ឃាតកម្មលើព្រះសង្ឃ ម៉ឹង អ៊ំ៖ ចាប់អតីតគ្រូសូត្រម្នាក់ បញ្ជូនទៅតុលាការ
- ដោយ: ប្រាថ្នា អត្ថបទ ៖ប្រាថ្នា([email protected]) - ភ្នំពេញ ថ្ងៃទី១២ កុម្ភៈ ២០១៥
- កែប្រែចុងក្រោយ: February 13, 2015
- ប្រធានបទ: ឧក្រិដ្ឋកម្ម
- អត្ថបទ: មានបញ្ហា?
- មតិ-យោបល់
-
រហូតមកដល់ពេលនេះ ជនសង្ស័យម្នាក់ ត្រូវបានចាប់ខ្លួន ពាក់ព័ន្ធនឹងករណីឃាតកម្មបាញ់សម្លាប់ ព្រះសង្ឃ ម៉ឹង អ៊ំ ព្រះជន្ម ៧៦ព្រះវស្សា ដែលជាព្រះគ្រូសូត្រស្តាំ វត្តអង្គស្នៀត ស្ថិតនៅក្នុងភូមិថ្មី ឃុំតាំងក្រូច ស្រុកសំរោងទង ខេត្តកំពង់ស្ពឺ កាលពីពេលកន្លងមក។ នេះជាការអះអាងរបស់លោក អ៊ុង សាមិត្ត មន្រ្តីសម្របសម្រួលអង្គការការពារសិទ្ធិមនុស្ស លីកាដូ ប្រចាំខេត្តកំពង់ស្ពឺ។
មន្ត្រីសិទ្ធិមនុស្សបានថ្លែងបញ្ជាក់ប្រាប់ទស្សនាវដ្តីមនោរម្យ.អាំងហ្វូ ថា ជនសង្ស័យដែលត្រូវបានបញ្ជូន ទៅកាន់សាលាដំបូងខេត្ត គឺជាអតីតគ្រូឆ្វេងវត្តអង្គស្នៀត ដែលធ្លាប់គង់នៅវត្តជាមួយគ្នា។ ប៉ុន្តែឥលូវនេះ គ្រូឆ្វេងនោះ បានសឹករួចទៅហើយ។
លោក អ៊ុង សាមិត្ត បានដាក់ការសង្ស័យទៀតថា ករណីឃាតកម្មនេះ ប្រហែលបណ្តាលមកពីរឿងលុយកាក់។ ហើយរឿងនេះ បានកើតឡើង តាំងពីជនសង្ស័យមិនទាន់សឹកមកម្លេះ។
ទាក់ទងនឹងករណីនេះដែរ លោក ឃុត សុផល អធិការស្រុកសំរោងទង បានឱ្យដឹងដែរថា លោកបានធ្វើការស្រាវជ្រាវ បញ្ចូនសំនុំរឿងបាញ់សម្លាប់នេះ ទៅអ្នកទទួលខុសត្រូវថ្នាក់ខេត្តរួចហើយ ឯការសម្រេចថាយ៉ាងណានោះ លោកមិនអាចប្រាប់បានទេ។ យ៉ាងណាម៉ិញ អធិការស្រុកសំរោងទងរូបនេះ មិនបានបញ្ជាក់ឱ្យដឹង ពីការកំណត់មុខមុខសញ្ញាឃាតករឡើយ។
លោក ឃុត សុផល បានបញ្ជាក់បន្ថែមថា៖ «អានេះគ្រាន់តែខ្ញុំស្រាវជ្រាវតាមបណ្តាញ តាមដែលថា រឿងដែលយើងបានស្រាវជ្រាវទៅ ឃុំឬមិនឃុំ អាស្រ័យទៅលើថ្នាក់លើទេ»។
គួររម្លឹកថា ព្រះតេជគុណ ម៉ឹង អ៊ំ គ្រូសូត្រស្តាំវត្តអង្គស្នៀត ត្រូវបានឃាតករមិនស្គាល់មុខ បាញ់សម្លាប់កាលពីវេលាម៉ោង ៨ និង៣០នាទី យប់ថ្ងៃទី២៤ ខែមករា ឆ្នាំ២០១៥ បណ្តាលឱ្យសុគតភ្លាមៗ នៅក្នុងពិធីបុណ្យខួបគំរប់មួយឆ្នាំ របស់កូនប្រុសលោក គង់ ឌឹម ខណៈដែលព្រះអង្គកំពុងទេសនា បានប្រមាណ ៥នាទី៕