អគ្គីភ័យមួយបានឆាប់ឆេះ យករោងជូសជុលរថយន្តមួយកន្លែង នៅភូមិ ទួលគោក សង្កាត់ទួលសង្កែ ខ័ណ្ឌឫស្សីកែវ រាជធានី​ភ្នំពេញ អស់មួយផ្នែកធំ នៃរោងជួសជុលរថយន្តនោះ។ អាជ្ញាធរនៅមិនទាន់ ប្រាប់ឲ្យដឹងពីតុល្យភាពចុងក្រោយ នៃការ​ខូច​ខាត ដែលទទួលរង ពីការឆេះនេះនៅឡើយ។ ប៉ុន្តែអគ្គីភ័យនោះ ត្រូវបានក្រុមពន្លត់អគ្គិសនី បានព្យាយាម​ជួយ​ពន្លត់​អគ្គីភ័យ​នោះ រលត់អស់៩៩ភាគរយហើយ ដែលប្រើប្រាស់រថយន្តពន្លត់អគ្គីភ័យ ចំនួន ៩គឿង របស់​សាលារាជធានី​ភ្នំពេញ។ នេះ​បើតាមការបញ្ជាក់ របស់លោក លីន ញ៉ក់ អភិបាលរងខ័ណ្ឌឫស្សីកែវ។

តាមប្រភពព័ត៌មាន ដែលបានពិនិត្យមើលករណីនេះ បានរកឃើញប្រភព ដែលបានឆាបឆេះមុនគេ គឺនៅត្រង់ចំណុចមួយ ជិតម៉ាស៊ីនប៉ុងស្ទូចរថយន្តឡើង សំរាប់ជួសជុល។ ប្រភពដដែលនោះ បានសន្និដ្ឋានថា មូលហេតុដែលបង្កគ្រោះអគ្គិភ័យ គឺបណ្តាលមកពីផ្ទុះសេខ្សែភ្លើង។

អ្នកស្រី អុក ចាន់រ៉ានី បានប្រាប់ទស្សនាវដ្តីមនោរម្យ.អាំងហ្វូថា អ្នកស្រី និងក្រុមគ្រួសារមិនបានដឹងពីមូលហេតុនោះទេ ហើយ​ក៍មិនបានដឹងថា ភ្លើងឆេះនៅពេលណាដែរ ព្រោះអ្នកស្រីមិនបាននៅផ្ទះនោះទេ ដោយពួកគាត់រវល់ទៅរកស៊ី នៅ​កន្លែង​មួយទៀត ហើយគាត់មកគេងស្នាក់នៅ ក្នុងរោងជួសជុលរថយន្តនេះ តែពេលយប់ប៉ុណ្ណោះ។ អ្នកស្រីថា អ្នកស្រី​មាន​ការភ្ជាក់ផ្អើលណាស់ នៅពេលដែលអ្នកជិតខាងរបស់អ្នកស្រី ប្រាប់តាមទូរស័ព្ទថា ភ្លើងឆេះផ្ទះអ្នកស្រីដូច្នេះ។

ស្ត្រីរូបនេះ បានបញ្ជាក់ថា ភ្លើងមិនបានរាលដាល ដល់ផ្ទះអ្នកជិតខាងទេ តែបានឆេះ តែនៅក្នុងប្លុកផ្ទះ របស់អ្នកស្រី​ប៉ុណ្ណោះ។ រីឯទ្រព្យសម្បត្តិក្នុងផ្ទះ រួមទាំងគ្រឿងជួសជុលរថយន្ត ត្រូវបានឆេះទាំងស្រុង មិនមានសេសសល់អ្វីឡើយ។ បើគិតជាទឹកប្រាក់ ដែលខាតបង់ ត្រូវបានអ្នកស្រីអះអាងថា មានប្រមាណជា ៤ម៉ឺនដុល្លា៕