ទីបំផុតទៅ តុលាការកំពូលបានសម្រេច បន្តតម្កល់សាលដីការ របស់សាលាឧទ្ធរណ៍ទុកជាបានការ ពោលគឺបន្ត​ឃុំខ្លួនលោកវន់ ពៅ និងជន២០នាក់។ តែសម្រាប់មន្រ្តីសិទ្ធិមនុស្ស បានចាត់ទុកការសម្រេចរបស់តុលាការកំពូលថា ជាហេតុផលនយោបាយ និងបានអះអាងថាករណីលោកវន់ ពៅ និងជន២០នាក់ ពិតជាអាចសុំនៅក្រៅឃុំបាន បើ​យោងតាមផ្លូវច្បាប់។

ស្ថាប័នតុលាការកំពូលកម្ពុជា មើលពីក្រៅ។ (រូបថត MONOROOM.info/ O. Vary)

ដោយ អ៊ំ បូរី (ទំនាក់ទំនង៖ [email protected]) - ភ្នំពេញ ថ្ងៃទី០៩ ឧសភា ២០១៤
---------------------

សិទ្ធិ - «អ្នកទាំង២១នាក់ជាចំណាត់ខ្មាំងនយោបាយ បានជាមិនអាចដោះលែងឲ្យនៅក្រៅឃុំ។ តែគេបោះបាល់​ឲ្យ​គ្នាទៅវិញទៅមករវាងតុលាការកំពូល និងសាលាដំបូងរាជធានីភ្នំពេញ»។ នេះជាការថ្លែងរបស់លោកអំ សំអាត អ្នក​ឃ្លាំមើលការគោរពសិទ្ធិមនុស្ស នៃអង្គការលីកាដូ ដល់អ្នកសារព័ត៌មាន ក្រោយការសម្រេចរបស់តុលាការកំពូល នៅថ្ងៃទី០៩ ខែឧសភា ឆ្នាំ២០១៤។

តុលាការកំពូល នៅថ្ងៃទី០៩ ខែឧសភា ឆ្នាំ២០១៤ នេះ ដោយសំអាងថាសំណុំរឿងលោក វន់ ពៅ ប្រធានសមាគម​ប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងអ្នកជាប់ឃុំ២០នាក់ផ្សេងទៀត កំពុងដំណើរការសវនាការ​នៅ​សាលាតំបូងរាជធានីភ្នំពេញ និងហេតុផលផ្សេងទៀត បានបន្តតម្កល់សាលដីការរបស់សាលាឧទ្ធរណ៍ ដោយ​បដិសេធ​ការសុំនៅក្រៅឃុំរបស់មេធានីលោកវន់ ពៅ និងជន២០នាក់។

គួរកត់សម្គាល់ថា ការបើកសវនាការ និងការប្រកាសសាលដីការបស់តុលាការកំពូលនាពេលនេះ បានធ្វើឡើង​បន្ទាប់ពីសាលាឧទ្ឋរណ៏កាលពីរថ្ងៃទី២៥ ខែមីនា ឆ្នាំ២០១៤ បានសម្រេចតម្កល់​សាលក្រមសាលាដំបូងរាជធានី​ភ្នំពេញទុកជាបានការ។ សាលក្រម ដែលទាត់ចោល ការសុំនៅក្រៅឃុំរបស់លោកវន់ ពៅ និងជន២០នាក់។

លោកអំ សំអាត បានចាត់ទុកការបន្តបដិសេធការសុំនៅក្រៅឃុំ ដោយប្រព័ន្ធតុលាការកម្ពុជា ចំពោះករណីលោក វន់ ពៅ និងជន២០នាក់ ថាជាការបង្ហាញឲ្យឃើញថាឥទ្ធិពលនយោបាយ និងផលប្រយោជន៍គណបក្សនយោបាយ កំពុង​ធ្វើឲ្យប៉ះពាល់ដល់ប្រព័ន្ធយុត្តិធម៌ និងផលប្រយោជន៍រួមរបស់កម្ពុជា។ អ្នកឃ្លាំមើលការគោរពសិទ្ធិមនុស្ស នៃអង្គការ​លីកាដូរូបនេះ បានបញ្ជាក់ទៀតថា៖ «ឈរលើគោលការណ៍មនុស្សធម៌ និងស្ថានភាពសុខភាព បទល្មើសនេះអាច​នៅ​ក្រៅឃុំបាន ប៉ុន្តែសំខាន់ ដោយសារហេតុផលរឿងនយោបាយ។»

កន្លងមកគណបក្សសង្រ្គោះជាតិ ធ្លាប់អះអាងថានឹងនាំយកករណីលោក វន់ ពៅ និងជន២០នាក់ ទៅដាក់ក្នុងរបៀប​វារៈ​ចរចានយោបាយ ជាមួយគណបក្សប្រជាជនកម្ពុជា ដើម្បីឲ្យមានការដោះលែង។ តែសម្រាប់លោកជាម យៀប មន្រ្តីជាន់ខ្ពស់របស់គណបក្សប្រជាជនកមម្ពុជា បានលើកឡើងថា ករណីលោកវន់ ពៅ និងជន២០ នាក់ មិនជាប់​ពាក់​ព័ន្ធក្នុងរឿងនយោបាយ នោះទេ ហើយពួកគេនឹងទទួលទោសតាមផ្លូវច្បាប់ និងតាមរយៈឆន្ទានុសិទ្ធិរបស់​ចៅក្រម៕