ហេតុការណ៍បានកើតឡើង កាលពីរសៀលថ្ងៃសុក្រសប្ដាហ៍មុន នៅក្នុងអាងចិញ្ចឹមក្រពើមួយកន្លែង នៃតំបន់ សាមុតប្រាកាន់ (Samut Prakan) ដែលល្បីថា សម្បូរមនុស្សចូលទៅទស្សនា ក្នុងមួយឆ្នាំៗ។ សួនសត្វ​ដែល​នៅចំងាយប្រមាណជាមួយម៉ោង បើគេជិះរថយន្ដពីកណ្ដាលរាជធានីបាងកកនេះ ត្រូវបានគេស្គាល់ ជាមួយ​នឹងផ្ទាំងទស្សនីយភាពជាច្រើន ដូចជាអ្នកបង្ហាត់ក្រពើ យកក្បាលខ្លួនទៅដាក់ក្នុងមាត់ក្រពើ ឬការចាប់​ក្រពើ​ធំៗ​ទាំងនោះ ដោយដៃទទេជាដើម។

ប៉ុន្តែនៅពេលនេះ សួនសត្វដ៏ល្បីបានក្លាយជាទីកន្លែងមួយ ដែលស្ត្រីវ័យចំណាស់បានជ្រើសរើស មកធ្វើ​អត្តឃាត។ ដូនចាស់អាយុ៦៥ឆ្នាំ បានលោតចេញពីស្ពាន ដែលសង់ពីលើអាងក្រពើ ដើម្បីឲ្យអ្នកដែល​ចូល​ទស្សនា អាច​ឈរមើលក្រពើពីទីនោះ និងអាចបោះសាច់ឲ្យក្រពើស៊ី។

នាយកសួនសត្វអាងក្រពើ លោក ឆារ៉ុង យ៉ុងប្រាប៉ាកន (Charron Yongprapakorn) បានអះអាងថា បុគ្គលិក​របស់លោក បានរាយការណ៍ប្រាប់នគរបាលជាបន្ទាន់ ពីអំពើអត្តឃាតនេះ។ លោកបានថ្លែងតាម​កញ្ចក់​ទូរទស្សន៍​ថា៖ «យើងបានសង់របងឡើងខ្ពស់ៗ ដាក់ម៉ាស៊ីនវីដេអូសុវត្ថិភាព និងមានការដើរត្រួតពិនិត្យ​ជា​ប្រចាំ»។ ប៉ុន្តែ​របងដែលសង់ នៅសងខាងស្ពានដើរនោះ ធ្វើឡើងពីឈើ និងមាន​កំពស់តែត្រឹម១ម៉ែត្រ​ប៉ុណ្ណោះ (មើល​រូបថត​ខាង​លើ)។

ក្បួនខ្នាតដើម្បីរក្សាសុវត្ថិភាព នៅក្នុងសួនសត្វ ឬនៅក្នុងសួនកំសាន្តផ្សេងៗ មិនសូវជាត្រូវបាន​គោរពប៉ុន្មាន​ទេ នៅក្នុងប្រទេសថៃ។ ជាញយដងគេតែងឃើញ អ្នកចូលទៅកំសាន្ដតែងធ្វើសកម្មភាពលលេង ជាមួយ​នឹង​សត្វ​កំណាចៗជាច្រើន ក្នុងនោះមានទាំងទៅឈរជិត ដើម្បីថតរូបជាដើម៕