បន្ទាប់​ពី​សម្រេច​បញ្ចុះ​តម្លៃ​ទឹក និង​ភ្លើង​ពិសេស​ទៅ​ដល់​កម្មករ​រោង​ចក្រ លោក​នាយក​រដ្ឋមន្រ្តី ហ៊ុន សែន បាន​ថ្លែង​ជា​សាធារណៈ​នៅ​ពេល​នេះ​ទៀត​ថា លោក​នឹង​ឲ្យ​ក្រុម​ការងារ រៀបចំ​សរសេរ​ច្បាប់​សម្រាប់​គ្រប់​គ្រង​ផ្ទះ​ជួល​ជា​បន្ត។ ថ្លែង​នៅ​មជ្ឈ​មណ្ឌល​កោះ​ពេជ្រ កាល​ពី​ថ្ងៃ​ទី​១០ ខែ​កុម្ភៈ​នេះ លោក​នាយក​រដ្ឋ​មន្រ្តី​ បាន​ពន្យល់​ថា ច្បាប់​នេះ​មាន​បំណង​​រារាំង​កុំ​ឲ្យ​ម្ចាស់​ផ្ទះ​ជួល អាច​តម្លើង​ថ្លៃ​ជួល​ស្រេច​តែ​នឹង​ចិត្ត។ ប៉ុន្តែ​ការ​លើក​ឡើង​ពី​គម្រោង​បង្កើត​ច្បាប់​នេះ បាន​បង្ក​ឲ្យ​ម្ចាស់​ផ្ទះ​មួយ​ចំនួន សម្ដែង​ការ​មិន​ពេញ​ចិត្ត និង​មួយ​ចំនួន​ទៀត និយាយ​ថា នេះ​ជា​នយោបាយ​ប្រជា​ភិថុត​របស់​លោក​នាយក​រដ្ឋមន្ត្រី។

ម្ចាស់ផ្ទះជួលមួយក្នុងម្ដុំត្រពាំងឈូក អ្នកស្រី ដួង សារឿន បានប្រាប់ទស្សនាវដ្តីមនោរម្យ.អាំងហ្វូថា អ្នកស្រី​មាន​បន្ទប់​ជួលជាច្រើនបន្ទប់។ ក្នុងនោះមួយចំនួន អ្នកស្រីជួលឲ្យនិស្សិត ដែលឡើងមកពីតាមបណ្តាខេត្ត និងមួយ​ចំនួនទៀត ជួលឲ្យអ្នកធ្វើការនៅតាមរោងចក្រនានា ក្នុងរាជធានីភ្នំពេញ។ ជាធម្មតា តម្លៃនៃបន្ទប់មួយ ដែល​អ្នកស្រី​ជួលសព្វថ្ងៃចាប់ពី៤០ដុល្លា ទៅ៦០ ដុល្លា តាមទំហំ និងសោភ័ណ្ឌភាពនៃបន្ទប់ (បន្ទប់ខ្លះចាក់សាបធម្មតា ខ្លះក្រាលការ៉ូជាដើម)។ អ្នកស្រីបន្តថា ចំណែកការឡើងថ្លៃបន្ទប់វិញ មិនមែនអ្នកស្រីចេះតែឡើងថ្លៃនោះទេ។ ពេលខ្លះ៣ឆ្នាំ អ្នកស្រីមិនដែលរំលឹកពីការឡើងថ្លៃផង ឯពេលខ្លះបានត្រឹមតែមួយឆ្នាំ ក៏សម្រេចចិត្តឡើងថ្លៃបន្ទប់ទៅ។

អ្នកស្រីបន្ថែមដូច្នេះថា៖ «វាពិបាកណាស់ ក្នុងការឡើងថ្ងៃបន្ទប់ម្តងៗ។ ព្រោះយើងដឹងថា ពួកគាត់មករៀន ឬមក​ធ្វើជាកម្មករ ប្រាក់ខែក៏មិនច្រើន។ ចឹងយើងមិនចង់ឡើងថ្លៃទេ តែអ្វីៗលើទីផ្សារគិតតែពីឡើងថ្លៃ។ សម្ភារៈជួលផ្ទះ ពេលដោះដូរជូនពួកគាត់ក៏ថ្លៃ ចឹងបើមិនឡើងថ្លៃធ្វើម៉េចអាចទប់ទល់ នឹងទំនិញលើទីផ្សារបានទៅ។»

