ក្រសួងអប់រំទទួលស្គាល់ការបង់ប្រាក់ពិន័យបទល្មើស តែជាប្រាក់កម្ចី
- ដោយ: ដារី ([email protected]) - ភ្នំពេញ ថ្ងៃទី២៣ មិថុនា ២០១៦
- កែប្រែចុងក្រោយ: June 23, 2016
- ប្រធានបទ: បទល្មើស
- អត្ថបទ: មានបញ្ហា?
- មតិ-យោបល់
-
សេចក្ដីប្រកាសព័ត៌មានមួយ របស់ក្រសួងអប់រំ យុវជន និងកីឡា ដែលចេញផ្សាយ នៅរសៀលថ្ងៃទី២៣ ខែមិថុនានេះ បានឲ្យដឹងថា លោក គ្រី ស៊ាងឡុង ប្រធាននាយកដ្ឋានតម្រង់ទិសវិជ្ជាជីវៈ ដែលត្រូវបានក្រសួងចាត់តាំង ឲ្យទៅចូលរួមក្នុងសិក្ខាសាលា នៅប្រទេសកូរ៉េខាងត្បូងនោះ បាន«បៀតបៀនរាយកាយ»របស់នារី អ្នកបកប្រែជាជនជាតិ កូរ៉េម្នាក់ នៅថ្ងៃបិទបញ្ចប់សិក្ខាសាលា មុននឹងត្រូវបានសមត្ថកិច្ច របស់ប្រទេសនេះចាត់វិធានការ ទៅតាមផ្លូវច្បាប់។
រឿងអាស្រូវរបស់មន្ត្រីជាន់ខ្ពស់ ថ្នាក់ប្រធាននាយកដ្ឋានរូបនេះ បានបែកធ្លាយជាសាធារណៈ បន្ទាប់ពីសារព័ត៌មានជាច្រើន នៅប្រទេសកូរ៉េខាងត្បូង បានរាយការណ៍ ពីការឃាត់ខ្លួនលោក ស៊ាងហុង ដែលបានកើតឡើង កាលពីយប់ម៉ោង១០ នៅថ្ងៃទី២៦ ខែឧសភា ឆ្នាំ២០១៦កន្លងទៅ ក្នុងសង្កាត់មួយ នៃរដ្ឋធានីសេអ៊ូល នាអំឡុងពេល នៃដំណើរទស្សនកិច្ចរបស់លោក ដើម្បីចូលរួមវេទិកា ស្ដីពីការអភិវឌ្ឍន៍ធនធានមនុស្ស អាស៊ានបូក៣ ឆ្នាំ២០១៦ ហៅជាភាសាអង់គ្លេសថា «2016 ASEAN+3 HRD Forum»។ ការចាប់ខ្លួននោះ ត្រូវបានធ្វើឡើងតាមបណ្ដឹងភ្លាមៗ របស់ស្ត្រីអ្នកបកប្រែភាសា ដែលបានចោទលោក គ្រី ស៊ាងឡុង ថាបានលូកដៃទៅចាប់ចង្កេះ និងព្យាយាមថើបនាង។
» អានអត្ថបទនេះឡើងវិញ៖ ក្រសួងអប់រំបង់ប្រាក់ជាង១ម៉ឺនដុល្លារ ក្នុងបទល្មើសបៀតបៀនផ្លូវភេទមួយ នៅកូរ៉េខាងត្បូង
នៅក្នុងលិខិតមួយ របស់លោក ឡុង ឌីម៉ង់ ឯកអគ្គរាជទូតកម្ពុជា ប្រចាំនៅកូរ៉េខាងត្បូង ផ្ញើរទៅកាន់លោក ប្រាក់ សុខុន រដ្ឋមន្ត្រីការបរទេសកម្ពុជា បានឲ្យដឹងថា ដើម្បីជាថ្នូរនឹងការដោះលែង លោក គ្រី ស៊ាងឡុង នោះ រដ្ឋអាជ្ញាប្រចាំនៅសង្កាត់ "Seoul Southern" បានសម្រេចផាកពិន័យ ជាប្រាក់ចំនួន ៣.៦០០.០០០វ៉ុន និងសងជំងឺចិត្តដល់ជនរងគ្រោះ ចំនួន៥.០០០.០០០វ៉ុន និងថ្លៃមេធាវី ចំនួន ៥.៥០០.០០០វ៉ុន។ លោក ឌីម៉ង់ បានសរសេរថា៖ «ថវិកាទាំងអស់នេះ គឺបានពីការផ្ដល់ពីក្រសួងអប់រំ យុវជន និងកីឡា ដើម្បីដោះស្រាយសំណង»។
អង្គភាពរដ្ឋ និងគោលការណ៍...
