«ឲ្យកូនសុំទោស ម៉ាក់, កូនបានបាញ់កាំភ្លើង ចំប្អូនប្រុស»
- ដោយ: សុបិន្ដ អត្ថបទ៖ សុបិន្ត ([email protected]) - ម៉ុងរ៉េអាល់ ថ្ងៃទី២៤ មករា ២០១៥
- កែប្រែចុងក្រោយ: January 25, 2015
- ប្រធានបទ: ស្លុតចិត្ត
- អត្ថបទ: មានបញ្ហា?
- មតិ-យោបល់
-
ហេតុការណ៍ដ៏រន្ធត់ បានកើតឡើងទៅលើគ្រួសារមួយ កាលពីដើមសប្ដាហ៍នេះ ក្នុងក្រុង អែលម៉ូ (Elmo) ទីក្រុងដ៏តូចមួយស្ថិតនៅខាងជើងរដ្ឋ មីស៊ូរី ដែលបានធ្វើឲ្យនាង អេឡិចស៊ីស វៀឌើហូលដ៍ (Alexis Wiederholt) ម្ដាយវ័យក្មេងរបស់គ្រួសារនេះ យំមិនចេញ។ ហេតុការណ៍នោះ បានចាប់ផ្ដើមដំបូង នៅពេលដែលម្ដាយវ័យ២៦ឆ្នាំរូបនេះ បានឮសូរសម្លេងផ្ទុះដ៏ចម្លែកមួយ បានលាន់ចេញពីបន្ទប់គេង ក្នុងផ្ទះរបស់ឪពុកនាង។ រំពេចនោះ កូនច្បងអាយុ៥ឆ្នាំរបស់នាង បានរត់សំដៅមករកម្ដាយខ្លួន ហើយបានបន្លឺពាក្យដ៏តក់ស្លុតថា៖ «ឲ្យកូនសុំទោស ម៉ាក់។ កូនបានបាញ់កាំភ្លើង ចំ គ័រប៊ិន»។
បន្ទាប់ពីឮប្រយោគដ៏ត្រជាក់ជាងទឹកកក របស់កូនច្បងខ្លួន នាង អេឡិចស៊ីស បានរត់ទាំងអស់ព្រលឹងទៅមើលក្នុងបន្ទប់... នាងបានប្រទះឃើញទារកអាយុ៩ខែរបស់នាង ដេកស្លាប់ស្ដូកស្ដឹងទៅហើយ។ នាងបានថ្លែងប្រាប់បណ្ដាញទូរទស្សន៍ NBC News ទាំងទឹកភ្នែក ក្នុងពេលក្រោយមកថា៖ «ខ្ញុំបានចូលទៅក្នុង ឃើញកូនតូចរបស់ខ្ញុំបាត់បង់ជីវិត នៅទីនោះក្នុងថ្លុកឈាម។ ខ្ញុំទើបនឹងបីពរវា ប្រមាណជា៥នាទីមុននេះសោះ។»។
អ្នកម្ដាយវ័យក្មេងរូបនេះ បាននាំកូនរបស់ខ្លួនមកលេងផ្ទះលោក វីលៀម ផ័ធើរ (William Porter) ឪពុករបស់នាង ហើយនាងមិនបានដឹងថា ឪពុកនាងមានរក្សាទុកនូវកាំភ្លើងមានគ្រាប់ នៅក្នុងផ្ទះដូច្នេះទេ។ ឬបើទុកជាដឹងថាមានកាំភ្លើង ក៏នាងមិនបានចាប់អារម្មណ៍ថា កាំភ្លើងនេះអាចត្រូវបានកូនរបស់នាងយកមកកាន់លេង យ៉ាងស្រួលអញ្ចឹងដែរ។
បើតាមអ្នកស៊ើបអង្កេតបានឲ្យដឹងថា កុមារជាកូនច្បងបានរកឃើញកាំភ្លើងរ៉ឺវ៉ុលវ៉ែ របស់ជីតាខ្លួន ហើយបានបាញ់ទាំងមិនដឹងអី សំដៅប្អូនប្រុសរបស់វាចំកណ្ដាលក្បាល។ រីឯជីតារបស់កុមារ លោក វីលៀម បានពន្យល់ថា លោកបានរក្សាកាំភ្លើងនេះទុកក្នុងផ្ទះ ក្នុងហេតុផលការពារសុវត្ថិភាព និងដើម្បីទុករៀនបាញ់។ លោកបានអះអាងទៀតថា លោកបានទុកវានៅក្នុងប្រអប់មួយបិទជិត ជាមួយនឹងកាំភ្លើងបាញ់សត្វផ្សេងទៀត។ នគរបាលនៅមិនទាន់រកឃើញថា តើកុមារអាចធ្វើយ៉ាងណា ដើម្បីបើកប្រអប់បិទជិតនោះបាន? បើតាមលោក វីលៀម បានបកស្រាយបន្ថែមថា កុមារទំនងជាយកអ្វីមួយមកឆ្កឹះ ទាល់តែប្រអប់នោះរបើក។
នាយនគរបាលតំបន់ លោក ដារ៉េន វ៉ាយ (Darren White) មិនបានលើកយកករណីរក្សាទុក នូវអាវុធមានគ្រាប់នៅក្នុងផ្ទះ មកនិយាយទេ។ ហើយណាមួយ មានអាវុធនៅផ្ទះ មិនមែនជារឿងខុសច្បាប់ទេ នៅសហរដ្ឋអាមេរិក។ ប៉ុន្តែលោកនាយបានរំលឹកថា៖ «មនុស្សជាច្រើនដែលបានរក្សាកាំភ្លើងទុកក្នុងផ្ទះ ដើម្បីជាការការពារខ្លួន គួរត្រូវពិចារណាឲ្យបានដិតដល់ឡើងវិញ។ បើមានវត្តមានកុមារនៅក្បែរហើយ មិនត្រូវទុកកាំភ្លើងដែលមានគ្រាន់ នៅកន្លែងតែពាសនោះទេ។»
ក្រុមអ្នកស៊ើបអង្កេត នៅមិនទាន់បានសាកសួរកុមារនៅឡើយ។ បើតាមម្ដាយរបស់កុមារវិញ បានឲ្យដឹងថា កុមារមិនបានដឹងពីអ្វីទៅ ដែលជាការស្លាប់របស់ប្អូនវានោះទេ។ នាងបាននិយាយថា៖ «ឪពុករបស់វា បានសាកល្បងនិយាយជាមួយវា តែវានៅមិនយល់អ្វីទាំងអស់»។ ចំពោះមូលហេតុដែលជំរុញឲ្យកុមារ តម្រង់កាំភ្លើងបាញ់ប្អូនខ្លួនឯង ក៏នៅមិនទាន់មាននរណាម្នាក់ ពន្យល់ឲ្យច្បាស់ដែរ។ នាង អេឡិចស៊ីស បាននិយាយថា៖ «កាយវិការនេះ ទំនងមកពីកុមារចង់ធ្វើតាម រូបភាពក្នុងកម្មវិធីមួយនៅតាមទូរទស្សន៍»៕