សង្គម​ស៊ីវិល​ថា​ក្រសួង​យុត្តិធម៌​បំពាន​តុលាការ ព្រោះ​ច្បាប់​ទាំង​បី

«រដ្ឋមន្រ្តីក្រសួងយុត្តិធម៌ គាត់មានសិទ្ធក្នុងត្រួតពិនិត្យ។ អាហ្នឹង វាអត់មានឯករាជ្យភាព។ ឯករាជ្យភាព ទាល់តែវាស្វ័យ័ត។» នេះជាការលើកឡើងរបស់លោក អំ សំអាត ឆ្លើយតបទៅនឹងការលើកឡើង របស់អ្នកនាំពាក្យក្រសួងយុត្តិធម៌ ដែលថាច្បាប់បីទាក់ទងវិស័យយុត្តិធម៌ គ្មានការបំពានពីអំណាចនិតិប្រតិបត្តិ។
Loading...
  • ដោយ: ប្រាថ្នា អត្ថបទ ៖ប្រាថ្នា([email protected]) - យកការណ៍៖ស្រ៊ុន ទិត្យ - ភ្នំពេញ ថ្ងៃទី១១ កុម្ភៈ ២០១៥
  • កែប្រែចុងក្រោយ: February 13, 2015
  • ប្រធានបទ: យុត្តិធម៌
  • អត្ថបទ: មានបញ្ហា?
  • មតិ-យោបល់

សង្គម​ស៊ីវិល​នៅ​តែ​មើល​ឃើញ​ថា អំណាច​និតិ​ប្រតិបត្តិ នៅ​តែ​មាន​ឥទ្ធិពល​ទៅ​លើ​តុលាការ ដោយ​សារ​ច្បាប់​ទាំង​បី។ នេះ​ជា​ការ​លើក​ឡើង​របស់​ លោក អំ សំអាត មន្ត្រី​​មក​ពី​អង្គការ​ការពារ​សិទ្ធិ​មនុស្ស​លីកាដូ និង​ជា​តំណាង​​ឲ្យ​អង្គការ​​សង្គម​​ស៊ីវិល​មួយ​ចំនួន នៅ​ក្នុង​សន្និសីទ​ការសែត​ជាតិ​មួយ ដែល​ធ្វើការ​ពិភាក្សា​ដេញ​ដោល​អំពី​ច្បាប់​ទាំង​បី ដែល​ទាក់ទង​និង​វិស័យ​យុត្តិធម៌។ ការ​ថ្លែង​របស់​លោក អំ សំអាត ជា​ការ​ឆ្លើយ​តប​ទៅ​នឹង​ការ​អះអាង​របស់​លោក ជិន ម៉ាលីន ដែល​ជា​អនុរដ្ឋលេខាធិការ និង​ជា​អ្នក​នាំ​ពាក្យ​នៃ​ក្រសួង​យុត្តិធម៌ ដែល​បាន​ថ្លែង​ក្នុង​ឱកាស​នោះ​ដែរ​ថា​ ច្បាប់​ទាំង​បី ដែល​រដ្ឋសភា​កម្ពុជា​ទើប​នឹង​អនុម័ត​កាល​ពី​ប៉ុន្មាន​ខែ​មុន មិន​បាន​ផ្ដល់​អំណាច​ឲ្យ​រដ្ឋមន្ត្រី​ក្រសួង​យុត្តិធម៌ ធ្វើការ​បំពាន​ទៅ​លើ​អំណាច​ឯករាជ្យ របស់​តុលាការ​នោះ​ទេ។

ប្រព័ន្ធយុត្តិធម៌កម្ពុជាក្នុងពេលបច្ចុប្បន្ន បានរងការរិះគន់តិះទៀនយ៉ាងខ្លាំងក្លា ពីក្រុមអង្គការសង្គមស៊ីវិលមួយចំនួន ដោយ​ពួកគេទាំងនោះយល់ថា តុលាការកម្ពុជានៅតែមិនឯករាជ្យ មានភាពលំអៀងទៅរកអ្នកមានអំណាច និងអ្នក​មាន​ប្រាក់ ហើយជាពិសេសច្បាប់ទាំងបី ដែលទាក់ទងនឹងវិស័យយុត្តធម៌នៅកម្ពុជា មានការផ្តល់អំណាចច្រើន ដល់​អំណាច​និតិប្រតិបត្តិ ជាពិសេសក្រសួងយុត្តិធម៌។ ច្បាប់ទាំងបីនេះ ទើបនឹងត្រូវបានរដ្ឋសភាកម្ពុជា (កាលនោះ មាន​​តែក្រុមតំណាងរាស្ត្រពីគណបក្សប្រជាជនកម្ពុជា) អនុម័តដាក់ឲ្យប្រើប្រាស់ រួមមានច្បាប់ស្តីពីការរៀបចំ​អង្គការ​តុលាការ ច្បាប់ស្តីពី​លក្ខន្តិកៈ​នៃចៅក្រមនិងព្រះរាជអាជ្ញា និងសេចក្តីព្រាងច្បាប់ស្តីពីការរៀបចំ និង​ប្រព្រឹត្ត​ទៅ​នៃឧត្តម​ក្រុមប្រឹក្សា​នៃ​អង្គ​ចៅក្រម។

