លោកអ្នកប្រិយមិត្តអ្នកអាន ទំនងជានៅចាំនៅឡើយ ពីសំណុំរឿងនេះ ដែលត្រូវបានទស្សនាវដ្ដីមនោរម្យ.អាំងហ្វូ យក​មកចុះផ្សាយ កាលពីអំឡុងខែកញ្ញា ឆ្នាំទៅម៉ិញ ពីចាងហ្វាងធានាគារ ប្ដីប្រពន្ធដើមកំណើតខ្មែរពីរនាក់ ត្រូវបានប្រព័ន្ធ​យុត្តិធម៌ នៃប្រទេសកាណាដា រកឃើញថា បានលាងសំអាតលុយកខ្វក់ ប្រមាណជាជាង ១០០លានដុល្លារ ពីការរកស៊ី​មាន​បាន ក្នុងជំនួយជួញដូរ គ្រៀងញៀន ឬថ្នាំស្រវឹង។

» សូមអានអត្ថបទនេះឡើងវិញ ដោយចុចនៅលើទីនេះ។

តុលាការក្រុងកេប៊ិច ទើបនឹងសម្រេចប្រកាសសាលក្រម ផ្តន្ទាទោសអ្នកទាំងពីរ អ្នកស្រី ឡេច ឡេងគី និងស្វាមី លោក ឈុន ស៊ីវ៉េង មានដើមកំណើតខ្មែរ និងមានទីលំនៅក្នុងក្រុងម៉ុងរ៉េអាល់ ឲ្យជាប់ពន្ធនាគារ៨ឆ្នាំ ហើយត្រូវបង់​ប្រាក់​ពិន័យ ប្រមាណជា១០លានដុល្លារអាមេរិក។

តុលាការបានរកឃើញថា តាមរយៈ បញ្ជរប្ដូរប្រាក់របស់ខ្លួន បុរសស្ត្រីទាំងពីរនាក់ បានលាងលុយកខ្វក់ ដែលបានមកពី​ការ​រត់គ្រឿងញៀន ស្រវឹង ចេញពីច្រើនប្រទេស មុននឹងយកលុយទាំងនោះ ទៅទិញជាអចលនទ្រព្យ ពេជ្រត្បូងមាន​តម្លៃ និងផ្ញើរទៅកាន់ប្រទេសកម្ពុជា។ ការផ្ទេរលាងសំអាត ប្រាក់កខ្វក់ទាំងនោះ ត្រូវបានធ្វើនៅក្នុងក្រុង កេប៊ិច នៅ​ក្នុង​ប្រទេសកូឡំប៊ី ម៉ិចស៊ិច គុយបា បាហាម៉ាស ចាម៉ែអ៊ិក ផ្លរីដ អ៊ីស្ត្រាអែល ប៊ែលហ្សិក និងជាពិសេស​នៅ​ក្នុងប្រទេស​កម្ពុជា។

ក្រៅពីការផ្ដន្ទាទោសខាងលើ តុលាការនៅបានបង្គាប់ ឲ្យរឹបអូសទ្រព្យសម្បត្តិរបស់អ្នកទាំងពីរ ក្នុងនោះមានភូមិគ្រិះ​ចំនួន​ពីរកន្លែង ដែលមួយកន្លែង មានតម្លៃប្រមាណជា១,៥លានដុល្លារ រួមទាំងគ្រឿងអលង្ការ ពេជ្រត្បូង ទាំងអស់ ព្រម​ទាំងភាគហ៊ុនទាំងឡាយ ដែលមាននៅក្នុងប្រទេសកម្ពុជាផងទៀត។ ជាសាលក្រមមួយ ដែលបង្ហាញពីស្ថានទំងន់​ទោស​ធ្ងន់ធ្ងរ និងចង់សម្ដែងឲ្យដឹងថា មិនត្រូវប្រព្រឹត្តិល្មើស ហើយយកមកប្រឡែងលេង ជាមួយនឹងប្រព័ន្ធយុត្តិធម៌ របស់​ប្រទេសនានា នៅបស្ចឹមលោកឡើយ៕