បើទោះជាមានការព្រមានជាបន្តបន្ទាប់ពីរដ្ឋាភិបាលក៏ដោយ ក៏លោក រ៉ុង ឈុន ប្រធានសហភាពសហជីពកម្ពុជា និងជាប្រធានសមាគមគ្រូបង្រៀនកម្ពុជាឯករាជ្យ ហាក់ដូចជាព្រងើយកន្កើយ ទៅនឹងការព្រមានទាំងនោះ ហើយ​ថែម​ទាំងបន្តការទាមទារមានទ្រង់ទ្រាយធំជាងមុនទៀត។ ការទាមទារធំជាងមុន ក៏ព្រោះតែលោក រ៉ុង ឈុន មិន​ត្រឹមតែ​រក្សាជំហរទាមទារ ប្រាក់ខែគោល១៦០ដុល្លារអាមេរិកដល់កម្មករនោះទេ គឺថែមទាំងលើកឡើង ពីការទាម​ទារប្រាក់​ខែគោលដល់មន្រ្តីរាជការ និងគ្រូបង្រៀនឲ្យបានមួយលានរៀលផងទៀត។

លោក រ៉ុង ឈុន (ខាងស្ដាំ) ឡើងលើដំបូលរថយន្ដ ថ្លែងទៅកាន់ក្រុមកម្មករ នៅមុខក្រសួងការងារ។ (រូបថត MONOROOM.info/ O.Vary)

វិបត្តិការងារ - ក្នុងសេចក្តីអំពាវនាវរបស់សមាគមគ្រូបង្រៀនកម្ពុជាឯករាជ្យ ចុះថ្ងៃទី១ ខែមករា ឆ្នាំ២០១៤ ដែល​មាន​លោក រ៉ុង ឈុន ជាប្រធាន បានទទូចឲ្យសមាជិក សមាជិកា គ្រូបង្រៀន មន្រ្តីរាជការ សិស្ស និស្សិត និងមហាជន​ទូទៅឲ្យ​ចូលរួមមហាកូដកម្មទូទាំងប្រទេស ដោយមិនបង្រៀន មិនធ្វើការ និងមិនរៀន ចាប់ពីថ្ងៃទី៦ ខែមករា ឆ្នាំ២០១៤ តទៅ។

សេចក្តីអំពាវនាវដដែលនោះ បានលើកហេតុផលថា ដើម្បីផលប្រយោជន៍របស់មន្រ្តីរាជការ គ្រូបង្រៀន សិស្ស និស្សិត សម្រាប់រយៈពេលវែងឆ្ងាយ ពួកគេគួរឈប់សម្រាករយៈពេលខ្លី ដើម្បីទាមទារឲ្យរដ្ឋាភិបាល ដោះស្រាយ​បញ្ហាសំខាន់ៗចំនួន៣ ក្នុងនោះរួមមាន៖ ទី១.តម្លើងប្រាក់បៀវត្យន៍គោល ១លានរៀល ជូនគ្រូបង្រៀន និងមន្រ្តី​រាជការ ក្នុងមួយខែៗ។ ទី២.ឲ្យមានការធានាសេវាសុខភាព ជូនគ្រូបង្រៀន និងមន្រ្តីរាជការ។ ទី៣.ផ្តល់ប្រាក់ឧបត្ថម​សម្រាប់បុណ្យជាតិនីមួយៗ ឲ្យបាន១៥ម៉ឺនរៀល ជូនគ្រូបង្រ្គៀន និងមន្រ្តីរាជការ។

សូមរម្លឹកថា បន្ទាប់ពីការបដិសេធមិនទទួលយក និងបន្តការទាមទារដោយអហិង្សាចំពោះប្រាក់ខែគោល១០០ដុល្លារ ដែលទើបនឹងសម្រេចដោយរដ្ឋាភិបាល និងភាគីពាក់ព័ន្ធផ្សេងទៀតមក យ៉ាងហោចណាស់ក៏មានសហជីពចំនួន៥ បូករួមទាំងសភាពសហជីពកម្ពុជា និងសមាគមគ្រូបង្រៀនកម្ពុជាឯករាជ្យ របស់លោក រ៉ុង ឈុន ត្រូវបានរដ្ឋាភិបាល​ព្រមានពីរលើកមកហើយ ឲ្យបញ្ឈប់ការទាមទារ និងលទ្ធភាពនៃការចាប់ខ្លួន។ ការព្រមានក៏ព្រោះតែ រដ្ឋាភិបាល​ចាត់​ទុក សកម្មភាពសហជីពដែលដឹកនាំការតវ៉ា គឺជាការ«ញុះញង់កម្មករ និងការប្រើអំពើហិង្សា។» តែការចោទប្រកាន់​របស់​រដ្ឋាភិបាល ត្រូវបានសហជីពទាំងនោះ ធ្វើការបដិសេធចោល។

ជុំវិញករណីនេះ ទស្សនាវដ្តីមនោរម្យព័ងអាំងហ្វូមិនអាចទាក់ទង តំណាងរដ្ឋាភិបាល ដើម្បីធ្វើការអត្ថាធិប្បាយ​បាន​នៅឡើយ។ តែសម្រាប់ លោក សម រង្ស៊ី ប្រធានគណបក្សសង្រ្គោះជាតិ ដែលជាគណបក្សជំទាស់ បានសម្តែង​ការ​គាំទ្រដល់ការទាមទាររបស់សហជីព និងកម្មករ ហើយបានថ្លែងទៅកាន់អ្នកគាំទ្រ និងកម្មករ វេលាយប់ថ្ងៃទី១ ខែ​មករា ឆ្នាំ២០១៤ នៅទីលាន​ប្រជា​ធិបតេយ្យថា នឹងមានការផ្ទុះការតវ៉ាទូទាំងប្រទេស ប្រសិនបើមេដឹកនាំសហជីព​ណា​មួយ​ត្រូវបានចាប់ខ្លួន ក្នុងករណី ជួយការពារផលប្រយោជន៍កម្មករ ក្នុងតវ៉ាឲ្យមានការតម្លើងប្រាក់ឈ្នួលការងារ ១៦០ដុល្លារអាមេរិក៕

--------------------------------------
ដោយ៖ អ៊ុំ បូរី - ភ្នំពេញ ថ្ងៃទី០២ ខែមករា ឆ្នាំ២០១៤
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