យ៉ាងណា អ្នកស្រីមិនជំទាស់ នឹងការបង្កើតច្បាប់របស់រដ្ឋាភិបាលឡើយ។ អ្វីដែលអ្នកស្រីត្រូវស្នើដល់រដ្ឋាភិបាល ទាក់ទងនឹងច្បាប់នេះ នោះគឺរដ្ឋាភិបាល«គួណាស់មកពិភាក្សា ឬស្តាប់យោបល់ពីម្ចាស់ផ្ទះជួល ក៏ដូចជាអ្នកជួល​ជាមុនសិនដែរ កុំធ្វើតែតាមអ្វីដែលខ្លួននឹកឃើញ និងអាងអំណាចនោះ។»

អ្នកស្រី អ៊ុក ផល្លា ម្ចាស់ផ្ទះជួលនៅម្តុំវត្តអង្គតាម៉ិញ បានថ្លែងប្រាប់ទស្សនាវដ្តីមនោរម្យ.អាំងហ្វូតាមទូរស័ព្ទដែរថា អ្នកស្រីនឹងប្រឆាំងច្បាប់ជួលផ្ទះនេះ បើច្បាប់មួយនេះ មិនបានគិតពីប្រយោជន៍ សម្រាប់ភាគីទាំងសងខាង ឲ្យ​ស្មើ​ភាពគ្នាទេនោះ។ អ្នកស្រីបន្តថា រដ្ឋាភិបាលគួណាស់យកចិត្តទុកដាក់ ទៅលើតម្លៃជួលផ្ទះធំៗ ដូចជាផ្ទះជួលទាំង​មូល ឬទាំងជុង ជួលខុនដូរ ផ្ទះសំណាក់ ឬសណ្ឋាគារជាដើម ទើបប្រសើរជាង។ អ្នកស្រីថា បើទោះជាមានច្បាប់​មែន ក៏ត្រូវតែជាច្បាប់មួយ ដែលបង្ហាញពីតុល្យភាពរវាងម្ចាស់ផ្ទះ និងអ្នកជួលដែរ។

អ្នកស្រី ផល្លា បានបញ្ជាក់ថា៖ «បើរដ្ឋាភិបាលពិតជាមានចិត្ត ឬចេតនាចង់ជួយដោះបន្ទុកអ្នកជួលផ្ទះ ដែលអាច​បានផ្ទះមួយស្អាត និងតម្លៃសមរម្យនោះ រដ្ឋាភិបាលខ្លួនឯង ត្រូវតែធ្វើការទាញបញ្ចុះតម្លៃទំនិញលើទីផ្សារ ឲ្យបាន​ទាបជាងសព្វថ្ងៃនេះ និងមាននិរន្តរភាពមិនឡើងថ្លៃ ពិសេសតម្លើងថ្លៃប្រាក់ឈ្នួលកម្មករ ឲ្យបានខ្ពស់ជាង​សព្វ​ថ្ងៃ។»

ឯលោក យឹម សារ៉ុម ម្ចាស់ផ្ទះសំណាក់មួយផ្សេងទៀត ក៏បានលើកឡើងស្រដៀងគ្នានេះដែរ លោកបានសង្កត់​ធ្ងន់​ទៅ​លើរូបិយវត្ថុរបស់កម្ពុជា ដែលកំពុងតែធ្លាក់ថ្លៃក្នុងទីផ្សារកម្ពុជា (តម្លៃថោក) ដែលនាំឲ្យរូបិយវត្ថុបរទេស​ឡើងថ្លៃ និងនាំឲ្យទំនិញឡើងថ្លៃតាមនោះដែរ។ លោកបន្តអះអាងថា៖ «ជាម្ចាស់ផ្ទះជួលមួយ ការពិតទៅ មិន​បាន​ឡើងថ្លៃផ្ទះ ឬថ្លៃបន្ទប់អ្វីទេ។ តម្លៃនេះ វានៅស្ថេរ បើធៀបទៅនឹងទំនិញលើទីផ្សារ ។ ដូច្នេះមានន័យថា តម្លៃនេះ​វា​ចាំបាត់ត្រូវដើរតាម ទំនិញក្នុងទីផ្សារដែរ។»

