ជារៀងរាល់សប្ដាហ៍ នាង ណៃស្សា ជិបសុន រស់នៅក្នុងក្រុង តូតេនហាម (Tottenham) ចក្រភពអង់គ្លេស ត្រូវ​បានទុកប្រាក់ ១៤០អ៊ឺរ៉ូ (ប្រមាណជា ១៦០ដុល្លា) ដាក់ដោយឡែក ពីការចំណាយប្រចាំថ្ងៃរបស់ខ្លួន។ ដូច្នេះ សម្រាប់រយៈពេលមួយខែ នាងអាចសន្សំប្រាក់ បានចំនួន១ភាគ៤ នៃប្រាក់ជំនួយរបស់រដ្ឋ ដែលជួយនាង ពេល​គ្មានការងារធ្វើ។ ធ្វើយ៉ាងណា នាង ជីបសុន ត្រូវរកប្រាក់ឲ្យបានគ្រប់ នៅក្នុងរយៈពេល២ឆ្នាំ ដើម្បី​ធ្វើ​សុដន់​​របស់​នាង ឲ្យនៅតែក្បំ ដូចកាលពីនាង មានអាយុមុន១៨ឆ្នាំ។ នេះបើតាមសេចក្ដីរាយការណ៍ របស់​សារព័ត៌មាន​អង់គ្លេស Daily Mirror។

ប៉ុន្តែបញ្ហា វាមិនមែនមានត្រឹម តែការសន្សំប្រាក់ប៉ុណ្ណេះទេ ព្រោះនាង ជិបសុន បានធ្វើការលះបង់​យ៉ាង​ច្រើន​ទៀត មានដូចជា ការបញ្ឈប់ទិញអាហារពេល ឲ្យកូនរបស់នាង ដែលមានចំនួន៤នាក់ សឹងជារៀងរាល់​ចុង​ខែ។

«ខ្ញុំក៏បានអត់បាយពេល ដូចគ្នាដែរ»

ស្ត្រីដែលរស់នៅ តែជាមួយកូនរូបនេះ បានបង្អត់ខ្លួនឈប់ទិញខោអាវ សម្ភារៈសិក្សា ឬក៏ដំណើរសិក្សា ចេញ​ទៅ​វិស្សមកាល របស់កូននាង ដែលមានអាយុពី១ឆ្នាំ ដល់១៤ឆ្នាំ។ ហើយដោយសារតែបែបនេះ នៅពេលខ្លះ នាង​ត្រូវនាំកូនទាំងនេះ ទៅផ្ទះឪពុកម្ដាយរបស់នាង គ្រាន់នឹងមានអាហារញ៉ាំ។ អះអាងជាមួយ​សារព័ត៌មាន នាង​បាន​ថ្លែងការពារទង្វើរបស់ខ្លួនថា៖ «ខ្ញុំមើលមិនឃើញ ពីរឿងអាក្រក់អ្វីទេ នៅពេលដែលខ្ញុំប្រើប្រាស់ ប្រាក់​សន្សំ​ទាំងនោះ ដើម្បីការវះកាត់សុដន់នោះ»។

នាង ជិបសុន បានពន្យល់ទៀតថា៖ «ខ្ញុំបានកំណត់ច្បាស់ហើយថា នឹងសម្រេចក្ដីសុបិន្ដរបស់ខ្ញុំឲ្យបាន បើ​ទោះ​ជារឿងនេះ ប៉ះពាល់ដល់ថវិកាខ្លះ សម្រាប់កូនខ្ញុំក៏ដោយ»។ ចុះ មានគិតថា ខ្លួនខុសចំពោះកូនឬទេ? នៅ​ចំពោះ​សំនួររបស់អ្នកកាសែត នាងឆ្លើយថា៖ «ខ្ញុំក៏បានអត់បាយពេល ដូចគ្នាដែរ»។

កាលពីខែមករាកន្លងទៅ នាង ជិបសុន បានប្រមូលប្រាក់សន្សំរបស់នាង ប្រមាណជាង៦០០០អ៊ឺរ៉ូ (ប្រមាណ​ជា៧០០០ដុល្លា) ដើម្បីធ្វើការវះកាត់ដើមទ្រូងនេះ នៅប្រទេសប៉ូឡូញ។ ប៉ុន្តែជាលទ្ធផល នាងមិនបាន​ពេញ​ចិត្តទេ។ នាងនិយាយថា៖ «ការប្រឹងអត់ទាំងនេះ មិនមានប្រយោជន៍ ត្រឡប់មកវិញសោះ។ ឥឡូវ ខ្ញុំគ្រាន់​តែ​ចង់កែ ដើមទ្រូងរបស់ខ្ញុំប៉ុណ្ណោះ។»

ចង់កែ«សុដន់»បន្តទៀត? តែសង្ឃឹមទៅលើអ្វី? បើប្រាក់សន្សំមុនរបស់នាង ត្រូវបានចំណាយអស់ហើយ​នោះ? នាងនៅតែអះអាងថា ប្រាក់ជំនួយខាងសុខភាពពលរដ្ឋ របស់រដ្ឋអង់គ្លេស អាចជាក្ដីសង្ឃឹមចុងក្រោយ ថា​នឹង​ជួយនាងពីបញ្ហានេះ។ នាងនិយាយថា៖ «ខ្ញុំជាពលរដ្ឋអង់គ្លេស ខ្ញុំគួរតែមានសិទ្ធិ ទទួលបានការព្យាបាល នូវ​អ្វី​ដែល​ខ្ញុំ​ត្រូវការ»៕

» រូបថតនាង ជិបសុន នៅទំព័រមុខ នៃសារព័ត៌មានអង់គ្លេស៖