នៅព្រឹកថ្ងៃទី១២ ខែកុម្ភៈ ឆ្នាំ២០១៥នេះ អ្នកភូមិ​គ្រួស ឃុំ​សំរោង សង្កាត់​សំរោង ខណ្ឌ​ព្រែកភ្នៅ រាជធានី​ភ្នំពេញ ប្រមាណ​ជាង​១០​គ្រួសារ បាន​ធ្វើការ​ទាម​ទារ ​នៅ​លើ​ដី​មួយ​កន្លែង នៅ​តាម​បណ្តោយ​ផ្លួវ​ជាតិ​លេខ​៥។ ដី​នោះ​ជា​មាត់​ប្រឡាយ មាន​ព្រំ​ប្រទល់​ជាប់​ជា​មួយ​ដី​របស់​ក្រុមហ៊ុន ផានអ៊ីមិច បាន​ទិញ។ មូលហេតុ​ដែល​មាន​ការ​តវ៉ា​នេះ​ឡើង បណ្តាល​មក​ពី ក្រុមហ៊ុន​ខាង​លើ​បាន​ជីកដី​ដាក់​លើ​ទំនប់​ប្រឡាយ​នោះ មិន​ឲ្យ​ពលរដ្ឋ​សង់​ទី​លំនៅ។ ពួក​គាត់​បាន​ដាក់​ពាក្យ​ស្នើរ ទៅ​កាន់​មេភូមិ​ហើយ ក៏​នៅ​មិ​នមាន​ការ​ដោះ​ស្រាយ​ទៀត។

អ្នកស្រី អ៊ូ រួន ជាពលរដ្ឋម្នាក់ក្នុងចំណោមពលរដ្ឋតវ៉ាខាងលើ បានរៀបរាប់ថា អ្នកភូមិទាំងអស់ ជាអ្នករស់នៅ​តាមបណ្តោយផ្លូវជាតិលេខប្រាំ តែនៅពេលក្រុមហ៊ុនចិនមួយ ធ្វើការពង្រីកផ្លូវនេះ ក៏បានផ្តល់នូវ​សំណងមួយ​ចំនួន ឲ្យអ្នកភូមិរើចេញ ចាប់ពីថ្ងៃទី៦ ខែកុម្ភៈរហូតដល់ ថ្ងៃទី៦ ខែមិនា ឆ្នាំ២០១៥ ដើម្បីសាងសង់និងកែឆ្នៃ​ផ្លូវ​ជាតិលេខ៥។ ពួកគាត់ទាំង១០គ្រួសារបានចាប់ផ្តើមចាកចេញ ទៅនៅលើប្រឡាយនោះ ដោយមានការយល់​ព្រម ពីប្រធានភូមិ។

អ្នកស្រីបានបន្តទៀតថា ប៉ុន្តែនៅថ្ងៃទី១១ ខែកុម្ភៈ ឆ្នាំ២០១៥ ម្សិលម៉ិញនេះ ក្រុមហ៊ុនផានអ៊ីមិចដែល មានព្រំ​ប្រទល់ដីនៅជាប់នោះ បែរជាមិនឲ្យពួកគាត់សង់ផ្ទះទៅវិញ។ ហើយបានប្រើឧបករណ៍កាយដី មកលុបដាក់​លូមិនឲ្យអ្នកភូមិនៅបាន និងបញ្ឈប់ការសង់លំនៅដ្ឋាន របស់ពលរដ្ឋ។ សកម្មភាពទាំងនេះ អ្នកស្រីបានឲ្យ​ដឹងថា មានការចូលរួមជាមួយនឹងមេភូមិគ្រួស លោក ម៉ា ហុក និងមេឃុំសំរោងលោក កង សែន ដែលមិនបាន​ដោះស្រាយឲ្យពួកគាត់ តែបែរជាអនុញ្ញាតឲ្យក្រុមហ៊ុន កាយកប់មកលើផ្ទះពលរដ្ឋ​ បានសាងសង់​មួយចំនួន​ទៀតផង។

