ហេតុការណ៍ រំលោភសេពសន្ធវៈ ជាក្រុម (ឬរំលោភបូក) បានផ្ទុះឡើងសារជាថ្មីទៀត នៅក្នុងប្រទេសឥណ្ឌា ហើយបាន​ធ្វើឲ្យអ្នកផង នឹកឃើញឡើងវិញ ពីព្រឹត្តិការណ៍រំលោភបូក ទៅលើយុវនិស្សិតស្រីម្នាក់ នៅលើរថយន្ដក្រុង ក្នុងរដ្ឋធានី ញ៉ូដេល្លី កាលពីឆ្នាំ២០១២។ កាលពីថ្ងៃពុធសប្ដាហ៍មុន យុវតីជំទង់ម្នាក់ទៀត បានស្លាប់ដោយសារ បានរងរបួសធ្ងន់ធ្ងរ បន្ទាប់​ពីនាង ត្រូវបានបោះចេញ ពីរថយន្ដក្រុង ដោយមនុស្សប្រុស អ្នកចាប់រំលោភមួយក្រុម។

ហេតុការណ៍ បានកើតឡើង នៅលើដងផ្លូវជាតិ ម៉ូហ្គា (Moga) ភាគខាងជើងនៃប្រទេស ដែលស្ថិតនៅមិនឆ្ងាយប៉ុន្មាន ពី​ព្រំដែនជាមួយ ប្រទេសប៉ាគីស្ថាន។ នេះបើតាមការអះអាង របស់ស្ត្រីជាម្ដាយ អ្នកស្រី ស៊ីដ័រ កូរ (Shinder Kaur) ដែល​កំពុង​​សម្រាកព្យាបាលខ្លួន នៅក្នុងមន្ទីរពេទ្យ ថ្លែងប្រាប់ ទូរទស្សន៍ NDTV។ ខណៈពេល ដែលស្ត្រីជាម្ដាយ យុវតី​ជំទង់​ជា​កូនស្រី និង​កូនប្រុសម្នាក់ទៀត បានធ្វើដំណើរទាំងយប់ នៅលើរថយន្ដក្រុងមួយ ពីផ្ទះរបស់ពួកគេ នៅ​ក្នុង​ក្រុង ផេនចាប (Pendjab) ដើម្បីទៅលេងញាតិមិត្តនោះ ស្រាប់តែ មនុស្សប្រុសមួយក្រុម បានចាប់ផ្ដើមរករឿងយុវតីជំទង់។

«គ្មាននរណាជួយយើងទេ»

ក្រុមមនុស្សទាំងនោះ បានចាប់ផ្ដើមឈ្លោះប្រកែក ជាមួយយុវតីជំទង់ កញ្ញា អាស្សឌីប (Arshdeep) នៅក្នុងរថយន្ដនោះ ហើយចាប់ផ្ដើមលូកលាន់ ប៉ះពាល់ខ្លួនប្រាណនាង និងម្ដាយនាង ជាច្រើនលើកច្រើនសារ។ អ្នកស្រី ស៊ីដ័រ កូរ បានស្រែក​ប្រាប់ទៅ បុគ្គលិករបស់រថយន្ដក្រុងម្នាក់ ប៉ុន្តែបុគ្គលិករូបនោះ មិនត្រឹមតែមិនធ្វើអន្តរាគមន៍ ជួយស្ត្រីទាំងពីរទេ តែថែម​ទាំង​ចូលរួមជាមួយ ក្រុមមនុស្សប្រុសនោះ ថែមទៀត។

ការប្រតាយប្រតប់គ្នា បានកើតឡើងមួយសន្ទុះ លុះត្រាអ្នកស្រី ស៊ីដ័រ រកឱកាសចេញ ទៅជួបជាមួយអ្នកបើកបររថយន្ដ ដើម្បី​សុំឲ្យឈប់រថយន្ដ។ ផ្ទុយទៅវិញ បុរសអ្នកកាន់ចង្កូនឡានក្រុង បានបន្ថែមល្បឿន កាន់តែលឿនឡើង រហូតដល់​ដំណាក់កាលចុងក្រោយ ដែលទាំងម្ដាយ ទាំងកូនស្រី ត្រូវបានមនុស្សប្រុសទាំងនោះ ច្រានចេញពីរថយន្ដក្រុង បោះចេញ​មកលើផ្លូវថ្នល់។ ស្ត្រីជាម្ដាយ ដែលមានអាយុ៣៥ឆ្នាំ បានថ្លែងទាំងអួលអាក់ ពីក្នុងគ្រែមន្ទីរពេទ្យ កាលពីថ្ងៃព្រហស្បត្តិ៍ថា៖ «គ្មាននរណាជួយយើងទេ។ ពួកគបានច្រានកូនស្រីខ្ញុំមុន រួចហើយបានច្រានខ្ញុំ។»

