកិច្ចមួយចំនួន រួមទាំង​រនាំង​ដែក ដាក់បិទផ្លូវមុខរដ្ឋសភាទាំងមូល ដោយមិនអនុញ្ញាត ឲ្យក្រុមយុវជនចលនាមាតាធម្មជាតិទាំងនោះ ចូល​ទៅ​ដាក់ញត្តិ ដល់តំណាងរាស្រ្តឡើយ។

ព័ត៌មានលំអិត ទាក់ទងនឹងការចាប់ខ្លួនក្រុមយុវជន និងមន្រ្តីសិទ្ធិមនុស្សនេះ ទស្សនាវដ្តីមនោរម្យ.អាំងហ្វូ​នឹង​ធ្វើការចុះផ្សាយ ក្នុងអត្ថបទលើកក្រោយ៕