មន្ត្រី​សិទ្ធិ​មនុស្ស បង្ហោះ​វីដេអូ​«ស្រាត» ផ្អើល​ពេញ​ហ្វេសប៊ុក?

ជារឿងមួយគួឲ្យភ្ញាក់ផ្អើលណាស់ នៅពេលវីដេអូអាសអាភាសមួយ ត្រូវបានបង្ហោះចេញ ពីក្នុងគណនីហ្វេសប៊ុក របស់លោក ឆាយ ធី មន្ត្រីឃ្លាំមើលសិទ្ធិមនុស្សមួយរូប នៅខេត្តរតនគីរី។ ហេតុការណ៍នេះ ត្រូវបានម្ចាស់គណនីហ្វេសប៊ុក ប្រតិកម្មភ្លាមៗ។
Loading...
  • ដោយ: ក. វិច្ចនី អត្ថបទ និងយកការណ៍៖ ក. វិច្ចនី ([email protected]) - ភ្នំពេញ ថ្ងៃទី ២០ មីនា ២០១៥
  • កែប្រែចុងក្រោយ: March 22, 2015
  • ប្រធានបទ: បច្ចេកវិទ្យា
  • អត្ថបទ: មានបញ្ហា?
  • មតិ-យោបល់

នរណាមួយមិនភ្ញាក់ផ្អើល នៅពេលដែលបានបើក លេងហ្វេសប៊ុក នៅព្រឹកថ្ងៃសុក្រ ទី២០ ខែមីនា ម្សិលម៉ិញនេះ ស្រាប់​​តែឃើញ គណនីរបស់មន្ត្រីឃ្លាំមើលសិទ្ធិមនុស្ស របស់សមាគមការពារសិទ្ធិមនុស្ស អាដហុក (Adhoc) ប្រចាំ​ខេត្ត​រតនគិរី លោក ឆាយ ធី បង្ហោះវីដេអូឃ្លីបមួយ ដែលមានលក្ខណៈកូនជ្រូក អាសអាភាស ទៅគ្រប់មិត្តភ័ក្តិ ដែលមាន​ទំនាក់​ទំនង​ហ្វេសប៊ុក ជាមួយលោក។

លោក ឆាយ ធី ដែលល្បីល្បាញខាងការឃ្លាំមើល ការរំលោភដីធ្លី ឬការបំផ្លាញធនធានធម្មជាតិ នៅខេត្តភាគឦសាន្ដ នៃ​ប្រទេសកម្ពុជា ត្រូវបានជនខិលខូច លួចហែក (Hack) គណនីហ្វេសប៊ុករបស់លោក បន្ទាប់មកបានបង្ហោះវីដេអូនេះ ដែលមានលក្ខណៈ ជាការផ្សាយពាណិជ្ជកម្ម ឲ្យទៅខ្សែភ្ជាប់មួយផង ទៅលើជញ្ជាំងរបស់មិត្តហ្វេសប៊ុកនានា របស់​លោក។ ពីក្នុងចំណោមមិត្តហ្វេសប៊ុករបស់លោក ក៏មានលោក អ៊ំ វ៉ារី អ្នកសារព័ត៌មាន របស់ទស្សនាវដ្ដី​មនោរម្យ.​អាំងហ្វូ ម្នាក់ផង ដែលបានទទួលនូវវីដេអូពិសេសនេះ។

វីដេអូឃ្លីប ត្រូវបានបង្ហោះនៅវេលាម៉ោង ១១ព្រឹកថ្ងៃសុក្រ ដោយមានសរសេរអម ដោយពាក្យអង់គ្លេសមួយឃ្លា និង​ពាក្យខ្មែរ​មួយឃ្លា ដែលមានន័យជាអាថ៌ថា៖ «Chhay Thy ភ្ញាក់ផ្អើលទៅមើលក្មេងប្រុស និងក្មេងស្រី ក្នុងថ្នាក់ប្រាំបួន ធ្វើជណ្ដើរ​មនុស្សពេញវ័យ»។

