ជូស្ទីន ប៊េប៊័រ និងសេឡេណា ហ្គោមេស បានបែកបាក់គ្នាហើយ
ជាភាពបញ្ចប់នៃស្នេហាដំបូង របស់យុវជនជំទង់ទាំងពីរនាក់។ អ្នកចំរៀងល្បីជនជាតិកាណាដា ជូស្ទីន ប៊េប៊័រ បានត្រូវកញ្ញាសម្ដែងរូបស្អាត ជនជាតិអាមេរិកាំង នាង សេឡេណា ហ្គោមេស ចាកចេញចោល។
អ្នកចម្រៀងល្បី ជូស្ទីន ប៊េប៊័រ និង នាងសេឡេណា ហ្គោមេស។ រូបថត Universal / Island Records។
ជាសត្យានុម័ត្រ របស់ធម្មជាតិ។ គេអាចនឹងមានរូបរាងសង្ហា មានទ្រពធន និងមានឈ្មោះល្បី ... តែទីបំផុតក៏អាចនឹងត្រូវ គេបោះបង់ចោល នៅថ្ងៃណាមួយអញ្ចឹងដែរ។ ដំណើរផ្សងព្រេងយ៉ាងជូចត់ នៃសេចក្ដីស្នេហា របស់ជូស្ទីន ប៊េប៊័រ (Justin Bieber) អាចនឹងត្រូវបានសរសេរ ចេញជាចម្រៀងមួយបទ ដែលជូស្ទីន ប៊េប៊័រខ្លួនឯង ធ្លាប់ច្រៀងចម្រៀងបែបនេះរួចហើយ តែគឺនៅពេលស្នេហាទើបនឹងចាប់រូបរាង ដូចយ៉ាងបទ «ប៊េប៊ី (Baby)» និង «ប៊យហ្វ្រេន (Boyfriend)» ជាដើម។
តាមគេហទំព័រ People.com ដែលបានបញ្ជាក់អះអាងពី ពត៌មានថ្មីបំផុតនេះ គឺកញ្ញាជំទង់ មកពីរដ្ឋតិចសាស ជាអ្នកចាកចេញពីយុវជនតារាចម្រៀងល្បី តែកំសត់ស្នេហ៍ ដោយប្រហែលជាមកពីនាងជាប់រវល់ខ្លាំងពេក ពីមុខជំនួញរបស់នាង។ ទស្សនាវដ្ដីតាមបណ្ដាញអាំងទែណែត បានស្រង់សម្ដីប្រភពមួយ មកនិយាយថា «នាងបានផ្ដាច់ចំណងមេត្រីភាព ពីជូស្ទីន តាំងពីមួយសប្ដាហ៍មកហើយ»។ មូលហេតុដែលជំរុញអោយសេឡេណា ហ្គោមេស (Selena Gomez) សំរេចចិត្តយ៉ាងដូច្នេះនោះ គេបាននិយាយបង្ហាញថា មកពីនាងជាប់ភារកិច្ចមមាញឹកច្រើន មានកាលវិភាគពិបាកចាត់ចែង និងប្រហែលជានាងចង់មានជីវិតថ្មីមួយ ដែលនៅឆ្ងាយពីការរំខាននៃប្រព័ន្ធផ្សព្វផ្សាយ។ ប្រភពនោះបានបន្ថែមថា «មិនមែនជារឿងមួយស្រួលក្នុងចិត្តប៉ុន្មាននោះទេ តែទំនាក់ទំនងស្នេហានេះ វាត្រូវបានបញ្ចប់ហើយ។»
តើជូស្ទីន អាចសង្កត់ចិត្តខ្លួនឯងបានទេ ?
យុវជនម្ចាស់សំនៀង អាយុ១៨ឆ្នាំ ដែលលក់ថាសចម្រៀងបានរហូតជា ៣០លានថាសចម្រៀងនេះ ប្រហែលជាទើបតែ នឹងស្គាល់ទុក្ខសោកស្នេហាជាលើកទីមួយប៉ុណ្ណោះ បើទោះជាធា្លប់មានប្រវត្តិស្នេហ៍ ដ៏ពិបាកមួយមុននេះរួចមកហើយ ជាមួយនឹងនាង ចៀស្មីន វីលើហ្គាស (Jasmine Villegas) នៅឆ្នាំ២០១០។ ជូស្ទីន ប៊េប៊័រ បានចេញចងស្នេហ៍ជាមួយនឹង នាងសេឡេណា ហ្គោមេស ជាផ្លូវការចាប់ពីថ្ងៃទី២៧កុម្ភះឆ្នាំ២០១១កន្លងមក ហើយធ្លាប់ចេញមកជាមួយគ្នា នៅក្នុងរាត្រីសមោសរជាច្រើនរបស់ហូលីវូដ។
បើតាមញ៉ូយកប៉ុស្ដ៍ (New York Post) ម្ចាស់សំនៀងដ៏មានមន្ដស្នេហ៍របស់យើង ទំនងជាបានសង្កត់ចិត្តរបស់ខ្លួន និងបានបើកទំព័រថ្មីមួយទៀត រួចរាល់ហើយ។ កាលពីថ្ងៃពុធទី០៧វិច្ឆិកាកន្លងទៅនេះ គេឃើញវត្តមានរបស់ជូស្ទីន នៅក្នុងកម្មវិធីដើរបង្ហាញមូដមួយដ៏ធំ របស់ វិចធូរៀ សេក្រេត (Victoria's Secret) ហើយដូចជាបានប្រមែប្រមូលនូវលេខទូរស័ព្ទ របស់ទេពធីតាៗ ដែលបានមកចូលរួម នៅពេលនោះថែមទៀតផង។
យើងនឹងនៅចាំមើល ថាតើទេពធីតាក្រោយ នៅក្នុងបេះដូង របស់ជូស្ទីនជាអ្នកណា? អាចជានារីមានសក់ពណ៍ទង់ដែង? ប្រហែលដែរ៕
--------------------------------------------------
ដោយ ឈូករ័ត្ន - ប៉ារីស ថ្ងៃទី១១ ខែវិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