មីត រ៉ូមណី៖ «វាពិបាកណាស់» ដែលមិនបានក្លាយជាប្រធានាធិបតី USA
នៅក្នុងកិច្ចសម្ភាសជាលើកដំបូងមួយ ជាមួយនឹងបណ្ដាទូរទស្សន៍ ហ្វូស (Fox) បន្ទាប់ពីបរាជ័យនៅក្នុង ការបោះឆ្នោត ប្រធានាធិបតី កាលពីខែវិច្ឆិការឆ្នាំ២០១២ អតីតបេក្ខជនរបស់គណបក្សសារធារណរដ្ឋ មីត រ៉ូមណី (Mitt Romney) បានថ្លែងជាកាលពីថ្ងៃអាទិត្យនេះ រិះគន់លោកបារ៉ាក់ អូបាម៉ា (Barack Obama) ថា«វាជាខកចិត្តមួយ ដែលមិនបានទៅកាន់សេតវិមាន» ដើម្បីដោះស្រាយបញ្ហារបស់ប្រទេសជាតិ។
លោកមីត រ៉ូមណី អតីតគូរប្រជែងរបស់លោកអូបាម៉ា ក្នុងការបោះឆ្នោតប្រធានាធិបតីអាណត្តិទីពីរ។
«វាធ្វើអោយខ្ញុំរំខានចិត្តណាស់ ដែលមិនបាននៅទីនេះ និងនៅសេតវិមាន ដើម្បីធ្វើអ្វីដែលត្រូវធ្វើ» លោករ៉ូមណី បានបកស្រាយប្រាប់ នៅក្នុងទូរទស្សន៍ហ្វូស។ លោកបន្ថែមថា «វាពិបាកណាស់»។
មីត រ៉ូមណី បានរិះគន់យ៉ាងចាស់ដៃ ប្រធានាធិបតីជាប់ឆ្នោតលោកបារ៉ាក់ អូបាម៉ា ទៅលើការដោះស្រាយសំនុំរឿងថវិកា និងកញ្ចប់ប្រាក់ ៨៥ពាន់លានដុល្លា ដែលនឹងត្រូវចូលជាធរមាន នៅថ្ងៃសុក្រមុន បន្ទាប់ពីកិច្ចព្រមព្រៀងប្រកបដោយកំហុសមួយ រវាងពួកសមាជិកគណបក្សប្រជាធិបតេយ្យ និងសារធារណរដ្ឋ ក្នុងសភាជាន់ទាបមក។
«គ្មាននរណាគិតថា ទាំងនេះជាជោគជ័យ របស់ប្រធានាធិបតីនោះទេ» លោកបានបញ្ជាក់ដូច្នេះ។ តែអតីតបេក្ខជនធ្លាក់ឆ្នោតរូបនេះ ក៏បានធ្វើស្វ័យទិះទៀន នៅក្នុងយុទ្ធានាការបោះឆ្នោតកន្លងមក ដោយបានទទួលស្គាល់ ពីសេចក្ដីប្រកាសដែលមិនគួរឲ្យមាន និងកង្វះប្រសិទ្ធភាព នៃពាក្សសម្ដីរបស់លោក ថ្លែងសម្រាប់ក្រុមសហគមន៍ជនភាគតិច នៅសហរដ្ឋអាមេរិក។
លោករ៉ូមណី បានធ្វើការប្រៀបធៀប ពីពេលធ្វើយុទ្ធនាការបោះឆ្នោត ដែលដូចទៅនឹងការឡើងលើ«ភ្នំដ៏ខ្ពស់» ហើយធ្លាក់មក«វាលរាបយ៉ាងទាប»វិញ ខណៈដែលក្រោយមក លោកត្រូវបានផាត់ចេញសឹងតែទាំងស្រុង ពីការចាប់អារម្មណ៍របស់ប្រព័ន្ធផ្សព្វផ្សាយ។ គួររំលឹកថា នៅថ្ងៃទី៦ខែវិច្ឆិការ ឆ្នាំ២០១២ បេក្ខជនមកពីគណបក្សសារធារណរដ្ឋរូបនេះ ត្រូវបានដណ្ដើមជ័យជំនះដោយប្រធានាធិបតីផុតតំណែង លោកបារ៉ាក់ អូបាម៉ា បន្ទាប់ពីសង្គ្រាមឃោសនារកសម្លេងឆ្នោត អស់រយះពេលជាច្រើនខែ បូកផ្សំនឹងចំនួនទឹកប្រាក់យ៉ាងច្រើនសម្បើមជាងគេ សម្រាប់ចំណាយដល់ការយុទ្ធានាការបោះឆ្នោតនេះ។
សូមអានអត្ថបទផ្សាយផ្ទាល់ ក្នុងព្រឹត្តិការណ៍បោះឆ្នោតនៅសហរដ្ឋអាមេរិក របស់មនោរម្យព័ងអាំងហ្វូ។
លោកបានសរុបសេចក្ដីមកថា «វាធ្លាប់ប្រើប្រាស់យ៉ាងច្រើន នូវថាមពល ជំនក់ចិត្ត និងបណ្ដាជនដែលនៅជុំវិញយើង។ ហើយនៅបន្ទាប់ពីនោះភ្លាមមក វាក្លាយជាអស់អ្វីរលីង»៕
--------------------------------------------------
ដោយ ៖ កេសរកូល - ភ្នំពេញ ថ្ងៃទី០៤ ខែមិនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