ការប្រមូលផ្ដុំគ្នា ដើម្បីបង្ហាញរូបរាង ពីចលនា«លែងក្បាលសុដន់ ឬ Free the nipple» ដែលកើត​ឡើង​ចុង​ក្រោយ​គេ គឺ​នៅ​ក្នុងសាន ឌីយ៉េហ្គូ (San Diego) ក្នុងរដ្ឋកាលីហ្វ័នី សហរដ្ឋអាមេរិក កាលពីថ្ងៃទី២០ ខែ​ឧសភា​កន្លង​មក។ បណ្ដាជន​ប្រមាណ​ជា២០០នាក់ បានមកជួបគ្នា នៅ​ក្នុង​ឧទ្យានមួយកណ្ដាលក្រុង ដើម្បី​ធ្វើការ​បង្ហាញ​សុដន និងក្បាលសុដន់​របស់​ពួកគេ មិន​ថា​ប្រុស​មិនថាស្រី។ សំនួរសួរថា ហេតុអ្វី​ក៏​មាន​ចលនានេះ?

ចលនា«លែងក្បាលសុដន់» បានកើតឡើង តាំងពី៣ឆ្នាំមកហើយ នៅសហរដ្ឋអាមេរិក ដើម្បីបុព្វហេតុ​សមញ្ញ​មួយ៖ «ហេតុអ្វី​បុរសៗអាចដើរកំសាន្ដបាន ដោយព្រលែងខ្លួនទទេ ខណៈស្ត្រីចាំបាច់ ត្រូវតែស្លៀកពាក់​ពេញ​ខ្លួន ឬយ៉ាងហោច​ត្រូវ​បិទ​បាំង​សុដន់ កុំឲ្យអ្នកផងមើលឃើញ»។

ខុសពីការយល់ឃើញ របស់មនុស្សមួយចំនួន ដែលគិតថា ឲ្យតែប្រទេសនៅលោកខាងលិច ពួកគេសុទ្ធតែ​មាន​វប្បធម៌ «អាស​អាភាស» ចូលចិត្តបង្ហាញ​«ប្រដាប់ប្រដា​សម្ងាត់»របស់ខ្លួន​នោះ ប្រទេសនៅបស្ចឹមលោក​ភាគ​ច្រើន បានហាមឃាត់​យ៉ាងហ្មឺងម៉ាត់ ពីការ​បង្ហាញអវៈយវៈផ្លូវភេទ ជាសាធារណៈ។ ប៉ុន្តែបញ្ហាដែលសំខាន់ សម្រាប់​ក្រុមស្ថាបនិក ចលនា«ព្រលែងក្បាលសុដន់»​នោះ គឺពួកគេគិត ពីសិទ្ធិសេរីភាពជាមូលដ្ឋាន ដែល​បុរស​និង​ស្ត្រី ត្រូវតែមានស្មើគ្នា នៅគ្រប់ទីកន្លែង នៅគ្រប់កាយ​វិការ រាប់​ទាំងការដើរហើរ និងការស្លៀកពាក់។

ចលនានេះ បានពង្រីកខ្លួនកាន់តែធំ បន្តិចម្ដងៗ ជាពិសេសនៅលើបណ្ដាញសង្គម។ ក្រុមអ្នកគាំទ្រ បាន​ពន្យល់​តៗគ្នា ពី​វិធី​ដើម្បីធ្វើចលនារបស់ពួកគេ កាន់តែត្រូវបានចាប់អារម្មណ៍ និងដើម្បីឲ្យតំបន់ហាមឃាត់ នៅ​លើ​អ៊ិនធើណែត​មួយចំនួន (ដូចយ៉ាងហ្វេសប៊ុកជាដើម) ផ្លាស់ប្ដូរ​គោលការណ៍ របស់ពួកគេ។ វិធីនោះ មានដូចជា «ថតរូបពីក្បាលដោះខ្លួនឯង ហើយបង្ហោះ នៅលើហ្វេសប៊ុក ទ្វីសធើរ ឬ​នៅ​លើអ៊ិនស្ថាក្រាម។ល។» ជា​ពិសេស ត្រូវតែធ្វើឲ្យបានច្រើនឡើង នៅលើហ្វេសប៊ុក ដោយហេតុថា បណ្ដាសង្គមមួយនេះ បាន​ធ្វើការ​ហាមឃាត់​យ៉ាងតឹងរ៉ឹង ពីរូបភាពបង្ហាញសុដន់ នៅលើជញ្ជាំងនានា នៃអ្នកប្រើប្រាស់៕

» ខាងក្រោមនេះ ជាវីដេអូមួយទៀត នៃស្ពតពាណិជ្ជកម្ម របស់ចលនានេះ៖