«កុំស្មានបងភ្លេច» ឬ«Don’t Think I’ve Forgotten» ជាភាពយន្ដឯកសារ ដែលនឹងនាំយើង ឲ្យទៅកាន់ពិភពមួយ ដែល​យើងបានភ្លេច នៅក្រោយរយៈពេល ដ៏ខ្លោចផ្សារមួយ៖ នោះគឺឈុតឆាកសម្ដែង នៃតន្ត្រីខ្មែរ នៅចុងទសវត្សន៍ឆ្នាំ៥០ រហូត​មកដល់ របបអាវខ្មៅ បីឆ្នាំប្រាំបីខែម្ភៃថ្ងៃ ដ៏រន្ធត់ខ្លោចផ្សារ នៃទសវត្សន៍ឆ្នាំ៧០។ ភាពយន្ដឯកសារ ដែលផលិត​ឡើង​​ដោយ ផលិតករជាតិអាមេរិក លោក ចន ភីរ៉ូហ្សី (John Pirozzi)  នេះ ជាការរំលឹកឡើងវិញ នូវប្រវត្តិដ៏​ស្រងេះ​ស្រងោច នៃតន្ត្រីសម័យខ្មែរ ដែលបានអង្រួនរាជធានីភ្នំពេញ អស់ជាច្រើនទសវត្សន៍ មុននឹងសិល្បតន្ត្រីខ្មែរ ត្រូវបាន​ផ្ដាច់​ឫសគល់ទាំងស្រុង រាប់ទាំងអ្នកចម្រៀង តន្ត្រីករ អ្នកនិពន្ធ... ដោយក្រុមខ្មែរក្រហមកុម្មុយនីស។

លោក ភីរ៉ូហ្សី បាននាំមកបង្ហាញ នូវសាក្សីរស់ និងសំណល់ឯកសារជាច្រើន ក្រោយការផុតរលត់ នៃរបបអាណានិគម​បារាំង និងពីអ្វីដែលជាសោភ័ណ្ឌភាព ក៏ដូចជាក្ដីសុបិន្ដ របស់ក្រុមយុវវ័យខ្មែរ នាសម័យនោះ។ គ្រប់ចម្រៀង គ្រប់​រចនាបទ បង្កើតឡើងដោយក្រុមយុវជនខ្មែរខ្លួនឯង និងខ្លះទៀតនាំចូលពីបរទេស ដូចយ៉ាងពីចិន ពីអ៊ឺរ៉ុប ពីអាមេរិក ឬ​ពី​គុយបា... ហើយត្រូវបានយកទៅបង្ហើយ ដោយបង្ហើរជាសំនៀង យ៉ាងគ្រលួច នៃតារាចម្រៀងខ្មែរល្បីៗ នាពេលនោះ ដូច​យ៉ាង លោក ស៊ីន ស៊ីសាមុត និងនាង រស់ សេរីសុទ្ធា ជាដើម។

សាក្សីនៅក្នុងភាពយន្ដឯកសារ បានលើកឡើង ពីរយៈកាលដ៏ជូរចត់ ដែលតន្ត្រីសម័យខ្មែរ ត្រូវបានចាត់ទុកជា «ខ្មាំង» ប្រឆាំង«អង្គការ» ហើយតួអង្គជាច្រើន នៅក្នុងវស័យនេះ ត្រូវបានចាប់ចង ធ្វើទារុណកម្ម យកទៅសម្លាប់ និងខ្លះទៀត បានបាត់ខ្លួន ទាំងមិនដឹងមូលហេតុ រហូតមកទល់បច្ចុប្បន្ន។ និយាយជារួម សិល្បៈតន្ត្រីខ្មែរ បានរងគ្រោះលិចលង់ ទៅ​ជាមួយ នឹងជីវិតរបស់ប្រជាជនកម្ពុជា ប្រមាណជា ១លាន៧សែននាក់ ក្រោមរបបវាលពិឃាត ប្រល័យពូជសាសន៍ឯង ដែលគ្មានពីរក្នុងលោក។

ភាពយន្ដឯកសារ ត្រូវបានបញ្ចាំងរួចខ្លះៗហើយ នៅក្នុងប្រទេសកម្ពុជា កាណាដា បារាំង និងអាមេរិក។ ប៉ុន្តែគម្រោង​ដាក់​បញ្ចាំង នៅមានជាច្រើនទៀត នៅតាមបណ្ដារដ្ឋនានា ក្នុងសហរដ្ឋអាមេរិក ដែលគេអាចរកឃើញកម្មវិធី តាមរយៈ​គេហ​ទំព័រ​ជាផ្លូវការ នៅទីនេះ៕

» ចង់ដឹងបន្ថែម ពីសមិទ្ធិករ លោក ចន ភីរ៉ូហ្សី នៅក្នុងកិច្ចសម្ភាសមួយទៀតឬទេ? សូមទស្សនា៖