លោក ឆាយ ធី បានថ្លែងប្រាប់ទស្សនាវដ្ដីមនោរម្យ.អាំងហ្វូ នៅក្នុងថ្ងៃសុកដដែលថា លោកមិនបានបង្ហោះរូបភាព ឫ​វីដេអូ​អ្វីទេ នៅព្រឹកថ្ងៃនោះ ហើយគណនីហ្វេសប៊ុករបស់លោក នៅមិនទាន់បើកចេញឡើយ រហូតមកដល់រសៀល​ថ្ងៃ​ដដែល។ លោកថា កាលពីព្រឹក លោកបានបើកហ្វេសប៊ុកមើលព័ត៌មាន តែបានទុកកុំព្យូទ័រចោល នៅនឹង​ការិយាល័យ ដើម្បីធ្វើដំណើរទៅជួបសហគមន៍ និយាយពីការងារ ប្រហែលជាជិតមួយម៉ោង ទើបត្រឡប់មកវិញ។ តែនៅ​ពេល​មក​ដល់ លោកបើកហ្វេសប៊ុក ដើម្បីមើលព័ត៌មានម្តងទៀត ស្រាប់តែបើកមិនចេញតែម្ដង។

លោកអះអាងថា ប្រាកដជាមានជនណាម្នាក់ លួចយកលេខកូដសំងាត់ គណនីហ្វេសប៊ុករបស់លោក រួចយកទៅ​ប្រើ​ប្រាស់ ក្នុងបំណងអាក្រក់។ ជននោះ ថែមទាំងបានផ្លាស់ប្តូរលេខសំងាត់ ក្នុងគណនីហ្វេសប៊ុកនោះ ធ្វើឲ្យម្ចាស់ខ្លួន បើក​គណនីខ្លួនឯង លែងបានផងទៀត។ មន្ត្រីសិទ្ធិមនុស្ស បានរៀបរាប់ទៀតថា លោកបានយកកុំព្យូទ័រ ទៅឲ្យអ្នក​ជំនាញ ខាងព័ត៌មានវិទ្យាជួយមើល និងជួយស្រាវជ្រាវ ដើម្បីផ្លាស់ប្តូរលេខកូដនោះវិញ។ លុះត្រាមកដល់ រសៀល​ថ្ងៃ​ដដែល ទើបលោកអាចបើកគណនីហ្វេសប៊ុក នោះបានដូចធម្មតា​ ហើយក៏បានចូលទៅលប់វីដេអូ ដ៏អាស្រូវទាំងនោះ ចេញ​អស់​ដែរ។

បើតាមការអះអាង របស់អ្នកជំនាញខាងបច្ចេកវិទ្យាមួយរូប ដែលទស្សនាវដ្ដីបានទាក់ទងសុំយោបល់ បានឲ្យដឹងថា យោង​ទៅលើភាសាខ្មែរ ដែលសរសេរនៅជាមួយវីដេអូ ជនខិលខូចនោះ អាចមិននៅក្នុងប្រទេសកម្ពុជាទេ ព្រោះជា​ភាសា​បកប្រែ នៅតាមប្រព័ន្ធអនឡាញ (Online)។ ហើយ​ការ​លួចយកលេខសំងាត់ នៃគណនីរបស់លោករបៀបនេះ អាចជាសកម្មភាពធម្មតា និងជារឿយៗ នៃមេរោគ ដែលចូល​មក​បង្កប់ខ្លួន នៅក្នុងម៉ាស៊ីនកំព្យូទ័ររបស់លោក។ ព្រោះ​បើសិនជា មាននរណាម្នាក់ (មិនមែនជាមេរោគ) ដែលមាន​បំណង ចង់រំខានលោក ឆាយ ធី ពិតប្រាកដនោះ ម្ចាស់​គណនី​នឹង​មិន​អាច វិលត្រឡប់ មកបើកគណនីខ្លួន ឡើងវិញ​បាន​ឡើយ។

គួររំលឹកដែរថា លោក ឆាយ ធី ធ្លាប់រងការគម្រាមប្ដឹង ពីសំណាក់មន្ត្រីជាន់ខ្ពស់មួយចំនួន នៅក្នុងជួរដ្ឋាភិបាល នាពេល​កន្លងមក ពាក់ព័ន្ធនឹងសំនុំរឿង ជនជាតិម៉ុងតាញ៉ា ដែលភៀសខ្លួន ចួលមកលាក់ខ្លួន ក្នុងព្រៃនៃខេត្តរតនគិរី។ យ៉ាង​ណា​​ក៏ដោយ សម្រាប់លោក ឆាយ ធី វិញ មិនមានការបារម្ភអ្វីឡើយ ដោយសារតែ លោកមិនដែលបង្ហោះវីដេអូ ឬរូបអ្វី​ផ្សេង ក្រៅ​តែ​ពី​​បញ្ហា​ដីធ្លី និងកិច្ចការងារមួយចំនួន ទាក់ទងនឹងសហគមន៍ បូករួមនឹងបញ្ហាសង្គមនានា តែប៉ុណ្ណោះ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...