គ្រាន់តែទុយោទឹក ដែលមានទឹកបាញ់ចេញប៉ុណ្ណោះ នឹងអាចឲ្យមនុស្សសត្វ ផងទាំងពួង អាចសប្បាយបាន អស់​ពេល​មួយថ្ងៃ! តែយ៉ាងណាក៏ដោយ ចំពោះមនុស្សយើង ដែលមិនស្គាល់គ្នាវិញ នោះប្រហែលជាមនុស្ស មិនប្រើទុយោទឹក​របៀប​នេះ បាញ់ស្រោចលេង ដាក់គ្នានោះទេ។ ប៉ុន្តែសម្រាប់សត្វខ្លាឃ្មុំ និងសត្វឆ្កែ ប៊ែរហ្សេអាល្លឺម៉ង់ វិញ កំពុងលេង​ល្បែង​នេះ យ៉ាង​សប្បាយ​ជា​មួយ​គ្នា។

ជាទូទៅ សត្វទាំងពីរនេះ នៅជិតគ្នាមិនបានទេ។ តែផ្ទុយទៅវិញ ពួកវាបានបង្ហាញ នូវភាពស្និតស្នាលគ្នា សម្បើម​ណាស់។ ខ្លាឃ្មុំ បានចាប់ទុយោទឹក មកគ្រវីគ្រវាត់ចុះឡើង ទំនងជាចង់ឲ្យទឹក បានបាញ់ចេញទៅ ឲ្យច្រើនកន្លែង។ រី​ឯ​សត្វ​ឆ្កែ​វិញ ក៏​មាន​សេចក្ដី​សប្បាយ​រីករាយ នឹងការស្រោចស្រព យ៉ាងត្រជាក់ត្រជុំនេះដែរ។

នៅក្នុងធម្មជាតិ សត្វខ្លាឃ្មុំមានកម្លាំងខ្លាំងណាស់ ក្នុងការប្រើក្រញ៉ាំ ប្រដាប់ដោយក្រចកវែងៗរបស់វា ដើម្បីទះ ឬចាប់​វត្ថុអ្វីក៏ដោយ ដែលវាយល់ថា ជាសត្រូវ ឬជាចំណីរបស់វា។ ប៉ុន្តែចំពោះសត្វឆ្កែវិញ ប្រសិនជាអ្នកប្រមាញ់ តែងយក​វា​ទៅ​តាមខ្លួន ពេលដើរព្រៃម្ដងៗនោះ មិនមែនគ្មានប្រយោជន៍នោះទេ។ សត្វឆ្កែមានសមត្ថភាពអាចប្រឈមមុខ ទៅគ្រប់​ស្ថានភាព​ទាំងអស់ ជាពិសេស វានឹងការពារម្ចាស់វា រហូតដល់ស្លាប់ខ្លួន នៅពេលណាវាយល់ ពីការវាយប្រហារ​ណា​មួយ៕