ប៉ុន្តែក្នុងក្ដីសង្ឃឹម ថាបន្ទាប់ពីសន្និសិទជាតិនេះទៅ ក្រុមអង្គការសង្គមដែលតែងតែធ្វើការរិះគន់ ចំពោះច្បាប់ទាំង​បីនេះ នឹងលែងយល់ច្រលំ និងបញ្ឈប់ការរិះគន់នោះ អ្នកនាំពាក្យក្រសួងយុត្តិធម៌បានថ្លែងបកស្រាយថា៖  «ពាក់​ព័ន្ធបញ្ហានេះ ដូចឯកឧត្តមរដ្ឋមន្រ្តីគាត់បានបកស្រាយរួចទៅហើយ គឺថា ច្បាប់បីនេះ មិនបានផ្តល់អំណាច​រដ្ឋមន្រ្តី​ក្រសួងយុត្តិធម៌ ក្នុងការបំពានទៅលើអំណាចឯករាជ្យរបស់តុលាការនោះទេ គ្រាន់តែសិទ្ធអំណាច ក្នុង​ការ​គ្រប់គ្រងរដ្ឋបាល ហិរញ្ញវត្ថុ និងដំណើរការរដ្ឋបាលទូទៅប្រចាំខែរបស់តុលាការ តែប៉ុណ្ណោះ ក៏ប៉ុន្តែ​អំណាច​ក្នុង​ការសម្រេចសេចក្តីនេះ គឺស្ថិតទៅលើអំណាចឯករាជ្យនេះ។»

លោក ជិន ម៉ាលីន បាននិយាយសម្ដែងក្ដីសង្ឃឹមនោះថា៖ «អញ្ចឹងទេ ក្រោយពីសន្និសិទនេះហើយ គឺមានការ​យល់គ្នាហើយ គឺច្បាប់ហ្នឹងដូចជាមិនជាមិនមានអីរំលោភ ទៅលើអំណាចឯករាជ្យ ទៅលើតុលាការពី​អំណាច​និតិប្រតិបត្តិនោះទេ»។

ប៉ុន្តែសម្រាប់មន្ត្រីតំណាងឲ្យអង្គការសង្គមស៊ីវិល លោក អំ សំអាត មិនយល់ដូច្នេះទេ។ ប្រធានផ្នែកស៊ើបអង្កេត​របស់អង្គការលីកាដូ ដែលធ្វើការយ៉ាងស្និត ជាមួយនឹងសំនុំរឿងរសើបជាច្រើននោះ បានថ្លែងថា៖ «ទី១យើង​មើល​ទៅលើទាក់ទង នឹងការតម្លើងឋានន្តរស័ក្ក ការសម្រេចដាក់ទោសចៅក្រម ការសម្រេចដាក់អី ក៏វាពាក់ព័ន្ធ ពីព្រោះរដ្ឋមន្រ្តីក្រសួងយុត្តិធម៌លោកមានសិទ្ធិ។ ហើយក្នុងណ្នឹង យើងមានមួយទៀតហៅថា លេខាធិការ​របស់​ក្រុមប្រឹក្សាអង្គចៅក្រម ក៏ចេញពីប្រភពហ្នឹងដែរ។»។

លោក សំអាត បានបន្ថែមទៀតថា៖ «យើងមើលច្បាប់ហ្នឹង រឿងអីថាមិនគ្រប? ការតម្លើង ការដក ការដាក់ ការ​ស្នើ​សុំរដ្ឋមន្រ្តីក្រសួងយុត្តិធម៌ដាក់ ទាក់ទងនិងរឿងថវិកា រដ្ឋមន្រ្តីក្រសួងយុត្តិធម៌គាត់មានសិទ្ធក្នុងត្រួតពិនិត្យ។ អា​ហ្នឹង វាអត់មានឯករាជ្យភាព។ ឯករាជ្យភាព ទាល់តែវាស្វ័យ័ត។»

មន្ត្រីអង្គការសង្គមស៊ីវិល បានបន្តថា កាលពីមុន នៅពេលដែលមានទាន់ច្បាប់ វិស័យតុលាការហាក់បីមាន​ភាព​គ្រាន់បើ ប៉ុន្តែនៅពេលមានច្បាប់ចេញមកបែបនេះ វាកាន់តែធ្វើឱ្យមានការរិះគន់បន្ថែមទៀត ទៅលើប្រព័ន្ធច្បាប់​ថាមិនឯករាជ្យ។ លោកថាច្បាប់ទាំងបីនេះ មិនមែនតែអង្គការសង្គមស៊ីវិលទេ ដែលធ្វើការរិះគន់សូម្បីតែ អន្តរជាតិ​ក៏គេធ្វើការរិះគន់ផងដែរ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...