តើជាការធ្លាក់ខោ ដោយចៃដន្យ ឬជាការត្រៀមបំរុងទុក ដើម្បីឲ្យអ្នកផង បានឃើញ ហើយផ្ទុះសំណើច? ឬក៏ការរបូត​ខោ​នេះ ចង់បង្កឲ្យរូបភាពអាក្រក់ ដល់អ្នកនយោបាយនោះ ឲ្យធ្លាក់ទៅតាមខោ របស់ខ្លួនដែរ? ពិបាកឆ្លើយណាស់! ប៉ុន្តែ​រូបភាព នៃការរបូតខោ បានអណ្ដែត ពាសពេញបណ្ដាញសង្គមហើយ ក្នុងពេលនេះ។

នៅក្នុងកាយវិការភ្លាមៗ យុវជនម្នាក់នេះ ចង់ថតរូបជាមួយ ឧបនាយករដ្ឋមន្ត្រីអង់គ្លេស លោក និក ក្លេជ (Nick Clegg) ដោយប្រើទូរស័ព្ទដៃរបស់ខ្លួន។ ប៉ុន្តែនៅពេលដែលយុវជន បានឈានជំហាន ទៅបង្អាក់ដំណើរលោក ក្លេជ ហើយ​ក៏ត្រូវ​បានលោកទទួល ដើម្បីថតរូបជាមួយលោកដែរនោះ ស្រាប់តែខោរបស់យុវជន បានរបូតធ្លាក់ ដល់ត្រឹមជង្គង់។

តើត្រូវបន្តថតរូបទៀត ឬត្រូវងាកមកលើកខោសិន? ជម្រើសទីពីរ មានភាពប្រសើរជាង​ ហើយលោក និក ក្លេជ ក៏បាន​ទុក​ឲ្យយុវជនធ្វើកិច្ចការនេះ ដោយស្រួលដែរ។ នៅក្នុងបណ្ដាញសង្គមទ្វីសធើ លោកឧបនាយករដ្ឋមន្ត្រី បានយកហេតុការណ៍​នេះ មកសរសេរ ជាការកំប្លែងលេងសើចថា៖ «អ្នកខ្លះ ដូចជាធ្វើមិនដឹងមិនឮ ពីការទទូចស្នើរសុំរបស់ខ្ញុំ ស្ដីពីសារៈសំខាន់ នៃ​ការ​រិតបន្តឹង ខ្សែរក្រវ៉ាត់សោះ»៕