ហេតុការណ៍នេះ បានកើតឡើង នៅតាមបណ្តោយផ្លូវ ព្រៃស ក្នុងសង្កាត់ដង្កោ ខណ្ឌដង្កោ រាជធានីភ្នំពេញ នៅ​ត្រង់ចំណុច​អាគារពណ៍ខៀវមួយ ដែលមានឈ្មោះអក្សរធំៗថា «B.D.D»។ ប្រភពព័ត៌មាន បានឲ្យដឹងថា បុរស​រងគ្រោះឈ្មោះ យ៉ត សារិទ្ធ អាយុ ៣៥ឆ្នាំ សព្វថ្ងៃជាជាងកញ្ចក់ ហើយបានមកដាក់កញ្ចក់ ឲ្យអាគាខាងលើ។

នៅមុនពេលកើតហេតុ អ្នករស់នៅជិតនោះ បានប្រាប់ថា ជាងកញ្ចក់រូបនេះ ឡើងដាក់កញ្ចក់ដូចរាល់ដង តែ​ម្តងនេះបានឈរលើ បន្ទារឈើ នៅពេលដាក់កញ្ចក់ ដល់ម៉ោងប្រមាណ ជា១៣រសៀល ថ្ងៃទី១៦ ខែកញ្ញានេះ ក៏ស្រាប់តែ បានប៉ះជាមួយខ្សែរភ្លើង ដែលនៅជិតខ្សែរជាច្រើនទៀត បង្កឲ្យឆក់ជាងកញ្ចក់ ភ្លាមមួយរំពេច។

អ្នកឃើញហេតុការណ៍បន្តថា នៅពេលភ្លាមបុរសរងគ្រោះ បានធ្លាក់ចុះមកក្រោម ព្រោះមិនមានប្រដាប់បំពាក់ សម្រាប់ការពារខ្លូន។ ប្រាណទាំងមូល បានកប់ទៅក្នុងខ្សាច់ ចំណែកឯកញ្ចក់ធ្លាក់បែកបាក់ នៅជុំវិញខ្លូន យ៉ាង​អណោចអធ័ម។ ភ្លាមៗនោះ នៅពេលដឹងថា ជាងកញ្ចក់ធ្លាក់ពីលើអាគារ ម្ចាស់ផ្ទះដែលកំពុងសាងសង់ បាន​បិទទ្វារ មិនចេញមកជួយ ជាងរងរបួសធ្ងន់នោះទេ។ សំណាងល្អ ដែលមានអ្នកជិតខាងបានមើលឃើញ បាន​ជួយ សង្គ្រោះជនរងគ្រោះខាងលើ ដោយហៅឡានសង្គ្រោះបន្ទាន់ របស់មណ្ឌលសុខភាពដង្កោ ដើម្បី​បញ្ជូន​មក​មន្ទីពេទ្យរ៉ូស្ស៊ីភ្លាមៗ។

អ្នកជិតខាងនៅទីតាំងកើតហេតុ បានបញ្ជាក់ជាចុងក្រោយថា ម្ចាស់ផ្ទះ ហាក់មិនគិតគូរពីជាង ដែលធ្វើការ​ឲ្យ​ខ្លួន តែបែរជាគេចយករួចខ្លូន មួយគ្រាសិន។ ភ្លាមៗនេះ គេនៅមិនទាន់ដឹងថា តើអាជ្ញាធរ នឹងមានចំណាត់ការ​យ៉ាងណា ចំពោះករណីនេះនៅឡើយ៕