បងប្រុសរបស់យុវតីរងគ្រោះដោយទឹកអាស៊ីត លោក មាស រតនៈ បានថ្លែងប្រាប់ទស្សនាវដ្តីមនោរម្យ.អាំងហ្វូ នៅ​ល្ងាច​ថ្ងៃទី២១ ខែមីនាថា ថាប្អូនស្រីរបស់លោក កញ្ញា មាស វ៉ាន់នី បានទទួលមរណភាពហើយ កាលពីវេលាម៉ោង ប្រមាណ​ជាមួយរសៀល ក្នុងថ្ងៃសៅរ៍ដដែលនេះ នៅមន្ទីពេទ្យកាល់ម៉ែត បន្ទាប់ពីការវះកាត់មួយ។

លោកបានស្រង់សម្ដីគ្រូពេទ្យ នៅមន្ទីរពេទ្យមកបញ្ជាក់ថា នាងស្លាប់ដោយសារជម្ងឺ គាំងបេះដូង។ មុនពេលទទួល​មរណភាពនេះ យុវតី មាស វ៉ាន់នី វ័យ២០ឆ្នាំ ទើបតែបានទទួលការវះកាត់ ដើម្បីយកសរសៃរសក់ និងក្រណាត់ អាវ​ចេញ​ពី​​សាច់។

កាលពីថ្ងៃទី ១១ ខែមីនា ឆ្នាំ២០១៥កន្លងទៅនេះ លោក មាស រតនៈ បានថ្លែងប្រាប់ទស្សនាវដ្ដី ពី​សភាព​ប្រសើរឡើង នៃសុខភាពរបស់ប្អូនស្រីលោក ដោយអះអាងថា នៅពេលនោះ នាងអាច​ដើរបាន និងអង្គុយ​បាន​ខ្លះៗហើយ បើទោះ​ជា​ផ្ទៃ​មុខ និងដងខ្លួនរបស់នាង ត្រូវ​បាន​រលេះរលួយ ដោយសារតែ​ឥទ្ធិពលទឹក​អាស៊ីតក៏ដោយ។ ករណីដែលគួរឲ្យព្រួយ​បារម្ភ​បំផុតនោះ គឺភ្នែករបស់នាងម្ខាង ត្រូវ​បានពិការទាំងស្រុង និងភ្នែកម្ខាងទៀត មើល​ឃើញ តែ​មិន​សូវ​ច្បាស់។

នៅថ្ងៃទី ១១ ខែមីនា ដដែលនោះ រូបថតជាច្រើន (ដូចខាងក្រោម) ដែលថតពីយុវតី មាស វ៉ាន់នី កំពុងអង្គុយនៅលើគ្រែ ក្នុងមន្ទីរពេទ្យ ក៏ត្រូវបានបង្ហោះផ្សាយព្រោងព្រាត ពាសពេញបណ្ដាញសង្គមដែរ។ ស្ថានភាពរបៀបនេះ មិនខុសប៉ុន្មាន ទៅនឹងការអះអាង របស់បងប្រុសនាង ដែលថា សុខភាពរបស់នាង ត្រឡប់មករកប្រក្រតីភាពវិញឡើយ។

រីឯលោក សោភ័ណ្ឌ ឡារី សិល្បករសម្ដែងមួយរូប ដែលបានទៅ​ជួប​យុវតី មាស វ៉ាន់នី និងប្អូនស្រីបង្កើតរបស់នាង នៅ​ក្នុង​មន្ទីរ​ពេទ្យ កាល​ពីថ្ងៃសុក្រទី២០ ខែមីនា (មួយថ្ងៃមុន) ក៏បានបញ្ជាក់ដែរថា នារីរងគ្រោះ ត្រូវបាន​វះ​កាត់​រួច​រាល់​ ហើយ​ស្ថាន​ភាព​​​ជំងឺ​ មានលក្ខណៈធម្មតា និង​ស្ថិត​​នៅ​ក្រោម​ការ​តាម​ដាន ​​ជា​បន្ត​ទៀត។

ទស្សនាវដ្ដីមិនអាចស្វែងរកការពន្យល់ ពីក្រុមគ្រូពេទ្យជំនាញ នៅមន្ទីរពេទ្យកាល់ម៉ែត្របានឡើយ នៅពេលភ្លាមៗ​នេះ។

សពរបស់នារីរងគ្រោះ ព្រោះទឹកអាស៊ីត ដែលជាអតីតបុគ្គលិក សន្ដិសុខរោងចក្រ ស៊ិនតាយខាងលើ ត្រូវបានក្រុម​គ្រួសារ ដឹកយកទៅតម្កល់ធ្វើបុណ្យ នៅឃុំអន្សារចំបក់ ស្រុកក្រគរ ខេត្តពោធិ៍សាត់។ នេះបើតាមការអះអាង របស់​បង​ប្រុស​នារី​រងគ្រោះ លោក មាស រតនៈ ដដែល។

យុវតីរងគ្រោះ មាស វ៉ាន់នី ត្រូវបានស្ត្រីជាជនសង្ស័យ ស្រឿន នាន់ អាយុ ៣៨ឆ្នាំ ជះទឹកអាស៊ីតស្រោចពេញក្បាល មុខ នឹង​ដង​ខ្លួនមួយភាគធំ ខណៈនាងកំពុងធ្វើដំណើរ ទៅរោងចក្រកាលពីម៉ោង ៦ និង១០នាទីព្រឹកព្រលឹម ថ្ងៃទី៦ ខែមីនា ឆ្នាំ​២០១៥ នាមុខ​ផ្សារកាណាស៊ីធី ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ។ ជនសង្ស័យ ត្រូវបានក្រុម​សមត្ថកិច្ច​​នគរបាល ខណ្ឌ​ពោធិ៍សែនជ័យ ចាប់ខ្លួននៅបន្តិចក្រោយ ពីពេលកើតហេតុ និងបញ្ជូនទៅតុលាការរួចរាល់ហើយ៕

» រូបថតកញ្ញា មាស វ៉ាន់នី ដែលបង្ហោះតាមបណ្ដាញសង្គម នៅថ្ងៃទី១១ ខែមីនា៖