មិនខុសគ្នានេះទេ ពលរដ្ឋម្នាក់ទៀតលោក គឹម ឆន បានប្រាប់ទស្សនាវដ្ដីមនោរម្យ.អាំងហ្វូឲ្យដឹងថា គាត់​មិន​សុខចិត្តទេ លោកចង់បានដី កន្លែងដែលក្រុមហ៊ុនលើកដីឡើងនោះ ឲ្យដូចដើមវិញ ដែលពួកគាត់អាច​រស់​នៅ​បាន។ លោកបញ្ជាក់ថា ដំបូងមានការអនុញ្ញាតត្រឹមត្រូវឲ្យរស់នៅ ដោយធ្វើយ៉ាងណាកុំឲ្យតែស្ទះប្រព័ន្ធ​ទឹក​បាន​ហើយ។ តែដល់ពេលអ្នកភូមិចាប់ផ្តើម រើលំនៅមកសាងសង់ ខាងអភិបាលខណ្ឌមកហាមឃាត់ មិនឲ្យ​ធ្វើ​ទៅវិញ។ លោក គឹម ឆន បាននិយាយថា គាត់ និងអ្នកភូមិឯទៀត មិនដឹងទៅពឹងអ្នកណាទេ បើមេភូមិនិងចៅ​សង្កាត់របស់គាត់ មិនអើពើបែបនេះនោះ។ មកឃាត់អ្នកភូមិមិនឲ្យធ្វើ តែក្រុមហ៊ុនអាចធ្វើបានដោយ​គ្មាន​ញញើត។ លោកថា៖ «តើប្រធានភូមិរបស់លោក បានទទួលអ្វីខ្លះពីអ្នកទាំងនោះ បានជាមើលមិនឃើញ ពលរដ្ឋខ្លួនឯងរងទុក្ខ ទៅជួយអ្នកមានលុយទៅវិញ?»

ដោយឡែកប្រធានភូមិគ្រោះលោក ម៉ា ហុក បានថ្លែងអះអាងថា ប្រឡាយទឹកនេះជារបស់រួម សម្រាប់ពលរដ្ឋ​ទូទៅប្រើប្រាស់ ស្រោចស្រពដីស្រែ។ លោកថាពលរដ្ឋមិនអាចធ្វើបាន ក្រុមហ៊ុនក៏មិនអាចធ្វើបានដែរ លោក​បាន​និយាយទៀតថា លោកក៏ធ្លាប់បានឃាត់ដែរ តែគេមិនបញ្ឈប់ ហើយលោកបន្តថា វាជាបញ្ជារបស់ថ្នាក់​ខណ្ឌ​ខាងលើ។ ចំពោះមូលហេតុដែលរកទីតាំងថ្មីឲ្យពលរដ្ឋរស់នៅ និងមូលហេតុជាក់លាក់ដែលក្រុមហ៊ុន​អាចដាក់លូបាន ហើយពលរដ្ឋមិនអាចសង់ផ្ទះនោះ មិនត្រូវបានប្រធានភូមិខាងលើមិនបានបំភ្លឺឲ្យច្បាស់ទេ។

ចំពោះរឿងទាំងអស់នេះអ្នកស្រី ម៉ុល ម៉ាឡារី ដែលជាស្មៀនឃុំខាងលើបាននិយាយថា គាត់មិសូវដឹងរឿង​នេះ​ច្បាស់ទេ។ អ្នកស្រីបានលើកឡើងថា៖«ពលរដ្ឋធ្វើបែបនេះគឺខុសច្បាប់» ប៉ុន្តែអ្នកស្រីមិនបានទទួលស្គាល់ថា តើក្រុមហ៊ុននេះជា អ្នកបំពានលើពលរដ្ឋខ្លួនឬ ពលរដ្ឋជាអ្នកបំពានលើក្រុមហ៊ុននោះឡើយ៕