ប្រភព ពីឧបាសកឧបាសិកា ចំណុះជើងវត្ត បានប្រាប់ទស្សនាវដ្ដីមនោរម្យ.អាំងហ្វូ ឲ្យដឹងថា វត្ត«ស្ទឹងមានជ័យ» ស្ថិតនៅ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ កំពុងមានប្រព្រឹត្ត អំពើល្បែងស៊ីសង ចាក់កន្ទុយលេខ យ៉ាង​គគ្រឹក​គគ្រេង និងយ៉ាងអនាធិបតេយ្យ។ ល្បែងស៊ីសងនោះ មានបីកន្លែងនៅក្នុងវត្ត ដែលលេងទាំងថ្ងៃទាំងយប់ គឺមួយថ្ងៃ​ពីរ​លើក​ជា​ប្រចាំ ក្នុងនោះ មាន ការចាក់កន្ទុយលេខជាដើម ដែលធ្វើឡើងនៅក្នុង តូបលក់ចាប់ហួយមួយ ក្នុងបរិវេណវត្ត។

ដូនចាស់ ឡឹក សាត ក្នុងវ័យ៦០ឆ្នាំ ដែលធ្លាប់តែងតែទៅប្រតិបត្តិសីល ជារៀងរាល់ថ្ងៃសីល នៅវត្តនេះ បានប្រាប់​ទស្សនាវដ្តី​នៅថ្ងៃទី២២ ខែមេសា ឆ្នាំ២០១៥ថា កន្លងមក ធ្លាប់បានលឺពាក្យគេនិយាយ តែមិនជឿ ព្រោះទីនេះ ជាកន្លែង​ប្រតិបត្តិ​ធម៌។ តែពេលធ្វើដំណើរឆ្លងកាត់ ក៏បានឃើញ មានគ្នាជុំៗ ទាំងលោកសង្ឃ ទាំងកូនសិស្ស នាំគ្នាលេងទាំងថ្ងៃ។ លោកយាយ បានឲ្យដឹងទៀតថា មិនមែនតែម្តងទេ ដែលលោកយាយបានឃើញ គឺរៀងរាល់ថ្ងៃ។ លោកយាយ បាន​និយាយ​ទាំងហួសចិត្តថា សូម្បីតែកន្លែងវត្តអារាម ដែលជាទីតាំងព្រះធម៌ នៃព្រះពុទ្ធសាសនា ក៏មានរឿងបែបនេះដែរ។

ដូនចាស់ បានអះអាងទៀតថា មិនដែលមានទេពីមុន ព្រោះបូរាណកាលមក ធ្លាប់មានតែទៅវត្ត ថ្វាយបង្គំព្រះ​សុំ​សេចក្តី​សុខ មិនមែនទៅវត្តចាក់កន្ទុយលេខ ដើម្បីឈ្នះលុយនោះទេ។ លោកយាយបានសូមណូមពរ ដល់អាជ្ញាធរដែល​ជាប់​ពាក់ព័ន្ធ មេតាជួយធ្វើអន្តរាគមន៍ ព្រោះលោកយាយ មិនចង់ឲ្យវត្តទីអារាមសាសនា ក្លាយទៅជាកន្លែងអនាធិបតេយ្យ របស់​មនុស្សមួយចំនួននោះឡើយ។

ចំពោះករណី ដែលមានល្បែងស៊ីសង យ៉ាងអនាធិបតេយ្យនៅក្នុងវត្តនេះ ទស្សនាវដ្តីបានជួបសម្ភាសផ្ទាល់ ជាមួយ​អ្នក​លក់​ដូរ​នៅក្នុងបរិវេណនេះ ម្នាក់អ្នកស្រី ភូ បាននិយាយទាំងមិនចង់ឆ្លើយថា៖ «គ្រាន់ចាក់១០០ ២០០ មិនបាន» ដែល​ក្នុង​នោះ មានទាំងឧបករណ៍ប្រើប្រាស់មួយចំនួន នៅលើតុដូចជា៖ ប៉ិច សៀវភៅកត់លេខ ម៉ាស៊ិនគិតលេខ ជាដើម ហើយ​អ្នកសារព័ត៌មានរបស់ទស្សនាវដ្ដី បានឃើញទិន្នន័យ ដែលបានចុះនៅក្នុងក្រដាស ចាប់ពី៥០០រៀលឡើង។

ដោយឡែកព្រះអង្គ ថៃ ប៊ុនរឿន ចៅអធិកាវត្តស្ទឹងមានជ័យ បានបដិសេធន៍មិនបានដឹងទេ ដោយមានសង្ឃដីការថា ព្រះអង្គ​មិនបានគង់ នៅក្នុងវត្តទេបច្ចុប្បន្ន ព្រោះជាប់និមន្តទៅខេត្ត មិនទាន់ត្រឡប់មកវិញ។ ព្រះអង្គបានប្រាប់ទៀតថា ពេល​ដែល ព្រះអង្គត្រឡប់មកពីខេត្តវិញ នឹងធ្វើការពិនិត្យឲ្យបានច្បាស់ថា មានដូចអ្វីដែលបានរកឃើញនោះទេ។

ពាក់ព័ន្ធជាមួយករណី ដែលមានល្បែងស៊ីសង ចាក់កន្ទុយលេខ នៅក្នុងវត្តស្ទឹងមានជ័យនេះ មេប៉ុស្តិ៏ស្ទឹងមានជ័យលោក ម៉ៅ វឿន បានបដិសេធស្រដៀង ទៅនឹងព្រះចៅអធិកាវត្តដែរថា លោកជាសមត្ថកិច្ច មិនមានអ្នកណាផ្តល់ដំណឹង ពីរឿង​នេះទេ ហើយលោកក៏មិនបានដឹង និងចុះបង្ក្រាបនោះដែរ ព្រោះទីនោះជាវត្ត។

អ្នកនៅក្នុងវត្តនោះម្នាក់ សុំមិនប្រាប់ឈ្មោះ បានឲ្យដឹងនៅថ្ងៃទី២២ ខែមេសានេះថា គាត់បានដឹងថា កន្លែងទាំងបីដែល​ព្រះសង្ឃ និងអ្នកនៅទីនោះតែងលេង គឺទី១នៅ ក្រោមដើមពោធ៍ក្នុងងវត្ត ទី២ នៅកុដ ហង្សក្នុងវត្ត ទី៣ នៅក្រោមដើម​អំពិល ដែលនៅចម្ងាយពីកុដចៅអធិការ ប្រមាណជា៥០ម៉ែត្រ។ បុរសរូបនេះបានបន្ថែមថា នៅក្នុងតូបលក់នោះ គ្រាន់​តែ​កន្លែងបិទបាំងទេ តាមពិត គេនាំគ្នាចាក់កន្ទុយលេខ នៅក្នុងនោះរាល់ថ្ងៃ មិនដែលខាន ដោយមិនបានគិតថា វាធ្វើឲ្យ​ប៉ះ​ពាល់ដល់ព្រះពុទ្ធសាសនាឡើយ។ លោកបញ្ជាក់ថា នៅមិនទាន់មានអ្នកចុះបង្រ្កាបទេ តាំងពីពេលមុន មកដល់​បច្ចុប្បន្ន៕