មានពាក្យសំដីជាច្រើន តែងពោលថា សកម្មភាពប្លន់នៅខេត្តព្រះសីហនុ ច្រើនតែគេចមិនរួច ពីសំណាញ់​នគរបាល។ ហេតុអ្វី? មូលហេតុដែលបានលើកឡើង បានអះអាងថា ព្រោះខេត្តនេះនៅជាប់ទឹកសមុទ្រ រីឯ​ច្រក​គេច​ខ្លួន របស់ក្រុមជនល្មើសវិញ មានតែផ្លូវជាតិលេខ៤មួយប៉ុណ្ណោះ។

តាមទំព័រហ្វេសប៊ុក រស់ស្នងការដ្ឋាននគរបាល ខេត្តព្រះសីហនុ បានឲ្យដឹងថា ហេតុការណ៍ប្លន់ ដោយ​ប្រើ​អាវុធគំរាមកហែងយកម៉ូតូនេះ បានកើតឡើង នៅយប់ថ្ងៃទី២៨ ខែតុលា ឆ្នាំ២០១៥ វេលាម៉ោង២០ និង​០០នាទី នៅចំណុចមុខវត្តព្រហ្មកេរ្មិ៍ ស្ថិតក្នុងភូមិបឹងវែង ឃុំវាលរេញ ស្រុកព្រៃនប់ ខេត្តព្រះសីហនុ បណ្តាល​ឲ្យ​ជន​សង្ស័យ រងរបួសជើងខាងស្តាំ បន្ទាប់ពីមានការបាញ់តដៃគ្នាមួយ។

ប្រភពដដែលបានឲ្យដឹងទៀតថា មុនកើតហេតុ ជនរងគ្រោះបានជិះម៉ូតូ ទៅញុំាបង្អែមនៅមុខ​កន្លែងស្នាក់នៅ ហើយក៏មានវត្តមានជនសង្ស័យនៅទីនោះដែរ។ បន្តិចក្រោយមក ជនសង្ស័យបានប្រើកាំភ្លើង គំរាមប្លន់យក​ម៉ូតូពីជនរងគ្រោះតែ ម្តង និងបានជិះម៉ូតូជនរងគ្រោះ គេចខ្លួនតាមផ្លូវជាតិលេខ៤ ឆ្ពោះទៅភ្នំពេញ។

ក្រោយពីពត៌មាននេះ ត្រូវបានលេចឮដល់ក្រុមសមត្ថកិច្ចភ្លាម កម្លាំងអធិការដ្ឋានស្រុកព្រៃនប់ បានសហការ​ជាមួយកម្លាំង កងរាជអាវុធហត្ថស្រុកព្រៃនប់ ដេញតាម ចាប់ជនសង្ស័យបាន នៅចំណុចភូមិបឹងត្រាច ឃុំ​ចំការហ្លួង ស្រុកកំពង់សិលា។ ប៉ុន្តែជនសង្ស័យបានបាញ់ មកលើសមត្ថកិច្ច បង្ខំឲ្យសមត្ថកិច្ចបាន​បាញ់តប​វិញ បណ្តាលឲ្យជនសង្ស័យនោះ បានរងរបួសជើងខាងស្តាំ របស់ខ្លួន។ ចំណែកបក្សពួកចោរផ្សេងទៀត បាន​គេចខ្លួនបាត់។

ជនសង្ស័យឈ្មោះ ចាន់ ក្តឹប ភេទប្រុស អាយុ ៤០ឆ្នាំ មានមុខរបរមិនពិតប្រាកដ មានទីលំនៅ នៅសង្កាត់​ចោមចៅ ខណ្ឌពោធិ៍សែនជ័យ រាជធានីភ្នំពេញ បានប្រើកាំភ្លើងខ្លីកា៥៩ ប្លន់កំហែងយកម៉ូតូ ប្រភេទសេ ១២៥ សេរី២០១៥ ពណ៌ខ្មៅ ពាក់ផ្លាកលេខ 2AZ 0312 ។ ចំណែកជនរងគ្រោះ មានឈ្មោះ វន ពិសិទ្ឋ ភេទប្រុស អាយុ ២១ ឆ្នាំ មុខរបរបុគ្គលិកធនាគាអេស៊ីលីដា ស្នាក់នៅក្នុងភូមិឃុំ ដែលកើតរឿងខាងលើ។

បច្ចុប្បន្ន ជនសង្ស័យត្រូវបានបញ្ជូន ទៅព្យាបាលនៅគ្លីនិចឯកជនវាលរេញ ដោយមានការយាមកាម ពីកម្លាំង​អធិការដ្ឋាន និងកម្លាំងកងរាជអាវុធហត្ថស្រុក ដើម្បីរងចាំការដោះស្រាយ នៅពេលក្រោយ៕