បន្ទាប់ពីបញ្ចប់សិក្ខាសាលា ដែលរៀបចំឡើង ដោយសង្គមស៊ីវិលជាង២០០ នាព្រឹកថ្ងៃទី២១ ខែឧសភានេះ លោក ម៉ម ប៊ុននាង អ្នកនាំពាក្យព្រឹទ្ធិសភា ដែលមានវត្តមានចូលរួមដែរនោះ បានលើកឡើងថា ក្នុងនាមលោកផ្ទាល់ លោកគាំទ្រនូវ​ជំហររបស់រដ្ឋាភិបាល ដែលបង្កើត ឲ្យមាននូវច្បាប់គ្រប់គ្រង អង្គការ សមាគមនេះ។ លោកបានចាត់ទុកថា ច្បាប់នេះ នឹង​មាន«ភាពវិជ្ជមាន»សម្រាប់ប្រទេស ដែលមានអង្គការសមាគមច្រើន។ លោកថា កម្ពុជាមិនត្រូវការពន្យា​ពេលវេលា​ឲ្យ​ទៅ​មុខ ដោយឥតប្រយោជន៍ឡើយ ក្នុងនោះ រួមទាំងការអភិវឌ្ឍន៍នានា និងច្បាប់នានាផង។

ក្នុងកិច្ចសម្ភាស ជាមួយអ្នកសារព័ត៌មាន នាសណ្ឋាគារកាំបូឌីយ៉ាណា មន្រ្តីនាំពាក្យព្រឹទ្ធិសភារូបនេះ បានពន្យល់ថា៖ «សង្គម​ជាតិយើង សំខាន់ណាស់ឲ្យឈានទៅនិតិរដ្ឋ។ អ្វីៗ គ្រប់គ្រងដោយច្បាប់ អនុវត្តដោយច្បាប់។ (...) ការអភិវឌ្ឍន៍​ជាតិ ឈានទៅជាលំដាប់ ឫការកសាងច្បាប់ ក៏ឈានទៅជាលំដាប់ដែរ មិនអាចឈប់បានទេ។ (...) ពន្យាធ្វើអ្វីទៀត? សម្រាប់​ការអភិវឌ្ឍន៍ប្រទេសជាតិ ដំណាក់កាល ឈានឡើងទៅជាលំដាប់ ឯការកសាងច្បាប់ ក៏ឈានទៅជាលំដាប់ដែរ។»

ដោយឡែកអ្នកស្រី រស់ សុភាព នាយកប្រតិបត្តិអង្គការយេនឌ័រ និងអភិវឌ្ឍន៍ ដើម្បីកម្ពុជា (GAD/C) ទទួលស្គាល់ ក្នុងការ​បង្កើតឲ្យមានច្បាប់ ស្តីពីសមាគម និងអង្គការមិនមែនរដ្ឋាភិបា លនេះ។ តែអ្វី ដែលជាការព្រួយបារម្ភ របស់សង្គមស៊ីវិល​នោះ នៅត្រង់ថារដ្ឋាភិបាល កំពុងដាក់ច្បាប់ នៅឲ្យស្ថិតនៅឆ្ងាយ ពីភាគីពាក់ព័ន្ធ អាចរហូតដល់ច្បាប់នេះ ចូលក្នុងដៃ​រដ្ឋ​សភា​តែម្តង។ យ៉ាងណា អ្នកស្រី សុភាព បានថ្លែងក្ដីសង្ឃឹមថា ច្បាប់នោះ នឹងមិនធ្វើឡើង ដើម្បីរិតត្បិតសិទ្ធិ និង​សេរីភាព​របស់ប្រជាពលរដ្ឋ និងអង្គការសង្គមស៊ីវិលនោះទេ។

ភាពអាថ៌កំបាំង នៃច្បាប់មួយនេះ កំពុងកើតមាននៅឡើយ ដោយសារតែអង្គការ សង្គមស៊ីវិលទាំងនោះ ក៏ពុំទាន់ទទួល​បាន​ព័ត៌មាន ណាមួយជាក់លាក់ ឬផ្លូវការ ពីរដ្ឋាភិបាលនៅឡើយ ពាក់ព័ន្ធ នឹងសេចក្តីព្រាងច្បាប់នេះ បើគិតមកទល់បច្ចុប្បន្ន ដែល​ឈានមកដល់ ដំណាក់ការទី៤ និងមានរយៈកាល ជាងពីរឆ្នាំមកហើយនោះ។ អ្នកស្រី រស់ សុភាព បានថ្លែងទៀតថា៖ «សេចក្តី​ព្រាងច្បាប់នេះ មិនបានយកមកពិភាក្សា ឲ្យបានទូលំទូលាយ ជាមួយប្រជាពលរដ្ឋ និងសង្គមស៊ីវិលទេ។ អញ្ចឹង វាមាន​លក្ខណៈចង្អៀត សម្រាប់យើង ហើយយើងមិនដឹងថា ច្បាប់នេះមានលក្ខណៈ (...) និងការរៀបចំ វាមិន​ទាន់មាន​តម្លាភាព។ (...) ពេលច្បាប់នេះចេញ ខ្មែរជាង១៤ ១៥លាននាក់ ត្រូវទទួលផលប្រយោជន៍ ពីច្បាប់ហ្នឹង។ (...) ការមិន​ចូល​រួម របស់​ប្រជា​ពលរដ្ឋ ឲ្យទូលំទូលាយ ផលប្រយោជន៍ ដែលទទួលបាន ក៏មិនទូលាយដែរ។ (...) ភាពមិនទូលំទូលាយនេះ អាចបង្ក​ឲ្យ​មាន​បញ្ហា។»

ជាមួយនឹងករណីនេះដែរ លោក ហេង ភក្តី នាយកប្រតិបត្តិស្តីទី របស់វេទិការនៃអង្គការ មិនមែនរដ្ឋាភិបាលស្តីពីកម្ពុជា បានបន្ថែមថា អង្គការសង្គមស៊ីវិលដើរតួ និងចូលរួមយ៉ាងសកម្ម ក្នុងការអភិវវឌ្ឍន៍ប្រទេស។ ដូច្នេះបើច្បាប់មួយនេះ បាន​ចង​ដោយរឹតត្បិតសិទ្ធិ និងសេរីភាពនោះ នោះហើយ ដែលជាការព្រួយបារម្ភ និងត្រូវស្វែងរកការដោះស្រាយ។ លោកបាន​បញ្ជាក់ដូច្នេះថា៖ «បើច្បាប់ដែលចេញមកនោះ វារិតត្បិតសិទ្ធិ និងសេរីភាព ក្នុងការធ្វើសកម្មភាព របស់សង្គមស៊ីវិល ក៏អាច​ប៉ះពាល់ ដល់ពលរដ្ឋដែលជាអ្នកទទួលផល ដោយផ្ទាល់ផង»។

ឆ្លើយតប ទៅនឹងការលើកឡើងខាងលើ លោក ម៉ម ប៊ុននាង មិនបានធ្វើការបកស្រាយអ្វី នោះឡើយ តែលោកគ្រាន់តែ​បញ្ជាក់​ដូច្នេះថា៖ «ដើម្បីនីតិរដ្ឋ ការគ្រប់គ្រងជាតិមួយ តម្រូវឲ្យមានច្បាប់គ្រប់គ្រង។ (...) ដើម្បីមាននិតិរដ្ឋ ត្រូវតែ​បង្កើត​ច្បាប់។»៕