រថយន្ដបានបន្តដំណើរទៅមុខបានបន្តិច ក៏បានឈប់ ហើយមនុស្សប្រុសទាំងអស់ ទាំងអ្នកបើកបររថយន្ដ និង​បុគ្គលិក​ឡានក្រុងនោះផង បានរត់គេចខ្លួន។ ប៉ុន្តែក្នុងចំណោមនោះ មនុស្សប្រុសបីនាក់ ត្រូវបាននគរបាលចាប់ខ្លួន នៅក្នុង​ពេល​ក្រោយមក។

ហេតុការណ៍នេះ កាន់តែបង្កការក្ដៅក្រហាយ កាន់តែខ្លាំងថែមទៀត នៅពេលដែលបណ្ដាញផ្សព្វផ្សាយ បានទម្លាយ​ឲ្យ​ដឹងថា កូនប្រុសនៃអភិបាលរដ្ឋ ផេនចាប មានភាគហ៊ុន នៅក្នុងក្រុមហ៊ុន Orbit Aviation ដែលធ្វើអាជីវកម្ម លើសេវាកម្ម​រថយន្ដ​ក្រុងខាងលើ។ លោក ប៉ាកាស ស៊ីង (Parkash Singh ) អភិបាលរដ្ឋ ផេនចាប បានទទួលស្គាល់ថា រថយន្ដ​ក្រុង​នោះ ពិតជារបស់ក្រុមហ៊ុន ដែលកូនខ្លួន មានភាគហ៊ុននោះមែន ប៉ុន្តែលោកបាននិយាយថា៖ «បើទោះជារថយន្ដក្រុង​នោះ ជារបស់នរណាក៏ដោយ ខ្ញុំនៅតែមាន អារម្មណ៍ក្ដុកក្ដួលណាស់ នឹងរឿងរ៉ាវទាំងអស់នេះ»។

«កូនស្រីខ្ញុំត្រូវការយុត្តិធម៌»

បណ្ដាជន នៅភាគខាងជើង នៃប្រទេសឥណ្ឌា បានសម្ដែងការខឹងសម្បាររបស់ពួកគេ ហើយតាំងពីថ្ងៃព្រហស្បត្តិ៍នេះមក រលកបាតុកម្ម ឬការដង្ហែក្បួនជាច្រើន បានកើតឡើង ជាពិសេសនៅខាងមុខ មន្ទីរពេទ្យ ម៉ូហ្គា (Moga) ដែលអ្នកស្រី ស៊ីដ័រ កូរ កំពុងស្នាក់ព្យាបាលខ្លួន។ ពួកគេបានទាមទារ ឲ្យមានការចោទប្រកាន់ក្រុមហ៊ុន ម្ចាស់រថយន្ដក្រុង ទៅតុលាការ។ ចំណែក​ឪពុករបស់យុវតីជំទង់វិញ បានបដិសេធ មិនបូជាសពកូនស្រី របស់លោកទេ ដរាបណាក្រុមហ៊ុន ដែលធ្វើ​អាជីវកម្ម លើរថយន្ដ​ក្រុង មិនត្រូវបានចាប់ ឲ្យទទួលខុសត្រូវ នៅចំពោះតុលាការ។ លោកនិយាយថា៖ «កូនស្រីខ្ញុំ​ត្រូវការ​យុត្តិធម៌។ នាងជាកុមារី ដ៏តូចម្នាក់។ ប្រព័ន្ធច្បាប់របស់យើង មានលក្ខណៈខ្សោយខ្លាំងណាស់ រហូតគេមិនអាចធ្វើអ្វីកើត ប្រឆាំងនឹងម្ចាស់ក្រុមហ៊ុន។»៕