ភាពស៊ិចស៊ីរបស់កញ្ញា ហ្វួហ្សីយ៉ា អាហ្សីម (Fouzia Azeem) ដែលដាក់រហស្សនាមខ្លួនឈ្មោះ កេនដែល បាឡូឆ៍ (Qandeel Baloch) នៅលើបណ្ដាញសង្គម ត្រូវបានអ្នកផងប្រៀបធៀបនាង ទៅនឹងតារារាងបាន​ដ៏​ទ្រលុក​ទ្រលន់​​​របស់អាមេរិក ឈ្មោះ «Kim Kardashian,»។ នោះ គឺដោយសារនាង ​តែងបានបង្ហោះរូបភាព និង​វីដេអូ​ផ្ទាល់​ខ្លួន​ដ៏សិចស៊ី​របស់នាង នៅលើបណ្ដាញសង្គម​ជាញឹកញាប់។

ប៉ុន្តែតារានៅលើបណ្ដាញសង្គម ជាតិបាគីស្ដង់ដ៏ក្មេងខ្ចីរូបនេះ ទើបនឹងត្រូវបាន​បងប្រុស​បង្កើតរបស់នាង ច្របាច់​ក សម្លាប់ កាលពីថ្ងៃសៅរ៍កន្លងមកនេះ។ គឺ​ឪពុកម្ដាយផ្ទាល់​របស់យុវតីរងគ្រោះ ជាអ្នក​រាយការណ៍​ឲ្យ​នគរបាលដឹង ពីសោកនាដកម្មនេះ។

លោក ស៊ុលតង់ អាហ្សាម (Sultan Azam) នាយនគរបាលក្រុង «Multan - ភាគកណ្ដាលនៃប្រទេសប៉ាគីស្ដង់» បានថ្លែងឲ្យដឹងថា៖ «តាមទំនងមើលទៅ វាជាឃាតកម្ម ដើម្បីកិត្តិយសគ្រួសារ»។

លោក អាហ្សាម បានបន្តទៀតថា៖ «ជនសង្ស័យដែលជាបងប្រុស របស់ជនរងគ្រោះ បានរត់គេចខ្លួន នៅ​ក្រោយ​ពេល​កើតហេតុ។ ប៉ុន្តែយើងនឹងខិតខំធ្វើយ៉ាងណា ដើម្បីចាប់ខ្លួនជននេះឲ្យបាន។»។

ភ្នាក់ងារនគរបាលមួយរូបទៀត លោក អាហ្សារ អាករាម (Azhar Akram) បានបញ្ជាក់បន្ថែម ពីឃាតកម្មនេះ ថា​បាន​កើតឡើងនៅខណ:ពេលកញ្ញា កេនដែល អាឡូឆ៍ បានមកលេង​ជាមួយឪពុកម្ដាយនាង នៅក្នុងក្រុង «Muzzafarabad» ដែលស្ថិតនៅក្បែរក្រុង «Multan» ដើម្បីចូលរួមប្រារព្ធបុណ្យ «Eïd»។ នគរបាល​រូបនេះ​បាន​បន្តទៀតថា៖ «បងប្រុសរបស់នាង ក៏នៅទីនោះដែរ។ ហើយគ្រួសារទាំងមូល បាននិយាយប្រាប់យើងថា គឺ​បង​ប្រុសនេះហើយ ដែលបានច្របាច់ក សម្លាប់នាង។ តាមទំនងមើលទៅ វាជាឃាតកម្ម ដើម្បីកិត្តិយស​គ្រួសារ។»។

កញ្ញា ដេនដែល បាឡូឆ៍ បានទទួលនូវភាពល្បីល្បាញ ដោយសារការបង្ហោះរូបភាព និងវីដេអូ​«ហ៊ានៗ»​របស់​នាង នៅលើបណ្ដាញសង្គម។ គណនីរបស់នាងនៅលើហ្វេសប៊ុក ឬអ៊ីនស្តាហ្គ្រាម មានមនុស្សតាមដាន និង​ចូល​ចិត្តជាច្រើនពាន់ម៉ឺននាក់។ ប៉ុន្តែនាង បាឡូឆ៍ មិនបានធ្វើឲ្យមនុស្សទាំងអស់ សប្បាយចិត្តនោះឡើយ ជា​ពិសេស មិនសប្បាយចិត្ត​ចំពោះកាយវិការរបស់នាង ដែលពោរពេញដោយភាពរោលរាល នៅក្នុងប្រទេសមួយ ដែល​ប្រកាន់តាម​សាសនាអ៊ីស្លាម និងសម្បូរដោយជនអភិរក្សនិយម។

នៅក្នុងប្រទេសប៉ាគីស្ដង់ ស្ត្រីជាច្រើនរយនាក់ ត្រូវបានសម្លាប់ជារៀងរាល់ឆ្នាំ ដោយក្រុមគ្រួសារខ្លួនឯង។ ឃាតកម្ម​ទាំងនោះ ធ្វើឡើងនៅក្រោមហេតុផល ដើម្បីសង្គ្រោះ«កិត្តិយសគ្រួសារ»៕

----

» ខាងក្រោមនេះ ជាវីដេអូមួយរបស់នាង កេនដែល បាឡូឆ៍៖