រីឯសេចក្ដីប្រកាសព័ត៌មានដដែល របស់ក្រសួងអប់រំ បានអះអាងពន្យល់ ក្នុងករណីនេះថា៖ «ក្នុងការដោះស្រាយបាតុភាពនោះ សាមីខ្លួនបានខ្ចីថវិកាមួយចំនួន ដែលបានមកពីសហការី និងរបស់អង្គភាព នៃនាយកដ្ឋានតម្រង់ ទិសវិជ្ជាជីវៈ ដើម្បីបង់ពិន័យទៅតាម ការសម្រេចរបស់តុលាការ ជាសំណងរដ្ឋប្បវេណី។ ប៉ុន្តែជាគោលការណ៍ក្រសួងសេដ្ឋកិច្ច និងហិរញ្ញវត្ថុ មិនអនុញ្ញាតឲ្យយកថវិការបស់រដ្ឋ ទៅដោះស្រាយរឿងផ្ទាល់ខ្លួន របស់បុគ្គលឡើយ។ ដោយឡែកថវិកាដែល ខ្ចីពីអង្គភាព ត្រូវបានសាម៉ីជនបង្វែរសងអង្គភាព រួចរាល់ហើយ។»
ក្រសួងអប់រំបានបញ្ជាក់ទៀតថា៖ «ក្រុមប្រឹក្សាវិន័យរបស់ក្រសួង បានចាត់វិធានការរដ្ឋបាល ដោយអនុលោមច្បាប់ស្តីពីសហលក្ខន្កិកៈ មន្ត្រីរាជការស៊ីវិល នៃព្រះរាជាណាចក្រកម្ពុជា និងគោលការណ៍ណែនាំ ដែលនៅជាធរមាន ដោយបានដកតួនាទី ពី (លោក គ្រី ស៊ាងឡុង) ប្រធាននាយកដ្ឋាន តម្រង់ទិសវិជ្ជាជីវៈ នៃក្រសួងអប់រំ យុវជន និងកីឡា»។
គេឆ្ងល់ថា បើគ្មានការចេញផ្សាយ ពីសំណាក់សារព័ត៌មាន ទាក់ទងនឹងរឿងអាស្រូវមួយនេះទេ ថាតើក្រសួងអប់រំពិតជាដកតំណែង ពីលោក គ្រី ស៊ាងឡុង មែនឬ? ឬមួយការដកតំណែងតួនាទី ពីប្រធាននាយកដ្ឋានមួយទាំងមូល មិនត្រូវបានក្រសួងរដ្ឋមួយនេះ ប្រកាសឲ្យដឹងជាសាធារណៈទេឬ នៅមុនការបែកធ្លាយ?
គេឆ្ងល់ទៀតថា តើពលរដ្ឋកម្ពុជាគ្រប់រូប អាចមានសំណាង ដូចលោក គ្រី ស៊ាងឡុង ដែលបានប្រព្រឹត្តិបទល្មើស «បៀតបៀនលើរាងកាយ» ហើយ នៅមានការយកចិត្តទុកដាក់ ពីសំណាក់សហការី និងអង្គភាពរបស់រដ្ឋ អាចផ្ដល់ជាប្រាក់កម្ចី ដើម្បីយកទៅបង់សងជំងឺចិត្ត ដល់ជនរងគ្រោះ នឹងអាលរួចផុតពីការឃុំខ្លួន នៅប្រទេសកូរ៉េខាងត្បូងនោះ?