លោកបានលើកឧទាហរណ៍មួយថា៖ «ពីមុនមួយដុល្លា ស្មើជិត៣០០០រៀល អាចចាក់សាំងបានមួយលីត្រ ហើយ​សល់លុយទៀត។ តែឥឡូវទៅទិញសាំង បានត្រឹមជាងកន្លះលីត្រប៉ុណ្ណោះ។ ដូច្នេះដើម្បីបានសាំងមួយលីត្រ ត្រូវ​តែ​ចំណាយលុយជិត២ដុល្លាទៅហើយ។ (...) មួយទៀត សាច់គោ មួយគីឡូប្រើលុយត្រឹមតែ ៤០០០រៀល​ប៉ុណ្ណោះ​ពីមុន ដែលស្មើនឹងមួយដុល្លាពេលនេះ។ តែឥឡូវបើមានលុយ មិនដល់បីម៉ឺនរៀលទេ មិនអាចទិញ​សាច់​គោ​បានមួយគីឡូឡើយ ។ ដូច្នេះបើធៀបនឹងប្រាក់ដុល្លា ស្មើនឹងជាង៧ដុល្លាអាមេរិកឯណោះ។ ពីមុន១០ដុល្លា ទិញ​សាច់គោបាន១០គីឡូ តែឥឡូវ ១០ដុល្លាយ៉ាងម៉េចដែរ បើមួយគីឡូ ឡើងជិត៨ដុល្លាហើយនោះ! ចុះតម្លៃផ្ទះ​ជួល​យ៉ាងម៉េចដែរ?»

យ៉ាងណាក៏ដោយ ក៏ការលើកឡើងរបស់លោក ហ៊ុន សែន ដែលបានរបូតអសនៈសភារបស់ខ្លួន អស់ជាង២០​កៅអី ក្នុងអាណត្តិថ្មីនេះ នៅមិនទាន់មានការបញ្ជាក់ឲ្យច្បាស់ថា តើច្បាប់នេះនឹងអាចចេញនៅពេលណា ឬដាក់​ឲ្យអនុវត្តន៍របៀបណានោះដែរ។ លោក ហ៊ុន សែន គ្រាន់តែបានបង្ហាញជំនឿចិត្តថា លោកមានការឯកភាពគ្នា រវាងរូបលោកផ្ទាល់ និងលោក សម រង្ស៊ី ហើយ។ ហើយលោកក៏បានបង្ហើបទៀតដែរថា៖ «យើងត្រូវធ្វើច្បាប់មួយ ដើម្បីការពារទាំងសងខាង។ (...) ដើម្បីធានាទទួលខុសត្រូវទាំងសងខាង។»

រីឯនៅលើទំព័រហ្វេសប៊ុកផ្លូវការរបស់លោក សម រង្ស៊ី ក៏បានសរសេរយល់ស្រប ថាគណបក្សទាំងពីរនៅរដ្ឋសភា ចាប់ផ្តើមរៀបចំធ្វើច្បាប់ថ្មីមួយ ស្តីពីការគ្រប់គ្រងតម្លៃឈ្នួលផ្ទះ ប្រហាក់ប្រហែលនេះដែរ។ប្រធានគណបក្ស​សង្គ្រោះ​ជាតិបានសរសេរទៀតថា៖ «ច្បាប់នេះមានបំណងកំណត់យ៉ាងច្បាស់លាស់ អំពីកាតព្វកិច្ចទាំងសងខាង រវាងម្ចាស់ផ្ទះ និងអ្នកជួលផ្ទះ ដើម្បីការពារសិទ្ធិ និងផលប្រយោជន៍ របស់ភាគីទាំងពីរ ដោយឈរលើយុត្តិធម៌ និង​សមធម៌។»៕